រដ្ឋមន្ត្រីការបរទេសរុស្ស៊ី រងការរិះគន់ឥតសំចៃមាត់ក្នុងកិច្ចប្រជុំអ.ស.ប ជុំវិញបញ្ហាអ៊ុយក្រែន
អ.ស.ប៖ អ្នកតំណាងមកពីបណ្តាប្រទេសលោកខាងលិចដែលជាសម្ព័ន្ធមិត្តក្រុងកៀវ និងប្រមុខអង្គការសហប្រជាជាតិបានរិះគន់ចំៗដោយឥតសំចៃមាត់លើរដ្ឋមន្ត្រីការបរទេសរុស្ស៊ីលោក Sergey Lavrov ដោយចោទប្រកាន់ក្រុងមូស្គូ ថាបានរំលោភលើធម្មនុញ្ញអង្គការសហប្រជាជាតិ(អ.ស.ប)ជុំវិញការឈ្លានពានអ៊ុយក្រែន។
ចំណែក លោក Lavrov បានឆ្លើយតបដោយការពារសកម្មភាពយោធារុស្ស៊ី និងចោទប្រកាន់សហរដ្ឋអាមេរិក និងសម្ព័ន្ធមិត្តរបស់មហាអំណាចរបស់ប្រទេសនេះថា ធ្វើឱ្យខូចផ្នែកការទូតពិភពលោក ដែលជាមូលដ្ឋានគ្រឹះរបស់ អ.ស.ប ដែលបង្កើតឡើងដើម្បីការពារសង្គ្រាមលោកលើកទី៣។
ការប្រកែកគ្នាតឹងសរសៃកទៅមកនេះធ្វើឡើងក្នុងពេលដែលលោក លោក Lavrov ធ្វើជាប្រធាននៃកិច្ចប្រជុំក្រុមប្រឹក្សាសន្តិសុខអ.ស.ប ទល់មុខគ្នាកាលពីថ្ងៃចន្ទ ស្ដីអំពី «ការថែរក្សាសន្តិភាព និងសន្តិសុខអន្តរជាតិ» ខណៈដែលបច្ចុប្បន្ន រុស្ស៊ីកាន់តំណែងជាប្រធានប្តូរវេននៃក្រុមប្រឹក្សានេះ។
ក្នុងកំណត់ត្រាមួយដាក់ទៅដល់រដ្ឋជាសមាជិកក្នុងកិច្ចប្រជុំ រុស្ស៊ីបានវាយប្រហារលើប្រព័ន្ធ «សណ្តាប់ធ្នាប់ពិភពលោកគ្មានប៉ូល» ដែលចូលជាធរមានក្រោយការបញ្ចប់សង្គ្រាមត្រជាក់ ដោយថាវា «បង្ហាញពីបញ្ហាប្រឈមដ៏ធ្ងន់ធ្ងរចំពោះប្រសិទ្ធភាព និងស្ថិរភាព នៃប្រព័ន្ធអង្គការសហប្រជាជាតិ»។
កំណត់ត្រាដដែលបានលើកឡើងទៀតថា៖ «សព្វថ្ងៃនេះពិភពលោកកំពុងប្រឈមមុខនឹងការផ្លាស់ប្តូរប្រព័ន្ធដ៏ស៊ីជម្រៅមួយទៀត។ ពោលគឺការធ្លាក់ចុះដោយឯងៗ និងយ៉ាងរហ័សនៃសណ្តាប់ធ្នាប់ពិភពលោកតែមួយ និងការលេចឡើងនៃប្រព័ន្ធពហុប៉ូលថ្មីមួយ»។
បន្ថែមពីលើនេះលោក Lavrov បាននិយាយមុនកិច្ចប្រជុំថា ប្រព័ន្ធអ.ស.ប កំពុងប្រឈមមុខនឹងនឹងវិបត្តិដ៏ជ្រៅ ហើយបានចោទប្រកាន់ប្រទេសលោកខាងលិច ជាពិសេសសហរដ្ឋអាមេរិក ថាជាអ្នកទទួលខុសត្រូវលើបញ្ហានេះ។
