ភ្នំពេញ ៖ សម្តេចពិជ័យសេនា ទៀ បាញ់ ប្រធាន គណៈ កម្មាធិការជាតិ CAMSOC-CAMAPGOC បានថ្លែងនៅ ក្នុង ពិធីបូកស រុបការងារ ស៊ីហ្គេម-អាស៊ានប៉ារ៉ាហ្គេម និង ប្រគល់ប្រាក់រង្វាន់លើកទឹកចិត្តជូនគ្រូបង្វឹក គ្រូជំនួយ កីឡាករ កីឡាការិនី ទទួលបានជ័យលាភីក្នុងព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅទីស្តីការក្រសួងការពារជាតិ កាលពីថ្ងៃទី២៧ ខែ មិថុនាម្សិលមិញនេះថា ព្រឹត្តិការណ៍ SEA Games-ASEAN Para Games 2023 ដែលកម្ពុជាធ្វើជាម្ចាស់ផ្ទះ កម្ពុជាទទួលបានលទ្ធផលលើសពីការរំពឹងទុក ដែលប្រជាជនកម្ពុជាទាំងក្នុង និង ក្រៅប្រទេសមានអារម្មណ៍ភ្ញាក់ផ្អើលពីសមត្ថភាពដ៏ខ្លាំងចំពោះទេពកោសល្យដ៏ប៉ិនប្រសព្វនិងជំនាញវិជ្ជាជីវៈកីឡាដ៏គត់មត់ រួមជាមួយការបង្ហាញនូវអត្តចរិតសមរម្យ ឥរិយាបថ ថ្លៃថ្នូរ គោរពបទបញ្ជាការប្រកួត ក្រមសីលធម៌កីឡា គោលការណ៍លេងដោយយុត្តិធម៌របស់អត្តពលិកជាតិ។

សកម្មភាពទាំង នេះហើយ ទើបធ្វើឲ្យអត្តពលិកកម្ពុជា ដណ្តើមបានមេដាយមាស៨១ ប្រាក់ ៧៤ និងសំរឹទ្ធ១២៧ សរុបចំនួន២៨២គ្រឿង ដែលជាកំណត់ត្រាប្រវត្តិសាស្ត្រខ្ពស់ជាងគេបំផុតសម្រាប់កម្ពុជា ដោយបានឈរចំណាត់ថ្នាក់ទី៤ ក្នុងចំណោម១១ប្រទេស។ បើធៀបជាមួយលទ្ធផលបច្ចេកទេសនៅក្នុងស៊ីហ្គេមលើកទី៣១ ឆ្នាំ២០២២ នៅប្រទេសវៀតណាម គឺកម្ពុជាទទួលបានមេដាយមាស៩ ប្រាក់១៣ សំរឹទ្ធ៤១ សរុប ចំនួន៦៣ មេដាយប៉ុណ្ណោះ ឈរនៅចំណាត់ថ្នាក់ទី៨ ក្នុងចំណោម១១ប្រទេសចូលរួម។

សម្តេចពិជ័យសេនា ទៀ បាញ់ បានសង្កត់ធ្ងន់ទៀតថា ចំពោះអត្តពលិកមានពិការភាព ក៏បានបង្ហាញពីសមត្ថភាព ការតស៊ូ និង ទេពកោសល្យជំនាញកីឡា យ៉ាងប៉ិនប្រសព្វ ធ្វើឱ្យមហាជនកោតសរសើរ គោរពឱ្យតម្លៃគ្រប់ៗគ្នា។ ក្នុងនោះលទ្ធផលបច្ចេកទេសក៏បានទទួលលើសពីការគ្រោងទុក គឺមេដាយមាស៩ មេដាយប្រាក់១៩ និងមេដាយសំរឹទ្ធ៤៥ សរុបចំនួន៧៣មេដាយ ដែលកម្ពុជា ស្ថិតនៅចំណាត់ថ្នាក់លេខ៨ ក្នុងចំណោម១១ប្រទេសចូលរួម ពោល គឺបានកើនឡើងជាង ASEAN Para Games លើកទី១១ នៅប្រទេសឥណ្ឌូណេស៊ី ដោយពេលនោះ កម្ពុជាទទួលបានមេដាយមាស៧ ប្រាក់១០ សំរឹទ្ធ១១ សរុបចំនួន២៨ មេដាយប៉ុណ្ណោះ។

សម្តេចពិជ័យសេនា ទៀ បាញ់ បានបន្ដថា ស្នាដៃដែលទទួលបានពីការរៀបចំព្រឹត្តិការណ៍ជាប្រវត្តិសាស្ត្រនេះ បានធ្វើឱ្យកម្ពុជាលេចត្រដែតឡើងលើឆាកអន្តរជាតិ ពិសេសពិធីបើក-បិទដ៏ទាក់ទាញ ប្រកបដោយផ្ទាំងទស្សនីយភាពដ៏ល្អបានបង្ហាញថា កម្ពុជា មានភាពអច្ឆរិយៈមានអរិយធម៌ស៊ីវិល័យ សក្តិសមកិត្តិយសដ៏ខ្ពង់ខ្ពស់ស្ញប់ស្ញែងជាជាតិសាសន៍ដ៏ចំណាស់ និង សម្បូរបែបខាងវប្បធម៌ ផ្នត់គំនិត ទេពកោសល្យ បេះដូងសន្តិភាព និងការច្នៃប្រឌិតដ៏អស្ចារ្យ បានធ្វើឱ្យកម្ពុជាមានកេរ្តិ៍ឈ្មោះល្បីល្បាញលើឆាកអន្តរជាតិ និងពិភពលោក។

ជាអនុសាសន៍សម្រាប់គោលដៅបន្ទាប់ សម្តេចប្រធាន CAMSOC គូសបញ្ជាក់ ទៀតថា ឆ្លងតាមលទ្ធផលជាផ្លែផ្កានេះ បានរម្លឹកដល់ស្ថាប័នពាក់ព័ន្ធកីឡា ឱ្យបន្តយកចិត្តទុកដាក់ថែមទៀត ក្នុងការរៀបចំយុទ្ធសាស្ត្រវែងឆ្ងាយ សម្រាប់វិស័យកីឡា ទៅមុខទៀត ដោយកំណត់សមិទ្ធផល ដែលកើតចេញពី ព្រឹត្តិការណ៍ស៊ីហ្គេមនេះ ធ្វើជាបទពិសោធន៍សម្រាប់រៀបចំព្រឹត្តិការណ៍ផ្សេងៗទៀត ទាំងការងារ រដ្ឋបាល ពិធីការ ព័ត៌មាន សន្តិសុខ និងការធានា ពិសេសការរៀបចំកីឡាករ កីឡាការិនី ប្រកបដោយ គុណវុឌ្ឍិទៅចូលរួមប្រកួតកម្រិតតំបន់ និង អន្តរជាតិនាពេលខាងមុខ ក្នុងការត្រៀមដណ្តើមមេដាយមកជូនប្រទេសជាតិបន្តបន្ទាប់ទៀត ៕

ជាវ ចន្ធូ