គណបក្សប្រឆាំងធំៗនាំមុខក្នុងការបោះឆ្នោតថ្នាក់ជាតិថៃ
ថៃ៖ លទ្ធផលបឋមក្រៅផ្លូវការរបស់គណៈកម្មាធិការរៀបចំការបោះឆ្នោតថៃ (ECT) គិតត្រឹមព្រឹកថ្ងៃទី១៥ ខែឧសភាបានបង្ហាញថា គណបក្សប្រឆាំងធំៗថៃរួមមានគណបក្ស Move Forward (MFP) របស់លោក ភីតា លីមចារ៉នរ៉ាត និងគណបក្សភឿថៃ របស់លោកស្រី ផែតងតាន ស៊ីណាវ៉ាត់ នាំមុខក្នុងការបោះឆ្នោតថ្នាក់ជាតិជ្រើសរើសសភាតំណាងរាស្រ្ត ៥០០ រូប កាលពីថ្ងៃអាទិត្យទី១៤ ខែឧសភា។
ក្នុងចំណោមសន្លឹកឆ្នោតប្រមាណជាង ៩៤ ភាគរយ ដែលរាប់រួចគណបក្ស MFP បាននាំមុខគេដោយទទួលបានការគាំទ្រ ១៥០ អាសនៈ ខណៈគណបក្សភឿថៃ បានទទួលការគាំទ្រ ១៤២ អាសនៈ។ គណបក្ស Bhumjaithai របស់លោកឧបនាយករដ្ឋមន្រ្ដីថៃ អនុទីន ចាន់វីរ៉ាក់គុល (Anutin Charnvirakul) ឈរនៅលំដាប់រៀងទី៣ ដោយទទួលបានការគាំទ្រ ៧០ អាសនៈ។
គណបក្សនិយមយោធា ផាឡាង ប្រាចារ៉ាត (Palang Pracharat) របស់លោកឧបនាយករដ្ឋមន្ត្រី ប្រាវីដ វង្សស៊ូវុន និងជាអតីតបក្សរបស់លោកនាយករដ្ឋមន្រ្តី ប្រាយុទ្ធ ចាន់អូចា ទទួលបានការគាំទ្រ ៤១ អាសនៈ ស្របពេលដែលគណបក្សបក្សបង្កើតថ្មីរបស់លោក ប្រាយុទ្ធ គឺបក្សថៃរួបរួមជាតិ ឈរនៅលំដាប់រៀងទី៥ ដោយទទួលបានសំឡេងគាំទ្រត្រឹមតែ ៣៦ អាសនៈប៉ុណ្ណោះ។
ទោះបីជាគណបក្សប្រឆាំងធំៗរបស់លោក ភីតា និងលោកស្រី ផែតងតាន នាំមុខគេឆ្ងាយលើការបោះឆ្នោតក៏ដោយ ក៏គណបក្សទាំង២នេះត្រូវការរួមដៃជាមួយគ្នា និងបង្កើតសម្ព័ន្ធភាពជាមួយគណបក្សតូចៗផ្សេងៗទៀត ដើម្បីបន្តបង្កើតរដ្ឋាភិបាលគ្រប់គ្រងប្រទេស។ ប៉ុន្តែឧបសគ្គគឺថា ក្រោមរដ្ឋធម្មនុញ្ញដែលរបបសឹកបានកែប្រែ លោក ភីតា ដែលនាំមុខគេក្នុងការបោះឆ្នោតនាពេលនេះ ត្រូវការការគាំទ្រយ៉ាងតិច ៣៧៦ សម្លេងពីសមាជិកសភាជាប់ឆ្នោត និងសមាជិកព្រឹទ្ធសភា ២៥០ នាក់ ដើម្បីក្លាយទៅជានាយករដ្ឋមន្រ្តីបន្ទាប់របស់ថៃ ខណៈសមាជិកព្រឹទ្ធសភាទាំងអស់សុទ្ធតែជាមនុស្សដែលក្រុមយោធាចាត់តាំង។
ទោះបីជាយ៉ាងនេះក៏ដោយ ជាមួយនឹងលទ្ធផលឆ្នោតបឋមសម្រេចបានហួសពីការរំពឹងទុក លោក ភីតា ដែលមានវ័យ ៤២ ឆ្នាំ បានសរសេរនៅលើបណ្ដាញសង្គមធ្វីតធ័រកាលពីយប់ថ្ងៃអាទិត្យថា លោកត្រៀមខ្លួនរួចជាស្រេចក្នុងការធ្វើជាមេដឹកនាំបន្ទាប់របស់ថៃ។
