រដ្ឋមន្រ្តីក្រសួងការងារ៖ ១១៨ប្រទេសកំពុងរួមគ្នាដោះស្រាយបញ្ហាប្រឈមទូទៅរបស់វិស័យអប់រំ និងការបណ្តុះបណ្តាលជំនាញបច្ចេកទេស
ភ្នំពេញ៖ កម្ពុជា រួមនឹងបណ្តាប្រទេសដែលមកពីជុំវិញពិភពលោកសរុបចំនួន១១៨ ប្រទេស កំពុងបើកកិច្ចពិភាក្សារួមគ្នាដើម្បីស្វែងរកដំណោះស្រាយពាក់ព័ន្ធនឹងបញ្ហាប្រឈមទូទៅរបស់វិស័យអប់រំ និងបណ្តុះបណ្តាលជំនាញបច្ចេកទេសឱ្យកាន់តែប្រសើរឡើងសំដៅរួមចំណែកអភិវឌ្ឍន៍សេដ្ឋកិច្ចប្រទេស ក៏ដូចជាពិភពលោក។នេះបើតាមការឱ្យដឹងពីក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី៩ ខែឧសភា ឆ្នាំ២០២៣។
ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលបានដឹកនាំគណៈប្រតិភូចូលរួមកិច្ចពិភក្សានេះបានឱ្យដឹងថា កិច្ចពិភាក្សារួមគ្នារកដំណោះស្រាយបញ្ហាប្រឈមទូទៅរបស់វិស័យអប់រំ និងបណ្តុះបណ្តាលជំនាញបច្ចេកទេសនេះ គឺត្រូវបានធ្វើឡើងតាមរយៈ វេទិកាអប់រំពិភពលោកលើកទី១៩ដែលបានក្រោមប្រធានបទ៖ ការបណ្តុះវប្បធម៌សិក្សា ការកសាងភាពធន និងការលើកកម្ពស់ចីរភាព សម្រាប់ការអប់រំកាន់តែប្រសើរឡើងប្រកបដោយភាពច្នៃប្រឌិត ភាពរឹងមាំ និងភាពក្លាហាន។
ឯកឧត្តមបន្តថា វេទិកានេះបានរៀបចំចាប់ពីថ្ងៃទី៧ដល់ថ្ងៃទី១០ ខែឧសភានៅមជ្ឈមណ្ឌលអេលីហ្សាប៊ែតទី២ ទីក្រុងឡុងដ៍ ចក្រភពអង់គ្លេស ហើយរៀបចំឡើងក្នុងគោលបំណងចែករំលែកបទពិសោធន៍ពាក់ព័ន្ធនឹងការអប់រំ ដើម្បីទទួលបានធាតុចូលសម្រាប់ការអភិវឌ្ឍគោលនយោបាយពាក់ព័ន្ធនឹងការអប់រំបណ្តុះបណ្តាលឱ្យមានភាពធន់ រួមទាំងមូលដ្ឋាននៃការសិក្សាកម្រិតដំបូង ការអភិវឌ្ឍជំនាញ និងការអភិវឌ្ឍបច្ចេកវិទ្យាថ្មីៗ។
វេទិកានេះ មានការចូលរួមពីតំណាងរាជរដ្ឋាភិបាល វិស័យឯកជន អ្នកជំនាញខាងអប់រំ និងបណ្តុះបណ្តាលជំនាញ និងដៃគូអភិវឌ្ឍន៍ មកពីបណ្តាប្រទេសជុំវិញពិភពលោកចំនួន១១៨ប្រទេស។
ឯកឧត្តមរដ្ឋមន្រ្តីបានឱ្យដឹងថា វេទិកានេះ ក៏ជាវេទិកានៃការប្រមូលផ្តុំរដ្ឋមន្ត្រីអប់រំ និងបណ្តុះបណ្តាលជំនាញបច្ចេកទេសដ៏ធំបំផុតក្នុងពិភពលោក ដើម្បីជជែកវែកញែកពីគោលនយោបាយអប់រំទៅថ្ងៃអនាគត ចែករំលែកបទពិសោធន៍ និងឧត្តមានុវត្តន៍ ក៏ដូចជាដើម្បីវាយតម្លៃ និងស្វែងរកដំណោះស្រាយចំពោះបញ្ហាប្រឈមទូទៅរបស់វិស័យអប់រំ និងបណ្តុះបណ្តាលជំនាញបច្ចេកទេស»។
ពាក់ព័ន្ធនឹងការរួមគ្នាដោះស្រាយបញ្ហាវិស័យអប់រំ និងបណ្តុះបណ្តាលជំនាញបច្ចេកទេសនេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលោក គិន ភា បានលើកឡើងថា ការរួមគ្នាដោះស្រាយ និងគិតគួរដល់ការកសាងធនធានមនុស្សលើជំនាញបច្ចេកទេសពីបណ្តារប្រទេសនៅលើពិភពលោក រួមទាំងកម្ពុជាផងនោះ គឺជារឿងសំខាន់បំផុតក្នុងការឈានឆ្ពោះទៅការអភិវឌ្ឍវិស័យបច្ចេកវិទ្យា និងការអភិវឌ្ឍសេដ្ឋកិច្ចសង្គមកម្ពុជា ក៏ដូចជាពិភពលោក។
លោកប្រាប់ឱ្យដឹងថា ៖ «ការបណ្តុះបណ្តាលបច្ចេកទេស និងវិជ្ជាជីវៈ បានដើរតួរយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ ហើយពលរដ្ឋដែលទទួលបានការបណ្តុះបណ្តាលលើជំនាញនេះកំពុងធ្វើការយ៉ាងសកម្មនៅតាមកន្លែងការងារ តែបើទោះបីជាយ៉ាងនេះក្តីពលរដ្ឋជាច្រើននូវពុំទាន់យល់ច្បាស់ពីសារសំខាន់នៃការបណ្តុះបណ្តាលនេះនៅឡើយទេ ហេតុនេះទាមទារឱ្យបណ្តារប្រទេសទាំងអស់ចាំបាច់ត្រូវគិតគូរពីបញ្ហានេះ»។
គួរបញ្ជាក់ថា វេទិកាអប់រំពិភពលោកលើកទី១៩ ដែលមានការចូលរួមពីប្រទេសចំនួន១១៨ នាពេលនេះ គឺត្រូវបានរៀបចំឡើងក្រោមការសហការគាំទ្រដោយក្រសួងអប់រំ ក្រសួងធុរកិច្ចនិងពាណិជ្ជកម្ម និងក្រសួងការបរទេសចក្រភពអង់គ្លេស និងក្រុមប្រឹក្សាជាតិអង់គ្លេស (British Council)។
តាមរយៈវេទិកានេះ ក្រៅពីបើកកិច្ចពិភាក្សារួមគ្នា អ្នកចូលរួមតំណាងឱ្យប្រទេសទាំងអស់ ក៏បានធ្វើការថ្លែងសុន្ទរកថា និងផ្លាស់ប្តូរគំនិតថ្នាក់រដ្ឋមន្ត្រី លើសពីនេះក៏មានការរៀបចំឱ្យមានការពិភាក្សាក្រៅផ្លូវការ និងឱកាសដើម្បីកសាងទំនាក់ទំនង (Networking) រវាងអ្នកចូលរួមទាំងអស់ផងដែរ៕
ដោយ៖សែម ពិសី
