កំពង់ចាម៖ សម្តេចតេជោ ហ៊ុន សែន បានប្រកាសថា ថ្ងៃក្រោយ កម្ពុជា អាចក្លាយទៅជាប្រទេសអធិរាជស្វាយចន្ទី ពីព្រោះកម្ពុជា មានអំណោយផលក្នុងការដាំដុះស្វាយចន្ទី ហើយស្វាយចន្ទី គឺមានតម្រូវការខ្ពស់លើទីផ្សារអន្តរជាតិ ខណៈកាលពីឆ្នាំ២០២២ កម្ពុជា ប្រមូលផលស្វាយចន្ទីបាន ១១៨០០០០ តោន។

សម្តេចតេជោ បានបញ្ជាក់ថា បច្ចុប្បន្ន រាជរដ្ឋាភិបាល បានធ្វើប្រតិភូកម្មទៅថ្នាក់មូលដ្ឋាន អាចមានសិទ្ធិធ្វើការវិយោគ ក្នុងដើមទុនរហូតទៅដល់ ៥លានដុល្លារ ដែលកត្តានេះ ជាផ្នែកមួយក្នុងការទាក់ទាញវិនិយោគលើវិស័យកសិកម្មរបស់កម្ពុជា ទៅដល់ប្រជាពលរដ្ឋដោយផ្ទាល់នៅថ្នាក់មូលដ្ឋាន។

សម្តេចតេជោ នាយករដ្ឋមន្ត្រី បានថ្លែងដូច្នេះ ក្នុងពិធីជួបសំណេះសំណាលជាមួយកម្មករ-កម្មការិនី ជិត២ម៉ឺននាក់ មកពីរោង ចក្រសហគ្រាសចំនួន៦ នៅរោងចក្រឡឺក្រោន ស៊ូ អ៊ិនដាសស្ត្រី (LECROWN SHOES INDUSTRY) ភូមិរវៀង ឃុំខ្នុរដំបង ស្រុកជើងព្រៃ ខេត្តកំពង់ចាម នាព្រឹកថ្ងៃទី១៦ ខែមិថុនា ឆ្នាំ២០២៣ ។

សូមជម្រាបថា យោងរបាយការណ៍របស់សមាគមស្វាយចន្ទីកម្ពុជា បានឲ្យដឹងថា ក្នុងឆ្នាំ២០២២ កម្ពុជា នាំចេញគ្រាប់ស្វាយចន្ទីឆៅទៅទីផ្សារអន្តជាតិមានចំនួន ៦៧ម៉ឺនតោន គិតជាទឹកប្រាក់មានចំនួន ១ ០៧៧លានដុល្លា ថយចុះ ៣៤.៦៥ភាគរយ។ ការថយចុះនេះដោយសារតែបញ្ហាប្រែប្រួលអាកាសធាតុ។

ដោយឡែក ក្នុងរយៈពេល៣ខែ ឆ្នាំ២០២៣នេះ សមាគមស្វាយចន្ទីកម្ពុជា បានបង្ហាញតួលេខថា កម្ពុជា ផលិតគ្រាប់ស្វាយចន្ទីស្រស់បាន ២៦ម៉ឺនតោន ខណៈការនាំទៅវៀតណាម មានចំនួនជាង ២៣ម៉ឺនតោន (២៣៣៥០តោន) ដោយគិតជាទឹកប្រាក់ប្រមាណ ៣២០លានដុល្លារ ថយចុះ ១២,៩៥% បើធៀបទៅនឹងរយៈពេលដូចគ្នាកាលពីឆ្នាំ២០២២។

សម្រាប់ការដាំដុះភាគច្រើនក្នុងខេត្តចំនួន១០ មានដូចជា៖ ខេត្តកំពង់ធំ ក្រចេះ កំពង់ចាម ព្រះវិហារ ត្បូងឃ្មុំ ជាដើម ៕ អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