ភ្នំពេញ៖ ឯកឧត្តម គឹម ជីនព្យូ (Kim Jin-Pyo) ប្រធានរដ្ឋសភានៃសាធារណរដ្ឋកូរ៉េ បានអះអាងថា កូរ៉េ នឹងបន្តជួយជ្រោមជ្រែងកម្ពុជា ដើម្បីសម្រេចនូវគោលដៅជាយុទ្ធសាស្ត្រក្លាយជាប្រទេសមានចំណូលកម្រិតខ្ពស់ ឆ្នាំ២០៥០ ។នេះបើយោងតាមខ្លឹមសារនៃជំនួបសវនាការ រវាងសម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា ជាមួយឯកឧត្តម គឹម ជីនព្យូ (Kim Jin-Pyo) ប្រធានរដ្ឋសភារដ្ឋកូរ៉េកាលពីព្រឹកថ្ងៃទី០៨ ខែកញ្ញា ឆ្នាំ២០២៣ នៅវិមាន៧មករា ។

យោងតាមសេចក្តីប្រកាសព័ត៌មានរបស់គណបក្សប្រជាជនកម្ពុជាបានបញ្ជាក់ថា នៅក្នុងជំនួបនេះ សម្តេចតេជោ ហ៊ុន សែន មានប្រសាស​ន៍​ស្វាគមន៍យ៉ាងកក់ក្តៅចំពោះ ឯកឧត្តម គី ជីនព្យូ ដែលជាមិត្តចាស់ក្នុងដំណើរទស្សនកិច្ចផ្លូវការលើកទីមួយ ក្នុងនាមជាប្រធានរដ្ឋសភា សាធារណរដ្ឋកូរ៉េ។ ក្នុងនាមជាស្ថាបនិក នៃការតភ្ជាប់ឡើងវិញទំនាក់ទំនង កម្ពុជា-កូរ៉េ សម្តេចតេជោ ក៏បានថ្លែងអំណរគុណចំពោះ រដ្ឋសភា រដ្ឋាភិបាល និងប្រជាជនកូរ៉េ ជាពិសេស ឯកឧត្តម គឹម ជីនព្យូ ដែលបានរួមចំណែកក្នុងការដាក់ឱ្យដំណើរការនូវគម្រោងកិច្ច​សហប្រតិបត្តិ​ការ​​អភិវឌ្ឍសេដ្ឋកិច្ច តាមរយៈ ការផ្តល់ឥណទានកម្ចីសម្បទាន EDCF ចាប់តាំងពីឆ្នាំ២០០១។

សម្តេចតេជោ ហ៊ុន សែន ក៏បានលើកឡើងអំពីទំនាក់ទំនងល្អជាប្រវត្តិសាស្ត្រ និងថ្លែងអំណរគុណ ចំពោះ ភាគីមិត្ត ដែលបានជួយកម្ពុជា​ក្នុងគ្រា​លំបាក រួមទាំងការស្ដារសេដ្ឋកិច្ចសង្គមឡើងវិញ ក្រោយសង្គ្រាមស៊ីវិលអស់រយៈពេលជាយូរ។ ហេដ្ឋារចនាសម្ព័ន្ធ ផ្លូវថ្នល់ សាលា​បណ្តុះបណ្តាលបច្ចេកទេស ពិសេសស្ពានមិត្តភាពកម្ពុជា កូរ៉េដែលគ្រោងនឹងសាងសង់ ឆ្លងកាត់ទន្លេសាប និងទន្លេមេគង្គ គឺជានិមិត្តរូប នៃសាមគ្គីភាពដ៏អស្ចារ្យ។

ឯកឧត្តម គឹម ជីនព្យូ ក៏បានថ្លែងអំណរគុណចំពោះ សម្តេចតេជោ ហ៊ុន សែន និងប្រទេសកម្ពុជា ដែលតែងតែគាំទ្រភាគីកូរ៉េ នៅក្នុងការ​ធ្វើជាម្ចាស់ផ្ទះនៃពិព័រណ៍ពាណិជ្ជកម្មពិភពលោកនៅទីក្រុងបូសាន ឆ្នាំ២០៣០ ក៏ដូចជាការគាំទ្រការរៀបចំ ការប្រកួតបាល់ទាត់ពិភព​លោក(FIFA World Cup) ឆ្នាំ២០០២ផងដែរ។

ឯកឧត្តមប្រធានរដ្ឋសភា បានថ្លែងកោតសរសើរ សម្តេចតេជោ អំពីភាពដឹកនាំការទូតដ៏ឈ្លាសវ និងស្នើសុំឱ្យ សម្ដេចតេជោ បន្តចូលរួម​គិតគូរអំពីសន្តិភាពដ៏យូរអង្វែងនៅក្នុងតំបន់ និងពិភពលោក។ ឯកឧត្តមប្រធានរដ្ឋសភាក៏បានបញ្ជាក់ថា ភាគីកូរ៉េនឹងបន្តជួយជ្រោម​ជ្រែងភាគី​កម្ពុជា ដើម្បីសម្រេចនូវ គោលដៅជាយុទ្ធសាស្ត្រក្លាយជាប្រទេសមានចំណូលកម្រិតខ្ពស់ ឆ្នាំ២០៥០។

ភាគីទាំងពីរបានផ្តល់តម្លៃលើកិច្ចសហប្រតិបត្តិការ និងភាពជាដៃគូរជឿជាក់សម្រាប់កិច្ចសហ ប្រតិបត្តិការ អាស៊ាន-កូរ៉េនិងមេគង្គ-កូរ៉េ។ ភាគីទាំងពីរអបអរសាទរចំពោះសមិទ្ធផលរួម ដែលសម្រេចបានក្នុង ការអនុម័តកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ទោះក្នុងអំឡុងពេលនៃជំងឺរាតត្បាតកូវីដ-១៩ ក៏ដោយ។

ភាគីទាំងពីរនឹងជំរុញឱ្យរដ្ឋាភិបាលនៃប្រទេសទាំងពីរ បន្តកិច្ចសហប្រតិបត្តិការជិតស្និទ្ធ និង បង្កើតឡើងនូវសមិទ្ធផលថ្មីៗបន្ថែមទៀត ដើម្បីជាប្រយោជន៍ប្រជាជននៃប្រទេសទាំងពីរ៕

អត្ថបទ៖ វណ្ណលុក, រូបភាព៖ វ៉េង លីមហួត