ឡុងដ៍៖ សហជីពអង់គ្លេសបានធ្វើការតវ៉ា ខណៈសមាជិកសភាបោះឆ្នោតលើច្បាប់ដើម្បីរារាំងកូដកម្ម។

សហជីពអង់គ្លេសបានតវ៉ា នៅពេលដែលសមាជិកសភាត្រូវបានកំណត់ឱ្យបោះឆ្នោតលើសេចក្តីព្រាងច្បាប់ ដែលនឹងតម្រូវឱ្យវិជ្ជាជីវៈសហជីពផ្តល់កម្រិតអប្បបរមានៃសេវាកម្ម ក្នុងអំឡុងពេលកូដកម្ម នៅក្នុងសេវាសាធារណៈសំខាន់ៗ។

ច្បាប់ថ្មីនេះនឹងតម្រូវឱ្យមានកម្រិតអប្បបរមានៃសេវាកម្ម ក្នុងអំឡុងពេលដើរចេញដោយកម្មករផ្សេងៗ រួមទាំង បុគ្គលិកថែទាំសុខភាព អ្នកពន្លត់អគ្គីភ័យ និងបុគ្គលិកផ្លូវដែក។

ច្បាប់នេះត្រូវបានរៀបចំឡើង បន្ទាប់ពីមានការតវ៉ាជាច្រើនខែ ទាំងវិស័យឯកជន និងសាធារណៈ ដោយសារអតិផរណាខ្ពស់រាប់ទសវត្សរ៍ជំរុញឱ្យមានវិបត្តិតម្លៃរស់នៅដ៏អាក្រក់បំផុតប្រចាំជំនាន់ និងទាមទារឱ្យមានការដំឡើងប្រាក់ឈ្នួលយ៉ាងច្រើន។

រដ្ឋលេខាធិការក្រសួងពាណិជ្ជកម្មអង់គ្លេស លោក Grant Shapps បានប្រាប់សមាជិកសភា នៅពេលដែលលោកណែនាំច្បាប់នេះ នៅក្នុងសភាថា “យើងមិនចង់ប្រើច្បាប់នេះទេ ប៉ុន្តែយើងត្រូវតែធានាសុវត្ថិភាពសាធារណៈរបស់ចក្រភពអង់គ្លេស” ។

លោកបាននិយាយថា រដ្ឋាភិបាលនឹងពិគ្រោះយោបល់ “លើកម្រិតនៃការគ្របដណ្តប់គ្រប់គ្រាន់យ៉ាងដូចម្តេច” សម្រាប់អ្នកសង្គ្រោះបន្ទាន់ និងបុគ្គលិកផ្លូវដែក៕

ប្រភពពី AFP ប្រែសម្រួល៖ សារ៉ាត