ប៉េកាំង៖ កាលពីឆ្នាំ២០២២ម្ចាស់អភិវឌ្ឍន៍គម្រោងអចលនទ្រព្យនៅប្រទេសចិនបានប្រឈមមុខនឹងវិបត្តិលំនៅឋានយ៉ាងធ្ងន់ធ្ងរ​ តែទោះយ៉ាងណាបច្ចុប្បន្ននេះ ម្ចាស់គម្រោងអភិវឌ្ឍន៍មួយចំនួនកំពុងចាប់ផ្តើមងើបឡើងវិញបន្តិចម្ដងៗ។ ទន្ទឹមនេះអ្នកជំនាញបានព្រមានថា ក្នុងរយៈពេលវែង កំណើនរបស់វិស័យនេះនឹងវិវត្តទៅក្នុងល្បឿនយឺតខ្លាំ​ងបំផុត។​

គួររំឭកថា វិស័យអចលនទ្រព្យនៅប្រទេសចិនមានការរីកចម្រើនយ៉ាងឆាប់រហ័សដោយសារតែមានការបន្ធូរបន្ថយវិ​ធា​ន​ការរឹតបន្តឹងក្នុងឆ្នាំ១៩៩៨ ហើយអស់រយៈពេលពីរទសវត្សរ៍មកហើយដែលម្ចាស់គម្រោងអភិវឌ្ឍន៍ មានភាពងាយស្រួ​លខ្លាំងក្នុងការទទួលបានប្រាក់កម្ចីពីធនាគាគារ។ ទីបំផុត បំណុលរបស់ពួកគេបានកើនឡើងខ្ពស់ហួសប្រមាណ ប​ណ្ដាលឱ្យមានការរឹតបន្តឹងលើលទ្ធភាពទទួលបានសាច់ប្រាក់នៅឆ្នាំ២០២០។​

ជាលទ្ធផល លទ្ធភាពទទួលបានឥណទានត្រូវបានកាត់បន្ថយ ហើយតម្រូវការអចលនទ្រព្យមានការថយចុះ ដោ​យសា​រតែសេដ្ឋកិច្ចក៏កំពុងធ្លាក់ចុះដូចគ្នា និងបញ្ហាកង្វះទំនុកចិត្តជាដើម។ ស្ថានភាពកាន់តែអាក្រក់ទៅ នៅពេលដែលក្រុមហ៊ុ​នអចលនទ្រព្យឈានមុខគេឈ្មោះថា Evergrande ស្ទើរតែក្ស័យធន បណ្តាលឱ្យអ្នកទិញខ្លាចរអា មិនហ៊ានទៅរកទិ​ញពីក្រុមហ៊ុនអភិវឌ្ឍន៍គម្រោងអចលនទ្រព្យដទៃទៀត។ ប៉ុន្តែនៅក្នុងខែនេះ ក្រុមហ៊ុន Evergrande បានចុះកិច្ចព្រ​ម​ព្រៀងរៀបចំរចនាសម្ព័ន្ធឡើងវិញជាមួយនឹងបណ្ដាម្ចាស់បំណុលអន្តរជាតិមួយចំនួន ដើម្បីគ្រប់គ្រងបំណុលដ៏ធំរបស់ពួ​កគេ ដែលការនេះអាចជាដំណើរវិវត្តទៅមុខដ៏វិជ្ជមានមួយ។​

គួរកត់សម្គាល់ថា នៅក្នុងប្រទេសចិន ផ្ទះថ្មី ឬខុនដូរថ្មីភាគច្រើន ត្រូវបានទិញមុនពេលការសាងសង់បានចាប់ផ្តើមទៅទៀត ហើយទីផ្សារអចលនទ្រព្យបានជួបប្រទះនឹងការធ្លាក់ចុះយ៉ាងខ្លាំងកាលពីឆ្នាំមុន ពោលគឺចំនួននៃការលក់បានធ្លា​ក់ចុះរហូតដល់ទៅ ២៤ភាគរយ។ ​ម៉្យាងទៀត ជំងឺរាតត្បាតកូវីដ១៩ បានធ្វើឱ្យអ្នកទិញជាច្រើនបានពន្យារពេលនៃការទិញដោយសារតែពួកគេជួបការលំបាកខ្លាំង។ វិស័យនេះក៏រងផលប៉ះពាល់ខ្លាំងផងដែរ នៅពេលដែលអ្នកទិញផ្ទះភាគច្រើនមិនព្រមបង់ប្រាក់ធនាគារ បន្ទាប់ពីម្ចាស់អភិវឌ្ឍន៍គម្រោងបានបញ្ឈប់ការសាងសង់ដោយសារតែខ្វះទុន។​