អ្នកការទូតកំពូលរបស់រុស្ស៊ី បានប្រាប់អ្នកយកព័ត៌មានថា បញ្ហាទាំងអស់ «មិនមែនមកពីអ៊ុយក្រែនទាំងស្រុងនោះទេ» ដោយបន្ថែមថា៖ «វាទាក់ទងទៅនឹងអំពីរបៀបដែលទំនាក់ទំនងអន្តរជាតិ នឹងបន្តចេញជារូបរាងតាមរយៈការបង្កើតការមូលមតិគ្នាដោយឈរលើមូលដ្ឋាននៃតុល្យភាពនៃផលប្រយោជន៍ ឬតាមរយៈការរីកចម្រើនដ៏ខ្លាំងក្លា និងការវឌ្ឍនភាពដែលប្រែប្រួលនៃអនុត្តរភាពរបស់ក្រុងវ៉ាស៊ីនតោន»។
ប្រតិកម្មទៅនឹងរុស្ស៊ីក្នុងអង្គប្រជុំ ឯកអគ្គរដ្ឋទូតអាមេរិកប្រចាំ អ.ស.បលោកស្រី Linda Thomas-Greenfield បានថ្លែងថា៖ «អ្នកដែលកោះហៅឱ្យយើងចូលប្រជុំដែលពោពេញដោយការលាក់ពុតនៅថ្ងៃនេះ ពោលគឺរុស្ស៊ី បានលុកលុយប្រទេសជិតខាងរបស់ខ្លួននៅអ៊ុយក្រែន ហើយបានវាយប្រហារចំបេះដូងនៃធម្មនុញ្ញអង្គការសហប្រជាជាតិ»។
លោកស្រី Thomas-Greenfield បន្តយ៉ាងដូច្នេះថា៖ «ពេលយើងអង្គុយនៅទីនេះ ការឈ្លានពាននៅតែបន្ត។ ពេលយើងអង្គុយនៅទីនេះ កងកម្លាំងរុស្ស៊ីបន្តសម្លាប់ជនស៊ីវិល។ ពេលយើងអង្គុយនៅទីនេះ កងកម្លាំងរុស្ស៊ីកំពុងបំផ្លាញហេដ្ឋារចនាសម្ព័ន្ធសំខាន់ៗរបស់អ៊ុយក្រែន។ ពេលយើងអង្គុយនៅទីនេះ យើងត្រៀមខ្លួនយើងសម្រាប់ក្រុងប៊ូឆាបន្ទាប់ ក្រុងម៉ារីអូប៉ូល បន្ទាប់ ក្រុងឃើរសុន បន្ទាប់ ឧក្រិដ្ឋកម្មសង្គ្រាមបន្ទាប់ និងភាពសាហាវយង់ឃ្នងបន្ទាប់»។
ចំណែកឯឯកអគ្គរដ្ឋទូតអង់គ្លេសប្រចាំអ.ស.ប លោកស្រី Barbara Woodward វិញ បានលើកឡើងថា ពិភពលោកបានឃើញនូវអ្វីដែលរុស្ស៊ីចាត់ទុកថាពហុភាគីនិយមមានន័យសម្រាប់ពិភពលោក នោះគឺការជាន់ឈ្លីធម្មនុញ្ញរបស់អ.ស.បនិងសង្រ្គាមដែលនាំមកនូវការឈឺចាប់ដែលមិនអាចនឹកស្មានដល់ដល់អ៊ុយក្រែន និងគ្រោះមហន្តរាយដែលមិនអាចកាត់បន្ថយបានសម្រាប់រុស្ស៊ី។
មិនខុសពីគ្នានេះដែរឯកអគ្គរដ្ឋទូតសហភាពអឺរ៉ុប លោក Olof Skoog បាននិយាយថា៖ «តាមរយៈការរៀបចំការជជែកពិភាក្សានេះ រុស្ស៊ីកំពុងព្យាយាមបង្ហាញខ្លួនឯងថាជាអ្នកការពារធម្មនុញ្ញអង្គការសហប្រជាជាតិ និងពហុភាគីនិយម។ គ្មានអ្វីអាចលើសពីការពិតបាននោះទេ»។
លោក Skoog ដែលមានអ្នកតំណាងការទូតមកពីបណ្តាប្រទេសសហភាពអឺរ៉ុប ចំនួន ២៧ អង្គុយជុំវិញ បានថ្លែងទៀតថា៖ «ប្រសិនបើរុស្ស៊ីយកចិត្តទុកដាក់ចំពោះលទ្ធិពហុភាគីនិយមដែលមានប្រសិទ្ធភាពនោះ នោះគឺជាវិធីដំបូងដើម្បីបញ្ជាក់វា»។ លោកថ្លែងយ៉ាងដូច្នេះ ដោយសំដៅលើការទាមទារឱ្យរុស្ស៊ី «ដកកងទ័ពជាបន្ទាន់ពីអ៊ុយក្រែន» តាមសេចក្ដីសម្រេចក្នុងថ្ងៃគម្រប់ខួបមួយឆ្នាំនៃការឈ្លានពានរបស់រុស្ស៊ី ដែលមានការគាំទ្រយ៉ាងលើសលប់នៅមហាសន្និបាតអង្គការសហប្រជាជាតិកាលពីចុងខែកុម្ភៈ។
