តើអ្នកដឹងទេ? ការឈ្នះការប្រកួតក្នុងពានរង្វាន់ UEFA Champions League ទទួលបានប្រាក់រង្វាន់លើកទឹកចិត្តយ៉ាងច្រើន ហើយបើឈ្នះគ្រប់ប្រកួតតាំងពីវគ្គចែកពូលរហូតដល់ឈ្នះពាន ប្រាក់រង្វាន់សរុបបានដល់ទៅ១០០លានដុល្លារឯណោះ។
នេះជាប្រាក់រង្វាន់ពីការឈ្នះឬស្មើការប្រកួត ដោយមិនទាន់បូកបញ្ចូលប្រាក់ចំណូលពីសិទ្ធិផ្សាយតាមទូរទស្សន៍នៅឡើយទេ។ ហើយក៏មិនទាន់រាប់បញ្ចូលប្រាក់រង្វាន់ពេលឈ្នះវគ្គជម្រុះតាំងពីជុំបឋមរហូតដល់ជុំទី៣ មុនលេងវគ្គចែកពូលនៅឡើយដែរ។
ដោយសារប្រាក់រង្វាន់និងប្រាក់ចំណូលពីសិទ្ធិផ្សាយយ៉ាងសន្ធឹកសន្ធាប់នេះហើយទើបក្លិបធំៗតែងតែដាក់គោលដៅយកកៅអី Champions League ឱ្យបានពីមួយរដូវកាលទៅមួយរដូវកាល។
ប៉ុន្តែពិតណាស់ថា ចំនួនប្រាក់រង្វាន់ដែលក្លិបនីមួយៗទទួលបាន អាស្រ័យលើចំនួនប្រកួតដែលពួកគេឈ្នះ និងវគ្គខ្ពស់ប៉ុនណាដែលពួកគេឡើងដល់។
សម្រាប់រដូវកាល២០២០-២១នេះ
ក្រុមលេងវគ្គជម្រុះបឋម (preliminary round) ទទួលបានប្រាក់រង្វាន់២៣០ ០០០អឺរ៉ូ (280428ដុល្លារ)។
ក្រុមលេងវគ្គជម្រុះជុំទី១ (First qualifying round) ទទួលបាន២៨០ ០០០អឺរ៉ូ (341391ដុល្លារ)។
ក្រុមលេងវគ្គជម្រុះជុំទី២ (Second qualifying round) ទទួលបាន៣៨០ ០០០អឺរ៉ូ (463316ដុល្លារ)។
នៅវគ្គជម្រុះជុំទី៣ (Third qualifying round) ក្រុមចាញ់ ទទួលបាន៤៨០ ០០០អឺរ៉ូ (585241ដុល្លារ)។
ក្រុមឈ្នះ play-off ឡើងចូលវគ្គចែកពូល ទទួលបាន១៥,២៥លានអឺរ៉ូ (18.59លានដុល្លារ)។
ពេលលេងវគ្គចែកពូល បើស្មើ១ប្រកួត ទទួលបាន៩០០ ០០០អឺរ៉ូ (1097328 ដុល្លារ), បើឈ្នះមួយប្រកួត ទទួលបាន២,៧លានអឺរ៉ូ (៣លានដុល្លារ)។
ឡើងដល់វគ្គ១៦ក្រុមចុងក្រោយ ទទួលបាន៩,៥លានអឺរ៉ូ (11.58លានដុល្លារ)។
ឡើងដល់វគ្គ៨ក្រុមចុងក្រោយ ទទួលបាន១០,៥លានអឺរ៉ូ (12.80លានដុល្លារ)។
ឡើងដល់ពាក់កណ្ដាលផ្ដាច់ព្រ័ត្រ ទទួលបាន១២លានអឺរ៉ូ (14.63លានដុល្លារ)។
ឡើងដល់វគ្គផ្ដាច់ព្រ័ត្រ អ្នកឈ្នះទទួលបាន១៩លានអឺរ៉ូ (23.17លានដុល្លារ) ខណៈអ្នកចាញ់ទទួលបាន១៥លានអឺរ៉ូ (18.29 លានដុល្លារ)។
ដូច្នេះ សរុបទៅ បើក្រុមមួយឈ្នះគ្រប់ប្រកួតតាំងពីវគ្គចែកពូល រួចឡើងរហូតដល់លើកពាន ពួកគេនឹងទទួលបានប្រាក់រង្វាន់សរុប៨២,៤៥លានអឺរ៉ូ (១០០លានដុល្លារ / ៧១លានផោន) ពី UEFA។
សម្រាប់ Manchester City កាលនៅវគ្គចែកពូល ពួកគេបានឈ្នះ៥លើកនិងស្មើ១លើក។ បូកទាំងលទ្ធផលក្នុងវគ្គ១៦ក្រុមចុងក្រោយ, វគ្គ៨ក្រុមចុងក្រោយ និងវគ្គពាក់កណ្ដាលផ្ដាច់ព្រ័ត្រទៀត មានន័យថាមកទល់ពេលនេះ Man City ទទួលបានប្រាក់រង្វាន់ជាង៦០លានអឺរ៉ូរួចទៅហើយ។
ចំណែក Chelsea វិញ កាលវគ្គចែកពូល ពួកគេបានឈ្នះ៤លើកនិងស្មើ២លើក។ បូកជាមួយលទ្ធផលក្នុងវគ្គ១៦ក្រុម, វគ្គ៨ក្រុម និងវគ្គ៤ក្រុមចុងក្រោយ ពួកគេទទួលបានប្រាក់រង្វាន់ក្រោម៦០លានអឺរ៉ូមកទល់ពេលនេះ។
ក្រុមទាំង២នឹងប្រកួតវគ្គផ្ដាច់ព្រ័ត្រនៅរាត្រីថ្ងៃទី២៩ខែឧសភាឆ្នាំ២០២១នេះ នៅ Porto ប្រទេសព័រទុយហ្គាល់ ត្រូវនឹងម៉ោង២រំលងអធ្រាត្រនៅកម្ពុជា។
សូមជម្រាបថា UEFA នឹងផ្ដល់លុយបន្ថែមទៀតដល់ក្លិបនានាសម្រាប់សិទ្ធិផ្សាយតាមទូរទស្សន៍ ហើយប្រាក់ទាំងនោះនឹងត្រូវបានបែងចែកយោងតាមទំហំទីផ្សារទូរទស្សន៍៕