យោងតាមការវាយតម្លៃរបស់ទីភ្នាក់ងារ Fitch Ratings ទីផ្សារអចលនទ្រព្យចិនបានចាប់ផ្ដើមបង្ហាញពីសញ្ញាស្ថិរភាពឡើងវិញ បន្ទាប់ពីជួបការលំបាកខ្លាំងនៅប៉ុន្មានឆ្នាំចុងក្រោយនេះ។ ការិយាល័យស្ថិតិជាតិ (NBS) ក៏បានរាយការណ៍ពីការកើនឡើងនៃតម្លៃអចលនទ្រព្យនៅក្នុងទីក្រុងធំៗនៅទូទាំងប្រទេសចិន ក្នុងនោះទីក្រុងចំនួន ៦៤ ក្នុងចំណោមទីក្រុងចំនួន ៧០ មានការកើនឡើងតម្លៃមកវិញនៅក្នុងខែមីនានេះ បើធៀបទៅនឹងកាលពីខែកុម្ភៈ មានតែ ៥៥ ទីក្រុង និ​ងខែមករា ៣៦ ទីក្រុងប៉ុណ្ណោះដែលតម្លៃទីផ្សារមានការកើនឡើង។​

យោងតាមលោក Shehzad Qazi នាយកគ្រប់គ្រងនៃក្រុមហ៊ុន China Beige Book បានឱ្យដឹងថា «ការងើបឡើងវិញរបស់វិស័យអចលនទ្រព្យនៅប្រទេសចិន គឺជាសញ្ញាវិជ្ជមានមួយ»។ ទោះជាយ៉ាងណា លោក John Lam មកពីធនាគារ UBS បានព្យាករណ៍ថា «បើទោះបីជាអាចមានការស្ទុះងើបឡើងវិញក្នុងរយៈពេលពីរទៅបីខែចុងក្រោយនេះក៏ដោយ ប៉ុន្តែនិន្នាការធ្លាក់ចុះនៃចំនួនប្រជាជនចិន ដែលបានចាប់ផ្តើមនៅឆ្នាំ២០២២ នឹងក្លាយជាកត្តាថយចុះនៃតម្រូវការអចលនទ្រព្យក្នុងរយៈពេលយូរទៅខាងមុខ»។​

បន្ថែមលើនេះ លោក​ Shehzad Qazi បានយល់ឃើញថា បើទោះបីជាមានការស្ទុះងើបឡើងវិញជាបណ្ដោះអាសន្នក៏ដោយ ក៏យុគសម័យនៃការរីកចម្រើនយ៉ាងឆាប់រហ័សរបស់ឧស្សាហកម្មអចលនទ្រព្យនៅប្រទេសចិន ទំនងជាត្រូវបានបិទបញ្ចប់ហើយ។

​នៅក្នុងខែមីនាកន្លងទៅនេះ ចំនួនអគារថ្មីដែលចាប់ផ្តើមសាងសង់បានធ្លាក់ចុះ ២៩ ភាគរយ បន្ទាប់ពីបានធ្លាក់ចុះ ៩,៤ ភាគរយនៅក្នុងខែមករាដល់ខែកុម្ភៈ នេះបើយោងតាមតួលេខចុងក្រោយរបស់ការិយាល័យស្ថិតិជាតិ។ គ្រប់បណ្ដាម្ចាស់អ​ភិវឌ្ឍន៍គម្រោងទាំងអស់ មានការប្រុងប្រយ័ត្នខ្លាំង និងផ្តល់អាទិភាពដល់គម្រោងដែលមានស្រាប់ជាជាងបង្កើតគម្រោងថ្មី។ នេះបើយោងតាមសេដ្ឋវិទូ លោក Larry Hu។ ​

លោកបានព្រមានថា៖ «វិស័យនេះគឺស្ថិតក្នុងការកែលម្អ ប៉ុន្តែមិនទាន់រួចចេញពីវិបត្តិនៅឡើយទេ»។ លោកក៏បានព្រមានដែរថា ៖ «ទីក្រុងទាំងអស់នេះអាចជួបប្រទះនឹងលំហូរចេញនៃចំនួនប្រជាជននាពេលអនាគតទៀតផង»៕​

ប្រែសម្រួល៖ធា សុណា

ប្រភពព័ត៌មាន៖​ Signs of hope for China property market, but boom is over: Analysts