ទោះជាយ៉ាងណាក៏ដោយលោក Lavrov បានការពារអ្វីដែលទីក្រុងមូស្គូហៅថា «ប្រតិបត្តិការយោធាពិសេស» ដោយបញ្ជាក់ឡើងវិញនូវការចោទប្រកាន់ថា អ៊ុយក្រែនកំពុងលើកកម្ពស់ណាស៊ីនិយម និងរឹតត្បឹតលើភាសា និងវប្បធម៌រុស្ស៊ី ខណៈអង្គការណាតូពង្រីកខ្លួនទៅអ៊ុយក្រែន។
ជាមួយគ្នានេះលោក Lavrov បានរិះគន់យ៉ាងខ្លាំងចំពោះសកម្មភាពរបស់សមាជិកណាតូនៅប៉ាស៊ីហ្វិកខាងលិច ជាពិសេសសម្ព័ន្ធភាពរវាងអូស្ត្រាលី អង់គ្លេស និងសហរដ្ឋអាមេរិក និងការពង្រឹងទំនាក់ទំនងរបស់សហរដ្ឋអាមេរិកជាមួយប្រទេសជប៉ុន កូរ៉េខាងត្បូង និងបណ្តាប្រទេសអាស៊ីអាគ្នេយ៍មួយចំនួនផងដែរ។
អ្នកការទូតកំពូលរុស្ស៊ីដដែលសង្កត់ធ្ងន់ថា ពហុភាគីនិយមគឺជាផ្នែកសំខាន់នៃធម្មនុញ្ញអង្គការសហប្រជាជាតិ ហើយបានចោទប្រកាន់សហរដ្ឋអាមេរិកនិងសម្ព័ន្ធមិត្តជាថ្មីទៀតថាជាអ្នកបំផ្លាញសកលភាវូបនីយកម្ម»។ លោកថ្លែងថា លោកខាងលិចកំពុងលើកកម្ពស់ «បទបញ្ជាផ្អែកលើច្បាប់» ដែលគ្មាននរណាម្នាក់ធ្លាប់ឃើញ និងដែលរារាំងការចូលប្រើបច្ចេកវិទ្យាទំនើប និងសេវាកម្មហិរញ្ញវត្ថុ ដើម្បីដាក់ទណ្ឌកម្មប្រទេសដែលខ្លួនមិនយល់ស្របជាមួយ។
គួរបញ្ជាក់ថា លោកខាងលិចបានដាក់ទណ្ឌកម្មសេដ្ឋកិច្ចជាបន្តបន្ទាប់លើរុស្ស៊ីយ៉ាងធ្ងន់ធ្ងរ ដើម្បីឆ្លើយតបនឹងការឈ្លានពានអ៊ុយក្រែន ដែលចាប់ផ្ដើមនៅចុងខែកុម្ភៈឆ្នាំមុន។ ស្រដៀងនឹងអ្នកការទូតលោកខាងលិចដែរ អគ្គលេខាធិការអង្គការសហប្រជាជាតិ លោក អង់តូនីញូវ ហ្គូតទែរ៉េស ដែលអង្គុយនៅក្បែរលោក Lavrov ក្នុងកិច្ចប្រជុំ បានថ្កោលទោសការឈ្លានពានរបស់រុស្ស៊ីលើអ៊ុយក្រែនថាជា «ការរំលោភ» លើច្បាប់អន្តរជាតិ និងធម្មនុញ្ញអង្គការសហប្រជាជាតិ។ លោក ហ្គូតទែរ៉េស ថ្លែងថា សង្រ្គាមកំពុងបង្កឱ្យមានទុក្ខវេទនា និងការបំផ្លិចបំផ្លាញដ៏ធំដល់ប្រទេស និងប្រជាជនអ៊ុយក្រែន ហើយបង្កឱ្យមានផលប៉ះពាល់លើសេដ្ឋកិច្ចសកល ដែលដុនដាបរួចហើយដោយសារវិបត្តិកូវីដ។
