ព្យុងយ៉ាង៖ ប្រមុខដឹកនាំកូរ៉េខាងជើងបានស្តីបន្ទោសមន្ត្រីរបស់ខ្លួនថា ខ្វះការទទួលខុសត្រូវ ក្នុងការឆ្លើយតប និងការពារការខូចខាតបង្កឡើងពីព្យុះត្រូពិច ដែលបានបោកបក់កាត់ឧបទ្វីបកូរ៉េកាលពីសប្តាហ៍មុន។

ព្យុះត្រូពិចខានុន ដែលបានវាយលុកប្រទេសជប៉ុន មុនពេលធ្វើដំណើរឆ្ពោះទៅកាន់ឧបទ្វីបកូរ៉េ បានរំកិលឆ្លងកាត់ប្រទេសកូរ៉េខាងជើងកាលពីព្រឹកថ្ងៃសុក្រសប្តាហ៍មុន ដោយនាំមកនូវភ្លៀងធ្លាក់យ៉ាងខ្លាំងមកលើភាគខាងត្បូង។ ទីភ្នាក់ងារសារព័ត៌មានកណ្តាលកូរ៉េ (KCNA) បានរាយការណ៍ថា នៅពេលចុះទស្សនកិច្ចដីស្រែលិចទឹកនៅតំបន់ Anbyon ភាគខាងកើតនៃប្រទេស មេដឹកនាំកូរ៉េខាងជើង លោក គីម ជុងអ៊ុន បាននិយាយថា តំបន់នេះបានទទួលរងការខូតខាតធ្ងន់ធ្ងរជាងតំបន់ផ្សេងទៀត ដោយសារមន្រ្តីក្នុងតំបន់ខ្វះការទទួលខុសត្រូវ។

ជាមួយគ្នានេះ លោក គីម ជុងអ៊ុន ក៏បានទៅទស្សនាបណ្តារោងចក្រយោធាសំខាន់ៗ រួមមានរោងចក្រផលិតមីស៊ីលផងដែរ។ បើតាមទីភ្នាក់ងារសារព័ត៌មាន KCNA លោក គីម បានសម្តែងការពេញចិត្តចំពោះការផ្តោតការងាររបស់រោងចក្រនេះ លើផលិតកម្មមីស៊ីល និងការពង្រីកសមត្ថភាពផលិតកម្ម ក្នុងពេលលោកចុះត្រួតពិនិត្យទីតាំងរោងចក្រកាលពីសប្តាហ៍មុន។

លោក គីម ក៏បានបង្ហាញគោលដៅសំខាន់មួយ ដើម្បីធ្វើឱ្យប្រសើរឡើងផលិតកម្មមីស៊ីល, សរសើរដំណើរការល្អនៃគ្រាប់កាំភ្លើងផ្លោង និងរថពាសដែក។ នេះគឺជាដំណើរចុះត្រួតពិនិត្យរោងចក្រយោធាចុងក្រោយមួយ ក្នុងចំណោមដំណើរទស្សនកិច្ចជាបន្តបន្ទាប់ ហើយលោក គីម តែងសង្កត់ធ្ងន់លើផលិតកម្មសព្វាវុធទ្រង់ទ្រាយធំ ចំពេលអាមេរិកចោទប្រកាន់កូរ៉េខាងជើងថា បានផ្គត់ផ្គង់សព្វាវុធដល់រុស្ស៊ី ដើម្បីធ្វើសង្គ្រាមនៅអ៊ុយក្រែន៕ ប្រភព៖ AFP ប្រែសម្រួលដោយ៖ ឈឹម ទីណា