សិប្បកម្មកែច្នៃដើមចេកធ្វើជាកាបូបកំពុងទទួលបានការចាប់អារម្មណ៍និងលើកកម្ពស់ជីវភាពប្រជាសហគមន៍
ភ្នំពេញ៖ តាមការពិតគ្រប់ចំណែកនៃដើមចេក មិនថា ជាផ្លែ ជាស្លឹក ជាផ្កាឬដើមរបស់វាក្តីសុទ្ធតែមានគុណប្រយោជន៍ ដែលគេនិយមយកមកច្នៃជាម្អូប អាហារ ហើយបច្ចុប្បន្ននេះគេថែមទាំងអាចយកដើមរបស់វាមកកែច្នៃទៅជារបស់ប្រើប្រាស់ដូចជាកាបូបបានទៀតផង។
កាបូបកែច្នៃដែលគេស្គាល់ភាគច្រើន កាបូបច្នៃចេញពីកំប្លោក ប៉ុន្តែយុវតីមួយរូបនៅខេត្តបាត់ដំបង អាចកែច្នៃកាបូបចេញពីដើមចេក ដែលធ្វើឱ្យមហាជនដែលនិយមប្រើប្រាស់កាបូបច្នៃមានការចាប់អារម្មណ៍ និងអាចវិវឌ្ឍន៍ទៅជាអាជីវកម្ម ហើយថែមទាំងបានរួមចំណែកលើកកម្ពស់ជីវភាពប្រជាសហគមន៍របស់ខ្លួន។
កញ្ញា ឆាប សុឃឿប ជាគ្រូបង្រៀន នៅវិទ្យាហ៊ុនសែនភ្នំសំពៅផង និងជាម្ចាស់សិប្បកម្ម «អនុសារតម្បាញចេកខ្មែរ» ផង បានប្រាប់ឲ្យដឹងថា ទោះបីកញ្ញាធ្វើជាគ្រូបង្រៀនពិតមែន ប៉ុន្តែកញ្ញាចិញ្ចឹមចិត្តចង់មានអាជីវកម្មផ្ទាល់ខ្លួនមួយផងដែរ ពោលគឺជាអាជីវកម្មដែលអាចជួយដល់សង្គមវិញបាន។
កញ្ញារៀបរាប់ថា ៖ «ខ្ញុំចេះតែចិញ្ចឹមចិត្តចង់មានអាជីវកម្ម ដល់មានពេលមួយប្អូនខ្ញុំដែលគាត់ចូលចិត្តច្នៃរបស់របរជុំវិញផ្ទះ គាត់ចេះច្នៃដើមចេកធ្វើកន្ត្រកទៅចម្ការ ចំពេលដែលគេល្បីរឿងច្នៃកំប្លោកទៅជាកាបូប ខ្ញុំក៏នឹកឃើញចង់ឲ្យគាត់ច្នៃជាកាបូបចេកទៅចូលរួមមង្គលការគេ ដល់ពេលយកទៅដល់ខ្ញុំថតបង្ហោះលេងក៏មានគេចាប់អារម្មណ៍ច្រើន ហើយខ្ញុំក៏ឲ្យប្អូនច្នៃមកខ្ញុំតុបតែងបន្ថែមលក់ឲ្យគេ»។
កញ្ញា សុឃឿប បន្តថ្លែងថា បន្ទាប់ពីហ្នឹងមក មានអ្នកកុម្ម៉ង់បន្តបន្ទាប់ ក៏មានគំនិតច្នៃជារបស់ផ្សេងៗបន្ថែម ហើយខ្ញុំក៏យល់ថាបើជ្រុលជាអញ្ចឹងក៏នឹកឃើញដាក់ឈ្មោះសិប្បកម្មនេះឱ្យស្រួលបួលតែម្តង ស្របពេលខ្ញុំក៏បានគំនិតចង់បង្កើតអាជីវកម្មស្រាប់។
ដោយសារចៃដន្យមានការរីកដាលមេរោគកូវីដ១៩ផ្ទុះឡើង ស្រាប់តែប្អូនរបស់កញ្ញា សុឃឿប លែងមានបំណងចង់បន្តទៀត តែកញ្ញាសោកស្ដាយដោយសារមានគេស្គាល់ហើយ គេចាប់អារម្មណ៍ច្រើន ក៏បន្តទៅរៀនច្នៃបន្ថែមជាមួយ C-Investment និងទទួលបានកញ្ចប់ជំនួយ ហើយក៏បន្តដំណើរការបន្តមករហូតដល់ឥឡូវនេះ។
កញ្ញា សុឃឿបថា បច្ចុប្បន្ននេះផលិតផលសំខាន់ៗ របស់ខ្លួនមាន ផលិតផលខ្សែយួរ និងស្រោមកែវកាហ្វេ និងកាបូបយួរដៃ ចំណែកឯផលិតផលផ្សេងទៀតក៏មានគេកុម្ម៉ង់ដែរ គ្រាន់តែមិនទាន់អាចផ្គត់ផ្គង់តម្រូវការទាំងនោះគ្រប់គ្រាន់។
