ប្រជាជនទុយនេស៊ី រាប់រយនាក់ ធ្វើបាតុកម្មទាមទារឱ្យដោះលែងអ្នកទោសនយោបាយ
ទុយនីស៖ ប្រជាជនទុយនេស៊ីដែលគាំទ្រសម្ព័ន្ធភាពគណបក្សប្រឆាំងរាប់រយនាក់ បានចេញធ្វើបាតុកម្មតវ៉ាកាលពីថ្ងៃអាទិត្យ ដើម្បីទាមទារឱ្យមានការដោះលែងអ្នកទោសនយោបាយប្រហែល ២០ នាក់ ដែលជាគូប្រជែងរបស់លោកប្រធានាធិបតី កាអ៊ីស សៃអ៊ីដ (Kais Saied)។ នេះបើតាមការចុះផ្សាយរបស់បណ្ដាញព័ត៌មាន Al Jazeera។
បាតុកម្មតវ៉ា ដែលធ្វើឡើងនៅរដ្ឋធានីទុយនីស ត្រូវបានរៀបចំដោយសម្ព័ន្ធភាពរបស់គណបក្សប្រឆាំង ដែលមានឈ្មោះថា រណសិរ្សសង្គ្រោះជាតិ ខណៈមានការដាក់ពង្រាយកងកម្លាំងសន្តិសុខជាច្រើនពីរដ្ឋាភិបាលទុយនេស៊ីផងដែរ។
ក្រុមបាតុករមានគ្នាប្រហែល៣០០ នាក់ ដោយភាគច្រើនកាន់រូបថតបុគ្គលដែលខ្លួនហៅថា «អ្នកទោសនយោបាយ» ដើម្បីសម្ដែងការគាំទ្រលើអតីតរដ្ឋមន្រ្តី ឥស្សរជនធុរកិច្ច និងបុគ្គលផ្សេងទៀត ដែលត្រូវបានអាជ្ញាធរចាប់ឃុំខ្លួនតាំងពីខែកុម្ភៈ។ ក្រុមបាតុករក៏បានលើកស្លាក និងបដារផ្សេងទៀត ដែលចោទប្រកាន់លោក សៃអ៊ីដ ថាជា ជនផ្ដាច់ការ និងបំផ្លិចបំផ្លាញប្រទេសផងដែរ។
ជុំវិញព្រឹត្តិការណ៍ចុងក្រោយនេះ គេមិនឃើញមានការបកស្រាយយ៉ាងណានៅឡើយទេ ពីរដ្ឋាភិបាលរបស់លោក សៃអ៊ីដ ដែលចាត់ទុកបុគ្គលដែលត្រូវបានចាប់ខ្លួនថាជា «ភេរវក» ពាក់ព័ន្ធនឹង «ការឃុបឃិតប្រឆាំងនឹងសន្តិសុខរដ្ឋ»។
គួរបញ្ជាក់ថា ទុយនេស៊ី គឺជាប្រទេសប្រជាធិបតេយ្យតែមួយគត់ដែលបានផុសចេញពីការបះបោរ «និទាឃរដូវអារ៉ាប់» ដែលរីករាលដាលក្នុងតំបន់កាលពីជាងមួយទសវត្សរ៍មុន។ ប៉ុន្តែក្នុងខែកក្កដា ឆ្នាំ ២០២២ លោក សៃអ៊ីដ បានបង្កក បន្ទាប់មករំលាយសភា ហើយធ្វើការកាន់អំណាចដោយក្រឹត្យ។
ក្នុងចំណោមអ្នកដែលត្រូវបានឃុំខ្លួននោះ មានលោក Rached Ghannouchi ដែលជាប្រធានគណបក្ស Ennahdha ដែលជាគណបក្សដ៏ធំបំផុតនៅក្នុងសភា មុនពេល លោក សាអ៊ីដ ចូលកាន់អំណាច។ កាលពីថ្ងៃសុក្រ មន្ត្រីប្រឆាំងភេរវកម្មបានសាកសួរលោក Ghannouchi រយៈពេល៣ម៉ោង ដែលជាផ្នែកមួយនៃការស៊ើបអង្កេតលើការអះអាងពីការរៀបចំ «ផែនការប្រឆាំងនឹងសន្តិសុខរដ្ឋ»។
លោក Ahmed Nejib Chebbi ដែលជាប្រធានរណសិរ្សសង្គ្រោះជាតិ បានប្រាប់ក្រុមបាតុករថា អ្នកទោសនយោបាយ «ត្រូវបានចាប់ដាក់ពន្ធនាគារដោយសារ តែពួកគេបានប្រើសិទ្ធិស្របច្បាប់របស់ពួកគេក្នុងការប្រឆាំង»៕
ដោយ៖ហួន ឌីណា
ប្រភព៖ Tunisia protesters demand release of ‘political prisoners’ https://www.aljazeera.com/news/2023/6/18/tunisia-protesters-demand-the-release-of-political-prisoners
