ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបាន​ថ្លែងឱ្យដឹងថា​ នៅអាណត្តិក្រោយពោលគឺនីតិកាលទី៧ នៃរដ្ឋសភា រដ្ឋាភិបាលគណបក្សប្រជាជនកម្ពុជា នឹងដាក់ចេញការអនុវត្តកម្មវិធីនយោបាយយុទ្ធសាស្រ្តបញ្ចកោណដែ​ល​មានមុំ៥ ក្រោយអនុវត្តយុទ្ធសាស្រ្តចតុកោណបាន ៤អាណត្តិរួចមក ដែលនឹងមានការបញ្ចូលធាតុថ្មីក្នុងន័​យទំនើបកម្មរដ្ឋាភិបាល និងការរីកចម្រើន។​

ការគូសបញ្ជាក់របស់សម្ដេចតេជោនាយករដ្ឋមន្ត្រីកម្ពុជានិងជាប្រមុខគណបក្សប្រជាជនកម្ពុជា​នេះ​ ធ្វើឡើងក្នុងពិធីប្រ​ជុំបូកសរុបរបាយការណ៍ប្រចាំអាណត្តិទី៦ របស់ក្រុមការងាររាជរដ្ឋាភិបាលចុះមូលដ្ឋាន នារសៀល​ថ្ងៃទី១៩ ខែមិថុនា ឆ្នាំ២០២៣។​

សម្ដេចតេជោ ហ៊ុន សែន មានប្រសាសន៍ថា រដ្ឋាភិបាលបានអនុវត្តកម្មវិធីនយោបាយនៃយុទ្ធសាស្រ្តចតុកោណដែ​លមានមុំ៤ បាន ៤ដំណាក់កាល ក្នុងរយៈពេល ៤អាណត្តិរួចមកហើយ។ ពោលគឺ ក្នុង ១អាណត្តិ អនុវត្ត ១ ដំណាក់កាល ហើយពេលខាងមុខនេះ​ ​នឹងប្តូរទៅជាយុទ្ធសាស្រ្តបញ្ចកោណ ដែលមានមុំ៥វិញ​។​

សម្ដេចតេជោមានប្រសាសន៍​​បញ្ជាក់ថា៖ «រាជរដ្ឋាភិបាល បាននិងកំពុងឈានទៅរៀបចំយុទ្ធសាស្រ្តបច្ចកោណដែ​លក្នុងនោះបានប្រមូលនូវធាតុទាំងឡាយដែលមានក្នុង​យុទ្ធសាស្រ្តចតុកោណ ជាមួយនឹងការបញ្ចូលធាតុថ្មី​បន្ថែមទៀត ដើម្បីឱ្យការដឹកនាំរដ្ឋាភិបាលកាន់តែមានប្រសិទ្ធភាព និងរីកចម្រើន»។​

 ​​ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា ​សមិទ្ធផលដែលរដ្ឋាភិបាល​សម្រេចបានជាមួយយុទ្ធសាស្រ្តចតុកោណទាំង ៤ អាណត្តិនោះ បានស្តែងឡើងនឹងភ្នែកជាក់ស្តែ​ងទាំងវិស័យកសិកម្ម ការកសាងហេដ្ឋារចនាសម្ព័ន្ធរូបវន្ត ការពង្រឹងវិស័យឯកជន និងកាងារ ព្រមទាំងការអភិវឌ្ឍធនធានមនុស្ស ដែលបានរីកចម្រើនគ្រប់វិស័យសម្រាប់ជីវភាពសង្គមកម្ពុជា។​

សម្រាប់មុំទាំង៥ នៃយុទ្ធសាស្រ្តបញ្ចកោណ អាណត្តិក្រោយនេះ ឯកឧត្តម សុខ ឥសាន ​មិនទាន់អាចប្រាប់​បាននៅឡើយទេ​ ដោយសារវាអាចប្រែប្រួលទៅតាមស្ថានភាព និងតម្រូវការជាក់ស្តែង ដែលរង់ចាំការចេញលទ្ធផលផ្លូវការពីគណបក្សប្រជាជនកម្ពុជា និងរាជរដ្ឋាភិបាលផ្ទាល់។​

ឯកឧត្តមសង្កត់ធ្ងន់ថា ៖ «ការដាក់យុទ្ធសាស្រ្តត្រីកោណ ចតុកោណ បញ្ចកោណជាដើមនេះ វាស្របទៅតាមតម្រូវការរបស់ប្រទេសជាតិ និងសំណូមពររបស់ប្រជាពលរដ្ឋ»។  

ចំណែកឯកឧត្តម ផៃ ស៊ីផាន អ្នកនាំពាក្យរដ្ឋាភិបាល បាន​ប្រាប់​ឱ្យដឹង​ដោយ​លោក​សរុបជារួមថា រដ្ឋាភិបាលបានសម្រេចគោលដៅយ៉ាងត្រចះត្រង់សំដៅការអភិវឌ្ឍសង្គមជាតិ លើកកម្ពស់ជីវភាពប្រជាជន កសាងហេដ្ឋារចនាសម្ព័ន្ធ អភិវឌ្ឍធនធានមនុស្ស ក្នុងយុទ្ធសាស្រ្តចតុកោណកន្លងទៅ។​

ឯកឧត្តមបាន​ថ្លែងថា សម្រាប់ទិសដៅបន្ទាប់ យោងតាមប្រសាសន៍រប​ស់លោកនាយករដ្ឋមន្ត្រីហ៊ុន សែន រដ្ឋាភិបាលនឹងគិតគូរបន្ថែមលើការបណ្តុះបណ្តាលធនធានមនុស្ស ជាពិសេសឲ្យសមស្របទៅតាមការវិវត្តនៃសា​​កលលោកលើផ្នែកបច្ចេកវិទ្យាឌីជីថល៕​ ដោយ៖សំបាន ច័ន្ទដារ៉ា