ភ្នំពេញ៖ ដោយមានចិត្ដស្រលាញ់និងខ្លាចបាត់បង់វត្ថុបុរាណផង លោក គឹម ឈៀន នាយកសាលាបឋមសិក្សាកោងយោង ដែលរស់នៅភូមិកោងយោង ឃុំយាង ស្រុកជាំក្សាន្ត ខេត្តព្រះវិហារ បានសម្រេចចិត្ដប្រគល់វត្ថុបុរាណជាកុលាលភាជន៍ចំនួនប្រាំពីរ និងឧបករណ៍ថ្មចំនួនពីរដុំជូន ដល់សារមន្ទីរធម្មជាតិសកលសម្ដេចតេជោ ហ៊ុន សែន ព្រះវិហារដើម្បីរក្សាការពារនិងអភិរក្សបន្ដ។

យោងតាមអាជ្ញាធរជាតិព្រះវិហារបានឱ្យដឹងថា កាលពីថ្ងៃទី២២ ខែមេសា លោក ម៉ក់ ឌឿង អនុប្រធាននាយកដ្ឋានស្រាវជ្រាវបណ្ដុះបណ្ដាល និងតម្កល់ឯកសារ ព្រមទាំងសហការី បានចុះទៅទទួលកុលាលភាជន៍ និងឧបករណ៍ថ្ម ពីលោក គឹម ឈៀន ដែលវត្ថុបុរាណទាំងនោះបានប្រទះឃើញ នៅពេលដែលកូនរបស់គាត់ភ្ជួរដីធ្វើចម្ការ ដែលមានចម្ងាយ៣គីឡូម៉ែត្រពីភូមិ។

អាជ្ញាធរជាតិព្រះវិហារ ក៏បានអំពាវនាវដល់ប្រជាពលរដ្ឋដែលរស់ក្នុង និងតំបន់ជុំវិញរមណីយដ្ឋានប្រាសាទព្រះវិហារ ពេលប្រទះឃើញ ឬក៏បានរក្សាទុកវត្ថុបុរាណនៅតាមផ្ទះ សូមរាយការណ៍ ឬប្រគល់ជូនអាជ្ញាធរជាតិព្រះវិហារ ដើម្បីយកមករក្សាទុកក្នុងសារមន្ទីរ ក្នុងគោលបំណងរក្សាការពារ អភិរក្សក៏ដូចជារៀបចំដាក់តាំងបង្ហាញ សម្រាប់សាធារៈជនទូទៅទស្សនា ស្វែងយល់ពីតម្លៃនៃប្រវត្តិសាស្រ្ត វប្បធម៌របស់ដូនតា។

ទាក់ទងនឹងការប្រគល់នេះ ឯកឧត្តម គង់ ពុទ្ធិការ អគ្គនាយកនៃអាជ្ញាធរជាតិព្រះវិហារ ប្រាប់ឱ្យដឹងនៅថ្ងៃទី២៤ ខែមេសា នេះថា បច្ចុប្បន្ននេះ កុលាលភាជន៍ចំនួនប្រាំពីរ និងឧបករណ៍ថ្មចំនួនពីរដុំត្រូវបានមន្ត្រីនៃសារមន្ទីរធម្មជាតិសកលសម្ដេចតេជោ ហ៊ុន សែន ព្រះវិហារ កំពុងជូត និងដុសលាងសម្អាត ។ យើងមិនទាន់បានកំណត់ថា បានបង្កើតឡើងនៅឆ្នាំ ឬមកពីតំបន់ណានៅឡើយទេ។

ឯកឧត្តមបន្តថា ក្រោយពីបានសម្អាតរួចហើយ ក្រុមមន្ត្រីជំនាញនឹងធ្វើការសិក្សា កុលាលភាជន៍ចំនួនប្រាំពីរ និងឧបករណ៍ថ្មចំនួនពីរដុំនោះថាត្រូវបានធ្វើឡើងនៅពេលណាឱ្យប្រាកដ និងបានសិក្សាឱ្យបានស៊ីជម្រៅលើយុគសម័យកាលរបស់កម្ពុជា។

ឯកឧត្តម គង់ ពុទ្ធិការ បានបញ្ជាក់ថា ៖ «វត្ថុបុរាណទាំងនេះ ពិតជាមានសារៈសំខាន់ សម្រាប់អាជ្ញាធរជាតិព្រះវិហារ ក្នុងការប្រមូលយកមករក្សាទុក និងការការពារឱ្យមានសុវត្ថិភាព ព្រោះជាសម្បតិ្តវប្បធម៌មរតករបស់ជាតិ»។ការប្រគល់កុលភាជន៍នេះ បានន័យថា ប្រជាពលរដ្ឋបានទុកចិត្តទៅលើអាជ្ញាធរជាតិព្រះវិហារដែលមានការយកចិត្តទុកដាក់ពីសារៈសំខាន់វត្ថុបុរាណ ទើបពួកគាត់សុខចិត្តប្រគល់មកឱ្យអាជ្ញាធរមើលការថែមទាំ។ ការណ៍នេះដោយសារយើងធ្វើការផ្សព្វផ្សាយទៅដល់សហគមន៍ពីសារៈប្រយោជន៍នៃវត្ថុបុរាណអស់រយៈជាង១០ឆ្នាំកន្លងមកនេះ។

បើតាមអគ្គនាយកនៃអាជ្ញាធរជាតិព្រះវិហាររូបនេះបានឱ្យដឹងថា កន្លងមកក៏ធ្លាប់មានប្រជាពលរដ្ឋដែលរស់នៅក្នុងតំបន់ប្រាសាទព្រះវិហារ និងប្រជាពលរដ្ឋដែលរស់នៅតំបន់ជុំវិញបានប្រទះឃើញវត្ថុបុរាណ ហើយយកមកឱ្យអាជ្ញាធរជាតិព្រះវិហាររក្សា និងថែទាំជាច្រើនផងដែរ។ក្នុងនោះមានវត្ថុបុរាណធ្វើពីលោហៈ ដីដុត សេរាម៉ិច និងឈើជាដើម៕ ដោយ៖ គឹម យុត្ថារ៉ូ