មនុស្សជិត២០នាក់បានស្លាប់ដោយសារគ្រោះថ្នាក់ចរាចរណ៍ក្នុងពិធីបុណ្យចូលឆ្នាំខ្មែររយៈពេលបីថ្ងៃ
ភ្នំពេញ៖យ៉ាងហោចណាស់មនុស្សជិត ២០នាក់ បានបាត់បង់ជីវិតបណ្តាលមកពីគ្រោះថ្នាក់ចរាចរណ៍នៅទូទាំងប្រទេសក្នុងរយៈពេលបីថ្ងៃនៃពិធីបុណ្យចូលឆ្នាំប្រពៃណីខ្មែរ ដែលអត្រាស្លាប់មានការធ្លាក់ចុះចំនួនប្រាំបួននាក់ បើធៀបនឹងឆ្នាំ ២០២២ដែលមានអ្នកស្លាប់ ២៧ នាក់។ នេះបើយោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ។
របាយការណ៍បានឱ្យដឹងថា ក្នុងរយៈពេលបីថ្ងៃ នៃបុណ្យចូលឆ្នាំប្រពៃណីខ្មែរ ត្រូវនឹងថ្ងៃទី ១៤ ,១៥ និងទី១៦ខែមេសា កន្លងមកថ្មីៗនេះ អត្រានៃគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន ៤៣លើកបណ្តាលបណ្តាលឱ្យមានអ្នកស្លាប់បាត់បង់ជីវិតចំនួន១៨ នាក់ និងរងរបួសធ្ងន់ស្រាលចំនួន ៧៧ នាក់ ក្នុងនោះធ្ងន់ចំនួន៥៣នាក់។
បើតាមនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ មូលហេតុដែលនាំឲ្យគ្រោះថ្នាក់នេះ បណ្តាមកពីបើកបរហួសល្បឿនកំណត់ មិនគោរពសិទ្ធិ មិនប្រកាន់ស្តាំ ប្រជែងគ្រោះថ្នាក់ ស្រវឹង និងកត្តាអាកាសធាតុ។
ឯកឧត្តមឧត្តមសេនីយ៍ ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានថ្លែងឱ្យដឹងថា ការគ្រោះចរាចរណ៍នៅក្នុងរយៈពេលបីថ្ងៃ នៃពិធីបុណ្យចូលឆ្នាំប្រពៃណីជាតិបានកើតឡើងតែ ៤៣ លើកទេ បើធៀបនឹងទៅនឹងឆ្នាំ២០២២ គឺមានការថយចុះចំនួនបួនលើក ក្នុងនោះអ្នកស្លាប់ថយចុះប្រាំបួននាក់ និងអ្នករងរបួសចំនួនថយចុះបីនាក់។
ឯកឧត្តមបានបញ្ជាក់ថា ការថយចុះនៃចំនួនគ្រោះថ្នាក់ចរាចរណ៍ រួមជាមួយនឹងចំនួនអ្នកស្លាប់ក៏ថយចុះដែរ សម្រាប់ឆ្នាំនេះ គឺជាទិន្នន័យដែលល្អមួយសម្រាប់ប្រទេសកម្ពុជា ក្រោយពីកម្ពុជាបើកប្រទេសឱ្យមានសកម្មភាពសេដ្ឋកិច្ចឡើងវិញ និងមានការចូលរួមអនុវត្ត និងគោរច្បាប់ចរាចរណ៍ផ្លូវគោកពីសំណាក់ប្រជាពលរដ្ឋបានល្អ និងមានចំនួនច្រើន។
ឯកឧត្តម ឆាយ គឹមខឿន បន្ថែមទៀតថា ពិសេសមួយវិញទៀតនោះ ការថយចុះនេះ ក៏ព្រោះតែសមត្ថកិច្ចគ្រប់រាជធានីខេត្តបានខិតខំប្រឹងប្រែងធ្វើការត្រួតពិនិត្យ និងណែនាំដល់អ្នកធ្វើដំណើរ មិនត្រឹមតែដោះស្រាយបញ្ហាការកកស្ទះចរាចរណ៍នៅលើដងផ្លូវនោះទេ។
ជាមួយគ្នានេះដែរ លោក គង់ សុវណ្ណ ទីប្រឹក្សាសុវត្ថិភាពចរាចរណ៍ បានប្រាប់ឱ្យដឹងថា ការថយចុះនេះ ដោយសារតែរាជដ្ឋាភិបាល វិស័យឯកជន រួមជាមួយនឹងអង្គការសង្គមស៊ីវិល បានធ្វើការផ្សព្វផ្សាយពីបញ្ហាសុវត្ថិភាពចរាចរណ៍ និងក្រើនរំលឹកតាមរយៈសារសំខាន់ៗជុំវិញបញ្ហាចរាចរណ៍ជូនដល់ប្រជាពលរដ្ឋនៅមុនឱកាសពិធីចូលឆ្នាំមកដល់បានច្រើន។
លោកបន្តថា ទោះជាយ៉ាង ទាំងអង្គការសង្គមស៊ីវិល និងរាជរដ្ឋាភិបាល មិនទាន់សប្បាយចិត្តចំពោះចំនួនគ្រោះថ្នាក់ចរាចរណ៍ និងអ្នកស្លាប់ថយចុះនោះទេ ព្រោះចំនួននៃគ្រោះថ្នាក់ចរាចរណ៍ និងអ្នកស្លាប់នៅតែក្តីកង្វល់របស់រាជរដ្ឋាភិបាល និងអង្គការដៃគូដដែលទេ។
លោក គង់ សុវណ្ណ បានបញ្ជាក់ថា តាមទិសរបស់រាជរដ្ឋាភិបាលក៏ដូចជាអង្គការដៃគូ គឺមិនចង់ឱ្យមានកើតឡើង និងបាត់បង់ជីវិតពីគ្រោះថ្នាក់ចរាចរណ៍ដល់ប្រជាពលរដ្ឋក្នុងពេលសប្បាយរីករាយនេះទេ។
ដោយឡែក សម្រាប់ករណីគ្រោះអគ្គិភ័យ ក្នុងរយៈពេល៣ថ្ងៃនៃពិធីបុណ្យចូលឆ្នាំនេះដែរ មានករណីកើតឡើងចំនួន១៥ករណី នៅទូទាំងប្រទេស ដែលមានការកើនឡើងប្រាំបីករណីធៀបនឹងរយៈពេលដូចគ្នានឹងឆ្នាំ២០២២។
យោងតាមរបាយការណ៍របស់នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ នៃអគ្គស្នងការដ្ឋាននគរបាលជាតិ នៅថ្ងៃទី១៧ ខែមេសា បានឱ្យដឹងថា ករណីគ្រោះអគ្គិភ័យនេះ បានបណ្តាលឱ្យខូចខាតផ្ទះចំនួន ១៣ខ្នង, បន្ទប់ប្រាំមួយបន្ទប់, ឃ្លាំងមួយ រថយន្ដចំនួនបួនគ្រឿង របួសមនុស្សម្នាក់ ប៉ុន្តែមិនបានបណ្តាលឱ្យមានអ្នកស្លាប់បាត់បង់ជីវិតនោះឡើយ៕
ដោយ៖គឹម យុត្ថារ៉ូ
