មនុស្សរាប់ពាន់នាក់ប្រមូលផ្តុំគ្នានៅទូទាំងប្រទេសអូស្ត្រាលី ដើម្បីគាំទ្រកំណែទម្រង់សម្រាប់ជនជាតិដើមភាគតិច
កង់បេរ៉ា៖ មនុស្សរាប់ពាន់នាក់បានប្រមូលផ្តុំគ្នាកាលពីថ្ងៃអាទិត្យនៅក្នុងប្រទេសអូស្ត្រាលី ដើម្បីបង្ហាញការគាំទ្រយុទ្ធនាការមួយដែលទាមទារឱ្យមានកំណែទម្រង់សម្រាប់ជនជាតិដើមភាគតិចរបស់ប្រទេស មុនការបោះឆ្នោតប្រជាមតិនៅចុងឆ្នាំនេះ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ប្រជាមតិដែលទំនងនឹងធ្វើឡើងនៅចន្លោះខែតុលា និងខែធ្នូឆ្នាំនេះ នឹងសម្រេចលើការធ្វើវិសោធនកម្មរដ្ឋធម្មនុញ្ញ និងបង្កើតស្ថាប័នប្រឹក្សាមួយ ដែលមានឈ្មោះថា «សំឡេងជនជាតិដើមក្នុងសភា» ដើម្បីផ្តល់ឱ្យជនជាតិដើមភាគតិចដែលរួមមាន អម្បូរ Aboriginal និង Torres Strait Islander បង្ហាញយោបល់ដោយផ្ទាល់នៅក្នុងគោលនយោបាយណាដែលប៉ះពាល់ដល់ពួកគេ។
រដ្ឋាភិបាលឆ្វេងនិយមរបស់លលោកនាយករដ្ឋមន្ត្រី Anthony Albanese គាំទ្រកំណែទម្រង់បែបនេះ ខណៈដែលគណបក្សប្រឆាំងអភិរក្សនិយម គឺគណបក្សសេរីនិយមជាតិ ជំរុញឱ្យមានការបោះឆ្នោតប្រឆាំង។
ក្រុមប្រឹក្សាសេវាសង្គមរបស់អូស្ត្រាលី បានបង្ហោះរូបអ្នកចូលរួមប្រមូលផ្ដុំក្នុងទីក្រុងស៊ីដនី ដែលពាក់អាវយឺតសរសេរអក្សរ«បោះឆ្នោតគាំទ្រ» និងមួកកាតិបដែលមានសរសេរ «សេចក្តីថ្លែងការណ៍ Uluru» ដែលគេសំដៅលើឯកសារសំខាន់អំពាវនាវឱ្យមានសំឡេងជនជាតិដើមភាគតិច។
ក្រុម Yes23 ដែលជាអ្នករៀបចំការប្រមូលផ្ដុំចំនួន ២៥ ទូទាំងប្រទេសអូស្រ្តាលី បានប្រាប់រ៉យទ័រថា ហ្វូងមនុស្សនៅទីក្រុងស៊ីដនីមានប្រហែល ៣ ០០០ នាក់ ហើយរំពឹងថា មនុស្សសរុបប្រហែល ២៥ ០០០ នាក់ បានចូលរួមការប្រមូលផ្ដុំនេះនៅទូទាំងប្រទេស។
ប្រធានក្រុម Yes23 លោក Dean Parkin បាននិយាយក្នុងសេចក្តីថ្លែងការណ៍ថា៖ «ព្រឹត្តិការណ៍សហគមន៍ទាំងនេះ គឺជាឱកាសសម្រាប់មនុស្សក្នុងការជួបជុំគ្នា និងទទួលបានព័ត៌មានដ៏មានតម្លៃអំពីសារៈសំខាន់នៃការបោះឆ្នោតប្រជាមតិនៅចុងឆ្នាំនេះ»។
គួរបញ្ជាក់ថា ជនជាតិដើមភាគតិចអូស្ត្រាលី ដែលមានចំនួន ៣,៨ ភាគរយនៃចំនួនប្រជាជនសរុបរបស់ប្រទេស បានប្រឈមនឹងគុណវិបត្តិផ្សេងៗ រួមទាំងការរើសអើង សុខភាព និងការអប់រំមិនល្អ និងអត្រាជាប់ឃុំខ្ពស់៕
ប្រែសម្រួល៖ហួន ឌីណា
ប្រភព៖ Thousands rally across Australia in support of Indigenous reform https://www.reuters.com/world/asia-pacific/thousands-rally-across-australia-support-indigenous-reform-2023-07-02/