ប្រមុខអ.ស.ប ព្រមានក្រុមប្រឹក្សាសន្តិសុខថា កិច្ចសហប្រតិបត្តិការជាសកលគឺស្ថិតនៅក្រោមភាពតានតឹងដ៏ខ្លាំងបំផុតចាប់តាំងពីការបង្កើតអ.ស.បនៅឆ្នាំ ១៩៤៥ ក្រោយសង្គ្រាមលោកលើកទី២ ដោយនិយាយបន្ថែមទៀតថា ភាពតានតឹងរវាងមហាអំណាចធំៗ និងហានិភ័យនៃជម្លោះផ្សេងៗ គឺស្ថិតក្នុង «កម្រិតខ្ពស់ជាប្រវត្តិសាស្ត្រ» ដោយលោកបានចង្អុលបង្ហាញមុនគេ និងសំខាន់បំផុត ទៅលើការឈ្លានពានអ៊ុយក្រែនរបស់រុស្ស៊ី ដែលកំពុងបន្ត។
បើតាមការរាយការណ៍របស់ទីភ្នាក់ងារសារព័ត៌មាន AP មានប្រទេសជាច្រើនបានចង្អុលបង្ហាញពីការប្រឈមមុខគ្នាកាន់តែខ្លាំងឡើងក្នុងចំណោមប្រទេសសមាជិករបស់អ.ស.ប ក្នុងកិច្ចប្រជុំកាលពីថ្ងៃចន្ទ។ ប្រទេសទាំងនោះ បានសង្កត់ធ្ងន់លើសារៈសំខាន់នៃការរក្សាពហុភាគីនិយម រួមទាំងការកែទម្រង់ក្រុមប្រឹក្សាសន្តិសុខ ដើម្បីឆ្លុះបញ្ចាំងពិភពលោកនៃសតវត្សរ៍ទី ២១ ជំនួសឱ្យរចនាសម្ព័ន្ធអំណាចក្រោយសង្គ្រាមលោកលើកទី២។
ឯកអគ្គរដ្ឋទូតចិនប្រចាំអ.ស.ប លោក Zhang Jun បានប្រាប់ក្រុមប្រឹក្សាក្នុងកិច្ចប្រជុំថា៖ «ពិភពលោកកំពុងឈរនៅផ្លូវបំបែកជាប្រវត្តិសាស្ត្រឥឡូវនេះ។ មនុស្សជាតិកំពុងប្រឈមមុខនឹងបញ្ហាសកលដែលមិនធ្លាប់មានពីមុនមក។ ទង្វើនៃអនុត្តរភាព និងការសម្លុតប្រទេសផ្សេងទៀត កំពុងបង្កគ្រោះថ្នាក់យ៉ាងធំធេងដល់ពិភពលោក។ នយោបាយកំពុងបង្កើតការបែកបាក់ និងការប្រឈមមុខដាក់គ្នាយ៉ាងធំ។ វាបានក្លាយជារឿងបន្ទាន់ និងសំខាន់ជាងមុន ក្នុងការរក្សាធម្មនុញ្ញរបស់អង្គការសហប្រជាជាតិ»៕
ប្រែសម្រួល៖ហួន ឌីណា
ប្រភព៖ UN chief and West berate Russia’s top diplomat over Ukraine https://apnews.com/article/russia-ukraine-un-charter-lavrov-05fd74f9df3e46a9e779efaee9f6147d?utm_source=homepage&utm_medium=TopNews&utm_campaign=position_04
https://www.channelnewsasia.com/world/ukraine-allies-denounce-cynical-russian-meeting-un-3440706
Russia’s Lavrov hosts UN meeting on ‘international peace,’ gets slammed by Western diplomats https://edition.cnn.com/2023/04/24/europe/russia-lavrov-un-meeting-intl/index.html
