ខាទុំ៖ កុមារកំព្រា ជិត៣០០នាក់ត្រូវបានជម្លៀស ចេញពីទីក្រុង ខាទុំ (Khartoum) ទៅកន្លែងផ្សេងទៀត ក្នុងប្រទេសស៊ូដង់ នេះបើតាមអង្គការសហប្រជាជាតិ។

Read. អ្នកនាំពាក្យអង្គការសហប្រជាជាតិបាននិយាយ កាលពីថ្ងៃព្រហស្បតិ៍ សប្តាហ៍នេះថា កុមារជិត ៣០០ នាក់ត្រូវបានជម្លៀសចេញពីរដ្ឋធានី ខាទុំ (Khartoum) របស់ប្រទេសស៊ូដង់ ទៅកាន់ទីតាំងដែលមានសុវត្ថិភាពជាង។

លោក Stephane Dujarric ប្រធានអ្នកនាំពាក្យរបស់ អគ្គលេខាធិការអង្គការសហប្រជាជាតិ បាននិយាយថា “គណៈកម្មាធិការអន្តរជាតិសម្រាប់កាកបាទក្រហមបានសម្របសម្រួលការជម្លៀសកុមារ និងអ្នកថែទាំរាប់សិបនាក់” ។ ពួកគេស្នាក់នៅក្នុងមណ្ឌលកុមារកំព្រា Mygoma ក្នុងទីក្រុង Khartoum។ យ៉ាងហោចណាស់កុមារ ៧០នាក់ត្រូវបានគេរាយការណ៍ថា បានស្លាប់នៅក្នុងទីក្រុង Mygoma ចាប់តាំងពីជម្លោះនៅក្នុងប្រទេសស៊ូដង់ បានចាប់ផ្តើមនៅថ្ងៃទី ១៥ ខែមេសា។

អ្នកនាំពាក្យរូបនេះបាននិយាយថា មូលនិធិកុមាររបស់អង្គការសហប្រជាជាតិ (UNICEF) គាំទ្រការថែទាំសុខភាព ការផ្តល់អាហារ និងតម្រូវការផ្សេងទៀតរបស់កុមារកំព្រា ខណៈដែលពួកគេស្ថិតនៅក្រោមការថែទាំរបស់ក្រសួងសុខុមាលភាពសង្គម និងក្រសួងសុខាភិបាល។ មូលនិធិនេះកំពុងធ្វើការជាមួយអាជ្ញាធរដើម្បីកំណត់អត្តសញ្ញាណគ្រួសារចិញ្ចឹមសម្រាប់កុមារ។

មូលនិធិនេះបាននិយាយថា កុមារជាង ១៣.៦ លាននាក់ត្រូវការជំនួយមនុស្សធម៌សង្គ្រោះជីវិតជាបន្ទាន់ ដែលជាចំនួនខ្ពស់បំផុតមិនធ្លាប់មានក្នុងប្រទេស។ ឥទ្ធិពលនៃអំពើហិង្សានៅតែបន្តគំរាមកំហែងដល់អនាគតរបស់គ្រួសារ និងកុមារ ដោយបន្សល់ទុកសេវាសំខាន់ៗត្រូវបានកាត់ផ្តាច់ និងកន្លែងសុខភាពជាច្រើនត្រូវបានបិទ ខូចខាត ឬបំផ្លាញចោល។

អង្គការយូនីសេហ្វកំពុងអំពាវនាវរកប្រាក់ចំនួន ៨៣៨ លានដុល្លារអាមេរិក ដើម្បីដោះស្រាយវិបត្តិ ដែលកើនឡើង ២៥៣ លានដុល្លារ។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិបាននិយាយថា ចាប់តាំងពីថ្ងៃទី ២១ ឧសភាមក យ៉ាងហោចណាស់រថយន្តចំនួន ១៨៨គ្រឿងដែលដឹកជំនួយបានទៅដល់រដ្ឋនានា ទូទាំងប្រទេសស៊ូដង់៕ ប្រភពពី Xinhua ប្រែសម្រួល៖ សារ៉ាត