វ៉ាស៊ីងតោន ឌីស៊ី៖ លោកប្រធានាធិបតីអាមេរិក Joe Biden កាលពីថ្ងៃអង្គារ សប្តាហ៍នេះ បានបង្ហាញពីការព្រួយបារម្ភលើការកើនឡើង នៃមហាសមុទ្រ ទាក់ទងនឹងព្យុះសង្ឃរា Idalia។

អំឡុងពេលជួបជាមួយប្រធានាធិបតីប្រទេសកូស្តារីកា លោក Rodrigo Chaves Robles លោក ប្រធានាធិបតីសហរដ្ឋអាមេរិក Joe Biden ប្រាប់អ្នកសារព័ត៌មានថា លោកបាននិយាយទៅកាន់អភិបាលរដ្ឋ Florida លោក Ron DeSantis នៅល្ងាចថ្ងៃច័ន្ទ សប្តាហ៍នេះ អំពីព្យុះសង្ឍរា Idalia ។

លោក Biden បាននិយាយនៅក្នុងការិយាល័យ Oval Office ថា «យើងព្រួយបារម្ភអំពីការកើនឡើង នៃមហាសមុទ្រ»។

មជ្ឈមណ្ឌលព្យុះសង្ឃរាជាតិអាមេរិក (NHC) បាននិយាយថា Idalia ដែលជាព្យុះប្រភេទទី ១ ដែលមានខ្យល់បក់ក្នុងល្បឿន ៨៥ ម៉ាយ ឬ ១៤០ គីឡូម៉ែត្រក្នុងមួយម៉ោង កំពុងបោកបក់ ចេញពីឆ្នេរសមុទ្រភាគនិរតីនៃរដ្ឋផ្លរីដា ដោយនាំមកនូវលក្ខខណ្ឌព្យុះត្រូពិច ទៅកាន់ប្រទេសគុយបា ភាគខាងលិច និងទឹកជំនន់នៅរដ្ឋធានី ហាវ៉ាណា របស់ប្រទសនេះ។

អាជ្ញាធរក្នុងរដ្ឋផ្លរីដាបានព្រមានថា ព្យុះនេះអាចពង្រឹងដល់កម្រិត “គ្រោះថ្នាក់ខ្លាំង” ហើយឈានទៅដល់ការបាក់ដីថែមទៀត។

គួររម្លឹកដែរថា មនុស្សជិត១៥០ នាក់បានស្លាប់ កាលពីឆ្នាំមុន នៅពេលដែលព្យុះសង្ឃរា Ian ដែលបានបោកបក់លើឆ្នេរសមុទ្រភាគខាងលិចនៃរដ្ឋផ្លរីដា ជាព្យុះប្រភេទទី ៤ ដ៏បំផ្លិចបំផ្លាញ ដោយនាំមកនូវការកើនឡើងនៃមហាសមុទ្រ និងខ្យល់បក់បោកយ៉ាងខ្លាំង ដែលបានបំផ្លាញស្ពាន និងបានបំផ្លិចបំផ្លាញអគារនានា៕ ប្រភពពី AFP ប្រែសម្រួល៖ សារ៉ាត