ចិនដាក់ពាក្យបណ្ដឹងទៅបារាំង ក្រោយមានការវាយប្រហារលើឡានក្រុងដឹកអ្នកទេសចរចិនក្នុងកំលុងកុ ប្បកម្មនៅក្រុងម៉ារសី
ប៉ារីស៖ ការិយាល័យកិច្ចការកុងស៊ុលរបស់ចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា ស្ថានអគ្គកុងស៊ុលរបស់ប្រទេសចិនប្រចាំទីក្រុង ម៉ារសី(Marseille) បានដាក់ពាក្យបណ្ដឹងទៅលើអាជ្ញាធរបារាំង បន្ទាប់ពីមានការវាយប្រហារលើឡានក្រុងដឹកភ្ញៀវទេសចរជនជាតិចិន ក្នុងអំឡុងកុប្បកម្មនៅទីក្រុងភាគខាងត្បូងមួយនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
សេចក្តីថ្លែងការណ៍របស់ការិយាល័យបានឱ្យដឹងថា ពាក្យបណ្តឹងផ្លូវការរបស់អគ្គកុងស៊ុលបារាំង បានអំពាវនាវឱ្យប្រទេសបារាំងធានាសុវត្ថិភាពរបស់ពលរដ្ឋចិន និងទ្រព្យសម្បត្តិរបស់ពួកគេ។
បើយោងតាមការចុះផ្សាយរបស់ទូរទស្សន៍រដ្ឋចិនCCTV ឡានក្រុងដឹកភ្ញៀវទេសចរចិនរងការប្រហារដោយក្រុមកុប្បករដែលនាំគ្នាវាយកញ្ចក់រថយន្តក្រុងនោះកាលពីថ្ងៃព្រហស្បតិ៍ ដែលធ្វើឱ្យមានអ្នកខ្លះរងរបួសស្រាល។
សេចក្តីថ្លែងការណ៍របស់ការិយាល័យកុងស៊ុលបានបន្តថា ភ្ញៀវទេសចរចិនទាំងនោះបានចាកចេញពីប្រទេសបារាំងចាប់តាំងពីមានរឿងនោះកើតឡើង ខណៈអំពាវនាវឱ្យពលរដ្ឋចិនដែលនៅបារាំង ឬនឹងធ្វើដំណើរទៅប្រទេសនេះ មានការប្រុងប្រយ័ត្នខ្ពស់ ក្នុងបរិបទនាពេលនេះ។
ជុំវិញពាក្យបណ្ដឹងនេះ បារាំងមិនទាន់ចេញមុខបកស្រាយយ៉ាងណានោះទេ ខណៈកុប្បកម្មបាននិងកំពុងផ្ទុះឡើងនៅតាមបណ្ដាទីក្រុងនានារបស់បារាំង រួមទាំងក្រុងប៉ារីស ក្នុងរយៈពេលប៉ុន្មានថ្ងៃថ្មីៗនេះ ក្រោយប៉ូលីសបារាំងបានបាញ់សម្លាប់ក្មេងជំទង់ដែលមានខ្សែស្រឡាយពីអាហ្វ្រិកខាងជើងម្នាក់៕
ប្រែសម្រួល៖ហួន ឌីណា
ប្រភព៖ China complains to France after Chinese tourists hurt in Marseille riots https://www.channelnewsasia.com/world/china-complains-france-after-chinese-tourists-hurt-marseille-riots-3600916
