យុទ្ធនាការ Beyond the Games ធ្វើឡើងក្នុងគោលបំណងសំខាន់៣

សហភាពសហព័ន្ធយុវជនកម្ពុជា បានរៀបចំយុទ្ធនាការ Beyond the Games ដើម្បីបំផុសចលនាមហាជន ឲ្យបានយល់ដឹងបន្ថែមទៀត ពីមហាព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដែលកម្ពុជានឹងធ្វើម្ចាស់ផ្ទះជាលើកដំបូង។

ឯកឧត្តម សុខ សប្បាយណា ប្រធានប្រតិបត្តិនៃយុទ្ធនាការ Beyond the Games បានថ្លែងក្នុងពិធីបើកយុទ្ធនាការនេះថា Beyond the Games នឹងក្លាយជាយុទ្ធនាការមួយ ជាមួយយុទ្ធនាការរួមរបស់ព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលធ្វើឡើងក្នុងគោលបំណងសំខាន់ៗ ៣ រួមមាន៖

១- យកព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ដើម្បីលើកតម្កើងកម្ពុជា លើសពីកីឡា លើសពីស៊ីហ្គេម លើសពីអាស៊ានប៉ារ៉ាហ្គេម ប៉ុន្ដែលើកតម្កើងកម្ពុជាទាំងមូល តាមរយៈការបង្ហាញពីមុខមាត់ សុខសន្ដិភាព សមត្ថភាព ឧត្តមភាព និងសក្ដានុពលរបស់កម្ពុជា។

២- ផ្សារភ្ជាប់តម្លៃនៃការរៀបចំព្រឹត្តិការណ៍ស៊ីហ្គេម ជាមួយមោទកភាពនូវអ្វីដែលកម្ពុជាមាន ក្នុងនាមជាម្ចាស់ផ្ទះ និងរំលេចភាពសម្បូរសប្បាយ ការរីកចម្រើន វប្បធម៌ អរិយធម៌ និងមោទកភាពជាតិ ប្រកបដោយសុទិដ្ឋិនិយម ភាពជឿជាក់ និងក្ដីសង្ឃឹមចំពោះអនាគតកម្ពុជា។

៣-ជំរុញឲ្យសាធារណជនស្វែងយល់បន្ថែមទៀត ហើយបន្សល់នូវស្មារតី និងចងចាំនូវអនុស្សាវរីយ៍ល្អៗទាំងមុន អំឡុងពេល និងក្រោយព្រឹត្តិការណ៍។

គួរដឹងដែរថា កម្មវិធីបើកយុទ្ធនាការ Beyond the Games ត្រូវបានធ្វើឡើង នៅល្ងាចថ្ងៃទី៣០ ខែកញ្ញា ឆ្នាំ២០២២ នៅអាគារ The Kampus ដោយមានវត្តមានឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា រដ្ឋលេខាធិការ ថ្នាក់ដឹកនាំក្រសួង-ស្ថាប័ន មន្ដ្រីរាជការ ព្រឹទ្ធាចារ្យ សិល្បករ សិល្បការិនី ភ្ញៀវកិត្តិយស ពិសេសវត្តមានរបស់កីឡាករ-កីឡាការិនីជម្រើសជាតិកម្ពុជា សរុបប្រមាណ ៣០០នាក់ចូលរួម។

ជាមួយគ្នានេះ ឯកឧត្តម វ៉ាត់ ចំរើន អគ្គលេខាធិការ CAMSOC មានប្រសាសន៍ថា «ក្នុងនាមគណៈកម្មាធិការជាតិ CAMSOC យើងសូមចូលរួមអបអរសាទរ កោតសរសើរ និងវាយតម្លៃខ្ពស់ ចំពោះការរៀបចំបើកយុទ្ធនាការក្រៅពីកីឡា បានន័យថា លើសពីអ្វីដែលជាកីឡា ដែលជាកម្មវិធីមួយដ៏ពិសេស ដើម្បីគាំទ្រដល់ការបំផុសចលនាមហាជនទូទៅ ឲ្យជ្រូតជ្រាបបន្ថែម នូវការរៀបចំមហាព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម លើកដំបូង ដែលកម្ពុជាធ្វើម្ចាស់ផ្ទះ»។

ការរៀបចំយុទ្ធនាការនេះ គឺជាក្ដីសង្ឃឹម និងការជឿជាក់យ៉ាងមុតមាំ សម្រាប់ឆ្ពោះទៅរកគោលដៅ ដែលគណៈកម្មការរៀបចំ ចង់បាន ពិសេសក្រោមការដឹកនាំដ៏ឈ្លាសវៃ និងមានបទពិសោធន៍ខ្ពស់របស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា រហូតលេចចេញជាលទ្ធផល និងផ្លែផ្កា ដែលនឹងជួយសម្រាលការងារមួយចំនួនរបស់ CAMSOC ប្រកបដោយទំនុកចិត្ត និងប្រសិទ្ធភាព។ ឯកឧត្តមសង្ឃឹមថា យុទ្ធនាការនេះ នឹងក្លាយជាមេដែកមួយ ដើម្បីឆក់យកបេះដូងរបស់ប្រជាពលរដ្ឋទាំងអស់ ឲ្យចូលរួមកាន់តែសស្រាក់សស្រាំថែមទៀត៕

ព័ត៌មានជាប់ទាក់ទង

បណ្ដាញសង្គម

64,482FansLike
149FollowersFollow
22,800SubscribersSubscribe
- Advertisement -spot_img

ព័ត៌មានចុងក្រោយ