វត្តចំនួន ៦៤វត្ត ស្ថិតក្នុងស្រុកសន្ទុក ខេត្តកំពង់ធំ ទទួលបានទៀនព្រះវស្សា ទេយ្យវត្ថុ និងព្រមទាំងបច្ច័យ ក្នុងពិធីចូលវស្សា ឆ្នាំ២០២៣
(កំពង់ធំ)៖ វត្តចំនួន ៦៤វត្តស្ថិតក្នុងស្រុកសន្ទុក ខេត្តកំពង់ធំ ត្រូវបានលោកជំទាវ ខៀវ ស៊ីណា ជាចាន់តូ អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំ រួមនឹងក្រុមការងារ នាំយកទៀនព្រះវស្សា ទេយ្យវត្ថុ និងព្រមទាំងបច្ច័យ ទៅប្រគេនព្រះសង្ឃ ក្នុងពិធីចូលវស្សា នៅថ្ងៃទី៣០ ខែកក្កដា ឆ្នាំ២០២៣ ដែលចាប់ផ្ដើមចូលជាផ្លូវការនៅថ្ងៃពុធ ១រោច ខែទុតិយាសាឍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២ ខែសីហាឆ្នាំ២០២៣ ខណៈពិធីបុណ្យនេះ ត្រូវបានប្រជាជនកម្ពុជា គោរពប្រតិបត្តិជារៀងរាល់ឆ្នាំ តាមទំនៀមទម្លាប់ប្រពៃណីព្រះពុទ្ធសាសនា។
![](https://asset.ams.com.kh/central/media/2023/07/photo_2023-07-31_16-09-12-1024x576.jpg)
លោកជំទាវ ខៀវ ស៊ីណា ជា ចាន់តូ បានគោរពស្នើសុំដល់ព្រះសង្ឃតាមវត្តនីមួយៗ សូមបន្តគ្រប់គ្រងព្រះសង្ឃ និងវត្តអារាមឲ្យបានល្អ ដើម្បីឲ្យវិស័យព្រះពុទ្ធសាសនា ស្ថិតស្ថេរគង់វង្ស និងជាស្រែបុណ្យរបស់ប្រជាពុទ្ធបរិស័ទជានិច្ចនិរន្ត។ ដូចនេះ ព្រះសង្ឃ ត្រូវតែប្រតិបត្តិធ៌មវិន័យ និងគោរពតួនាទីជាសង្ឃឲ្យបានខ្ជាប់ខ្ជួនសក្តិសមស្របទៅនឹងការលើកស្ទួយរបស់រាជរដ្ឋាភិបាលកម្ពុជា ដែលបានចាត់ទុកព្រះពុទ្ធសាសនា ជាសាសនារបស់រដ្ឋ ។
![](https://asset.ams.com.kh/central/media/2023/07/photo_2023-07-31_16-09-15-1024x576.jpg)
លោកជំទាវក៏បានស្នើដល់បណ្ដាវត្តទាំងអស់ ត្រូវមានការរៀបចំវត្តអារាម ឲ្យមានរបៀបរៀបរយ ក្នុងនោះ រួមទាំងការធ្វើអនាម័យផងដែរ ព្រោះវាជាចំណែកធ្វើឲ្យវត្តមានបរិស្ថានល្អ និងមួយចំណែកទៀត ក៏ដើម្បីជួយដល់ការលើកកម្ពស់ព្រះសុខភាព របស់ព្រះសង្ឃ ឲ្យបានប្រសើរផងដែរ ៕
![](https://asset.ams.com.kh/central/media/2023/07/photo_2023-07-31_16-09-18-1024x576.jpg)
![](https://asset.ams.com.kh/central/media/2023/07/photo_2023-07-31_16-09-16-1024x576.jpg)
![](https://asset.ams.com.kh/central/media/2023/07/photo_2023-07-31_16-09-17-1024x576.jpg)
អត្ថបទ៖ វណ្ណលុក
រូបភាព៖ វ៉េង លីមហួត