កញ្ញា បន្តឱ្យដឹងទៀតថា កញ្ញាក៏មានការបើកទទួលការផ្គត់ផ្គង់ពីសមាជិក ឬប្រជាសហគមន៍នៅក្នុងភូមិរបស់ខ្លួនណាដែលគាត់អាចច្នៃបានផងដែរ ដើម្បីលើកកម្ពស់ជីវភាពរបស់ពួកគេ ដោយកញ្ញាមិនធ្វើដោយខ្លួនឯងទាំងស្រុងពេកនោះទេ។
កញ្ញា សុឃឿប បានឱ្យដឹងថា និយាយរួមសមាជិករបស់ខ្ញុំដែលពួកគាត់ភាគច្រើនជាស្ត្រីចំណាស់ដែលពុំមានការងារធ្វើ គឺពួកគាត់ធ្វើនៅតាមផ្ទះរៀងខ្លួន ហើយផ្គត់ផ្គង់មកខ្ញុំ បន្តមកទើបខ្ញុំតុបតែងបន្ថែមហើយដាក់លក់នៅផ្ទះរបស់ខ្ញុំនៅភ្នំសំពៅនេះ និងតាមអនឡាញ។
ដោយឡែកសម្រាប់បច្ចេកទេសកែច្នៃវិញ ទោះបីការកែច្នៃត្រូវការវត្ថុធាតុដើមដែលងាយស្វែងរក ប៉ុន្តែស្ថាបនិកនៃសិប្បកម្មកែច្នៃថ្មីមួយនេះ បានឱ្យដឹងថា ការផលិតមានផលវិបាកច្រើន និងត្រូវចំណាយពេលយូរ។
កញ្ញា សុឃឿប បញ្ជាក់ថា ផលវិបាកច្រើនណាស់ ដំបូងយើងត្រូវកាប់ដើមចេក ហើយត្រូវការពេលវេលាក្នុងការហាលវា និងអាស្រ័យលើអាកាសធាតុទៅទៀត បើសិនជាមេឃស្រទំៗនោះ ពណ៌ដើមចេកមិនសូវស្អាតទេ លុះពេលហាលស្ងួតហើយ យើងច្រៀកវាទៅតាមទំហំដែលយើងចង់ច្នៃ ឬត្បាញ និយាយរួមសម្រាប់កាបូបសម្រាប់ញុំាការមួយអាចត្រូវការពេលពីបីទៅប្រាំថ្ងៃឯណោះ។
ដ្បិតថាជាផលិតផលកែច្នៃពីរុក្ខជាតិក្តី តែកញ្ញាបញ្ជាក់ថា ផលិតផលទាំងនេះមានគុណភាព និងអាចប្រើប្រាស់បានដល់រាប់ឆ្នាំមិនចាញ់ផលិតផលផ្សេងៗដែលដាក់លក់នៅលើទីផ្សារនោះទេ។
កញ្ញាបញ្ជាក់ថា ៖ «និយាយរួមគឺអាចប្រើបានដល់ឆ្នាំ តែវាក៏អាស្រ័យទៅលើអ្នកប្រើប្រាស់ដែរ ក្នុងករណីដុះផ្សិតក៏ដោយ ធម្មតាផលិតផលធម្មជាតិចៀសមិនផុតពីរឿងនេះទេ តែបើអ្នកប្រើប្រាស់គាត់យល់ គាត់គ្រាន់តែយកទៅលាងទឹកទៅគឺអាចប្រើបានទៀតហើយ»។
ក្នុងនាមជាអ្នកកែច្នៃផលិតផលមួយរូប កញ្ញាក៏មានសំណូមពរដល់អ្នកប្រើប្រាស់បែបនេះថា ៖ «ខ្ញុំចង់ឲ្យបងប្អូន និងប្រជាពលរដ្ឋខ្មែរយើងទាំងអស់បើកចិត្ត ឲ្យតម្លៃផលិតផលធ្វើដោយដៃ ដោយសារទម្រាំបានផលិតផលមួយៗគឺយូរណាស់ និយាយរួមផលិតផលសិប្បកម្មខ្មែរពិបាកធ្វើ ចំណែកឯគុណភាពមិនងាយខូចដូចការគិតរបស់យើងទេ»។
មួយវិញទៀតប្រសិនបើពួកគាត់បើកចិត្តទូលាយគាំទ្រ កញ្ញាយល់ថាផលិតផលកែច្នៃខ្មែរនឹងរីកដុះដាលកាន់តែខ្លាំង និងរីកចម្រើន។
លើសពីនេះ កញ្ញា សុឃឿប ក៏បានឱ្យដឹងដែរថា កញ្ញាតែងតែនាំយកអាជីវកម្មរបស់នាងទៅចូលរួមជាមួយកម្មវិធីជំរុញផលិតផលខ្មែរ ឬកម្មវិធីជាតិផ្សេងទៀតផងដែរ។
គ្រូបង្រៀនដែលមានចិត្តចង់ជួយទៅដល់សហគមន៍តាមរយៈអាជីវកម្មរូបនេះ បានឲ្យដឹងទៀតថា កញ្ញាមានគម្រោងពង្រីកអាជីវកម្មរបស់នាងទៅជាហាងមួយនៅទីរួមខេត្តដែលលក់ផលិតផលកែច្នៃនេះ ទើបមានលទ្ធភាពពង្រីកសមាជិករបស់ខ្លួនឱ្យមានចំនួនច្រើនជាងមុន៕ ដោយ៖ស្រ៊ុន សិរីវឌ្ឍនៈ
