ភ្នំពេញ៖ សម្ដេចតេជោ ហ៊ុន សែន និងជាប្រធានគណបក្សប្រជាជនកម្ពុជា (CPP) ផងនោះ បាន ធ្វើការវិភាគថា អ្វីដែលគណបក្សប្រឆាំង ចង់បាន គឺយកបរទេសមកគាបសង្កត់កម្ពុជា។ ក្នុងនោះដែរ សម្ដេច មិនជឿសោះឡើយថា គណបក្សប្រឆាំង បាត់ប្រកាសស្ដីពីការចុះឈ្មោះក្នុងបញ្ជីគណបក្សនយោបាយ នៅក្រសួងមហាផ្ទៃនោះឡើយ។

សម្ដេចបន្តថា ពិតហើយ គណបក្សខ្លះ ត្រូវបានគណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញ ទាត់ចោលមិនឲ្យចុះឈ្មោះ មានគណបក្ស ២ ក្នុងចំណោមគណបក្ស ២០ សំបុត្រកំណើតមួយសន្លឹក ខ្ញុំមិនជឿថា អានេះបាត់ទេ វានៅជាមួយអ្នកណាម្នាក់ ដែលជាមេដឹកនាំ គោលដៅរបស់គេដែលខ្ញុំវិភាគនៅកន្លែងនេះ គោលដៅរបស់គេ គេមិនចង់ឲ្យគណបក្សនេះចូលរួមបោះឆ្នោតទេ ដោយគេដឹងថា វាចាញ់ ប៉ុន្តែអ្វីដែលគេចង់បាន គឺគេចង់យកបរទេសមកគាបកម្ពុជាៗ។

ជាមួយនេះ សម្ដេចតេជោ នាយករដ្ឋមន្ត្រី ក៏បានអំពាវនាវដល់ប្រជាពលរដ្ឋ ក៏ដូចជាកម្មករ កម្មការិនី សូមទៅបោះឆ្នោតជ្រើសតាំងតំណាងរាស្រ្ដ នីតិកាលទី៧ ទាំងអស់គ្នា នៅថ្ងៃទី២៣ ខែកក្កដា ឆ្នាំ២០២៣ខាងមុខ ដើម្បីប្រើប្រាស់សិទ្ធិរបស់ខ្លួនជ្រើសរើសគណបក្សនយោបាយណា ដែលខ្លួនពេញចិត្ត។

សម្ដេចតេជោ ហ៊ុន សែន បានថ្លែងដូច្នេះក្នុងជំនួបសំណេះសំណាលជាមួយកម្មករ និយោជិត សរុបចំនួនជិត២ម៉ឺននាក់ ក្នុងតំបន់សេដ្ឋកិច្ចពិសេស រ៉ូយ៉ាល់ គ្រប់ ភ្នំពេញ នៅព្រឹកថ្ងៃទី ២៦ ខែឧសភា ឆ្នាំ២០២៣៕

អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