លោក ភីតា ដែលនៅតែអះអាងពីការបើកចំហរធ្វើការជាមួយគណបក្សភឿថៃ បានសរសេរបន្តយ៉ាងដូច្នេះថា៖ «យើងមានក្តីសុបិន និងក្តីសង្ឃឹមដូចគ្នា។ ហើយរួមគ្នា យើងជឿថាប្រទេសថៃជាទីស្រឡាញ់របស់យើងអាចកាន់តែប្រសើរឡើង ហើយការផ្លាស់ប្តូរអាចធ្វើទៅបានប្រសិនបើយើងចាប់ផ្តើមធ្វើនៅថ្ងៃនេះ»។
ចំណែកឯលោកស្រី ផែតងតាន វិញ បានផ្តល់ការអបអរសាទរដល់គណបក្ស MFP ចំពោះភាពជោគជ័យក្នុងការបោះឆ្នោត ដោយនិយាយថា គណបក្សដែលទទួលបានសំឡេងច្រើនជាងគេនឹងអាចដឹកនាំរដ្ឋាភិបាលបន្ទាប់។ លោកស្រីបានប្រាប់អ្នកយកព័ត៌មាននៅល្ងាចថ្ងៃអាទិត្យថា៖ «យើងត្រៀមខ្លួនរួចរាល់ហើយដើម្បីនិយាយគ្នាជាមួយគណបក្ស MFP ប៉ុន្តែយើងកំពុងរង់ចាំលទ្ធផលឆ្នោតផ្លូវការសិន»។ លោកស្រីបន្តទៀតថា៖ «ខ្ញុំសប្បាយចិត្តសម្រាប់ពួកគេ។ យើងអាចធ្វើការជាមួយគ្នា»។
ងាកទៅលោក ប្រាយុទ្ធ ឯណោះវិញបើទោះបីជាបក្សរបស់លោកទទួលបានសំឡេងគាំទ្រខ្សោយក្ដី នាយករដ្ឋមន្រ្តីរូបនេះ បានឱ្យដឹងថា លោកគោរពចំពោះលទ្ធផលបោះឆ្នោត។ លោកនិយាយប្រាប់អ្នកសារព័ត៌មាន ទាំងថ្លែងអំណរគុណដល់អ្នកគាំទ្ររបស់លោកកាលពីថ្ងៃអាទិត្យថា៖ «ខ្ញុំនឹងបន្តបំពេញកាតព្វកិច្ចរបស់ខ្ញុំឱ្យអស់ពីសមត្ថភាពក្នុងគ្រប់សមត្ថភាព ហើយលោកនឹងបន្តបម្រើជាតិ សាសនា និងព្រះមហាក្សត្រអស់មួយជីវិត»។ នេះបើតាមការស្រង់សម្ដីរបស់សារព័ត៌មានថៃ Thai PBS។
លោក ប្រាយុទ្ធ បានជូនពរដល់ប្រទេសឱ្យមានសន្តិភាព និងសណ្តាប់ធ្នាប់ ហើយបន្តថ្លែងយ៉ាងដូច្នេះថា៖ «ខ្ញុំគោរពដំណើរការប្រជាធិបតេយ្យ និងលទ្ធផលនៃការបោះឆ្នោត។
ជុំវិញលទ្ធផលនៃការបោះឆ្នោតថៃនាពេលនេះ អ្នកវិភាគនយោបាយបានហៅវាថាជាការកក្រើកនយោបាយ ដែលបង្ហាញពីការផ្លាស់ប្ដូរយ៉ាងសំខាន់នៃការគិតរបស់សាធារណៈ។ លោក Prajak Kongkirati អ្នកវិទ្យាសាស្ត្រនយោបាយមកពីសាកលវិទ្យាល័យ Thammasat បាននិយាយប្រាប់សារព័ត៌មាន BBC ថា៖ «សំឡេងភាគច្រើនឆ្លុះបញ្ចាំងពីតម្រូវការគេចចេញពី របបលោក ប្រាយុទ្ធ និងការចង់បានការផ្លាស់ប្តូរ»៕
ប្រែសម្រួល៖ហួន ឌីណា
ប្រភព៖ Thailand election results: Opposition trounces military parties
