មន្រ្តី៖ ការឈានទៅសម្រេចគោលដៅអភិវឌ្ឍជាតិ ទាមទារចាំបាច់ការថែទាំសុខភាពធនធានមនុស្ស
ភ្នំពេញ៖ អគ្គលេខាធិការគណៈកម្មាធិការអន្តរក្រសួងស្តីពីសុខភាពសិក្សា បានលើកឡើងថា ការឈានទៅសម្រេចគោលដៅអភិវឌ្ឍជាតិ ទាមទារចាំបាច់យកចិត្តទុកដាក់ទៅការថែទាំសុខភាពធនធានមនុស្ស ដើម្បីទទួលបានឱកាសប្រែក្លាយខ្លួនទៅជាមូលធនមនុស្សក្នុងគ្រួសារ សហគមន៍ និងជាតិប្រកបដោយសក្តានុពលភាព។
នេះជាការថ្លែងរបស់លោកជំទាវ សឿ សុជាតា អនុរដ្ឋលេខាធិការ និងជាប្រធាននៃអគ្គលេខាធិការគណៈកម្មាធិការអន្តរក្រសួងស្តីពីសុខភាពសិក្សា ក្នុងសិក្ខាសាលាផ្សព្វផ្សាយគោលនយោបាយជាតិស្តីពីសុខភាពសិក្សា និងបន្ស៊ីផែនការសកម្មភាពរបស់គ្រប់ស្ថាប័នចំណុះរដ្ឋបាលរាជធានីខេត្ត រយៈពេលពីរថ្ងៃ ពីថ្ងៃទី២ និងទី៣ ខែសីហា នាមន្ទីរអប់រំ យុវជន និងកីឡាខេត្តពោធិ៍សាត់។
លោកជំទាវ សឿ សុជាតា បានថ្លែងនាពិធីនោះថា ៖ «ការឈានទៅសម្រេចគោលដៅអភិវឌ្ឍជាតិ២០៣០ ក្លាយជាប្រទេសមានចំណូលមធ្យមកម្រិតខ្ពស់ និងជាប្រទេសអភិវឌ្ឍនាឆ្នាំ២០៥០ ទាមទារឱ្យយើងចាំបាច់យកចិត្តទុកដាក់ លើការថែទាំសុខភាពធនធានមនុស្ស ដោយធ្វើយ៉ាងណាឱ្យទទួលបានឱកាសប្រែក្លាយខ្លួនទៅជាមូលធនមនុស្សក្នុងគ្រួសារ សហគមន៍ និងជាតិប្រកបដោយសក្តានុពលភាព»។
លោកជំទាវបានបន្ថែមថា សុខភាពសិក្សា គឺមិនមែនសំដៅតែនៅក្នុងគ្រឹះស្ថានសិក្សាប៉ុណ្ណោះ តែគឺរួមទាំងកន្លែងធ្វើការ សហគមន៍ វត្តអារាម ផ្លូវថ្នល់ និងទីសាធារណៈផងដែរ។
សុខភាពរបស់ធនធានមនុស្សមានទំនាក់ទំនងឆ្លងឆ្លើយគ្នាទៅនឹងករណីផ្សេងៗ ដូចជា ចំណេះដឹងស្តីពីសុខភាពរបស់គ្រួសារសហគមន៍ សុវត្ថិភាពនិងសន្តិសុខក្នុងក្រុមគ្រួសារ សហគមន៍ សុវត្ថិភាពចំណីអាហារ ទឹក អាហារូបត្ថម្ភ និងសោភ័ណភាព បរិស្ថាន។ នេះបើតាមការបញ្ជាក់បន្ថែមពីលោកជំទាវ សឿ សុជាតា។
អនុប្រធានមន្ទីរអប់រំ យុវជន និងកីឡាខេត្តពោធិ៍សាត់ លោក ចាន់ នី ក៏បានលើកឡើងផងដែរថា ក្រោមការដឹកនាំរបស់ថ្នាក់ដឹកនាំក្រសួងអប់រំ យុវជន និងកីឡា មន្រ្តីអប់រំនៅទូទាំងខេត្តនេះ ដែលមានចំនួន ៤ ១៩០នាក់ ពិតជាបានខិតខំបំពេញការងារក្នុងវិជ្ជាជីវៈដោយស្មារតីទទួលខុសត្រូវខ្ពស់ ដែលបានធ្វើឱ្យគ្រឹះស្ថានសិក្សាសាធារណៈ និងឯកជន ៤៥៦ និងសិស្សប្រមាណពីរម៉ឺននាក់មានភាពកក់ក្តៅក្នុងដំណើរអភិវឌ្ឍខ្លួនក្លាយជាពលរដ្ឋល្អរបស់ជាតិ។
តាមរយៈក្រសួងអប់រំ យុវជន និងកីឡា លោក ងួន ប៉ោសេង អភិបាលរងខេត្តពោធិ៍សាត់ ដែលទទួលបន្ទុកការងារអប់រំ ក៏បានថ្លែងដែរថា គុណភាពចំណេះដឹង និងបំណិន អាចអភិវឌ្ឍដោយផ្អែកជាពិសេសលើការថែទាំសុខភាពរបស់សិស្ស៕ដោយ៖គឹម យុត្ថារ៉ូ
