សម្តេចកិត្តិសង្គហបណ្ឌិត ម៉ែន សំអន៖ មន្រ្តីបក្សគ្រប់រូប ត្រូវខិតខំកសាងខ្លួន គោរព ស្រឡាញ់ បម្រើប្រជាជន និងប្រទេសជាតិ
(កណ្តាល)៖ សម្តេចកិត្តិសង្គហបណ្ឌិត ម៉ែន សំអន តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា មានប្រសាសន៍ថា សម្តេចបានបន្តទៀតថា ការដឹកនាំល្អ ត្រូវគោរព និងអនុវត្តន៍ឱ្យបានត្រឹមត្រូវ របបធ្វើការងាររបស់គណបក្ស នោះគឺប្រជុំ សន្និបាត ចុះមូលដ្ឋាន ត្រួតពិនិត្យ រៀនសូត្រ រាយការណ៍ និងសុំយោបល់ ហើយត្រូវចងចាំថា សូមកុំមើលរំលងរបបមួយណាឱ្យសោះ ។
![](https://asset.ams.com.kh/central/media/2023/09/photo_2023-09-09_16-04-53-1024x754.jpg)
សម្តេចកិត្តិសង្គហបណ្ឌិត ម៉ែន សំអន បានមានប្រសាសន៍បែបនេះ ក្នុងពិធីប្រកាសតែងតាំង ឯកឧត្តម គង់ សោភ័ណ្ឌ អនុប្រធាន ទៅជាប្រធានគណបក្សខេត្តខេត្តកណ្តាល ជំនួស ឯកឧត្តម ម៉ៅ ភិរុណ ដែលត្រូវទៅបំពេញភារកិច្ចថ្មី ជាសមាជិករដ្ឋសភា នីតិកាលទី៧ ។
![](https://asset.ams.com.kh/central/media/2023/09/photo_2023-09-09_16-04-56-1024x682.jpg)
ក្នុងឱកាសនោះ សម្តេចកិត្តិសង្គហបណ្ឌិត បានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់អង្កពិធីទាំងមូលដោយក្តីនឹករលឹក និងបានថ្លែងអំណរគុណដល់សមាជិក សមាជិកាគណបក្សប្រជាជនកម្ពុជានៅទូទាំងប្រទេស ក៏ដូចជា ខេត្តកណ្តាល បានបោះឆ្នោតជូនគណបក្សប្រជាជនកម្ពុជាបានទទួលជ័យជំនះក្នុងការបោះឆ្នោតជ្រើសតាំងតំណាងរាស្ត្រអាណត្តទី ៧ នេះ និងបានលើកឡើងអំពីជោគជ័យ នៃបេសកកម្មរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ កម្ពុជា អញ្ជើញចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ នៅរដ្ឋធានីហ្សាការតា សាធារណរដ្ឋឥណ្ឌូនេស៊ី កាលពីថ្ងៃទី៤ ដល់ថ្ងៃទី៧ ខែកញ្ញា ឆ្នាំ២០២៣ ។
![](https://asset.ams.com.kh/central/media/2023/09/photo_2023-09-09_16-04-58-1024x682.jpg)
សម្តេចកិត្តិសង្គហបណ្ឌិត ក៏បានថ្លែងផ្តោតសំខាន់ទៅលើការដឹកនាំចំពោះមុខ ត្រូវក្តាប់ឱ្យជាប់នូវលក្ខន្តិកៈបក្ស កម្មវិធីនយោបាយ គោលការណ៍ គោលនយោបាយ និងសេចក្តីសម្រេចរបស់បក្ស ច្បាប់របស់រដ្ឋ ចាត់តាំងអនុវត្តន៍ឱ្យបានត្រឹមត្រូវ និងត្រូវប្រកាន់ភ្ជាប់ នូវគោលការណ៍ជាមូលដ្ឋាន សមូហភាពដឹកនាំ បុគ្គលទទួលខុសត្រូវ ភាគតិចគោរពភាគច្រើន។
![](https://asset.ams.com.kh/central/media/2023/09/photo_2023-09-09_16-05-00-1024x682.jpg)
សម្តេចបានអំពាវនាវឲ្យសមាជិក សមាជិកាទាំងអស់ត្រូវ ៖
១.ត្រូវផ្តោតការយកចិត្តទុកដាក់ បន្តអនុវត្តដំណើរការកែទម្រង់ដោយឆន្ទៈមុតស្រួច ត្រូវ ខិតខំកសាងខ្លួន គោរព ស្រឡាញ់ បម្រើ ប្រជាជន និង ប្រទេសជាតិដោយ ឥត លក្ខណ ,ស្រុះដៃគ្នា និង ធ្វើឲ្យកាន់តែមានប្រសិទ្ធភាពខ្ពស់ ប្រកាន់ភ្ជាប់នូវបាវនា “កែទម្រង់ខាងក្នុង បង្កើន មិត្តខាងក្រៅ ដោយស្មារតី ឯករាជ្យ និងអប់រំ ពង្រឹង ដល់មន្រ្តី ដឹកនាំ គណបក្សនៅគ្រប់ថ្នាក់ អនុវត្តតាម អភិក្រម “ ឆ្លុះកញ្ចក់ មុជទឹក ដុះក្អែល ព្យាបាល និងវៈកាត់” ។
![](https://asset.ams.com.kh/central/media/2023/09/photo_2023-09-09_16-04-54-1024x682.jpg)
២. រួមគ្នាអនុវត្តឲ្យបាននូវយុទ្ធសាស្រ្តបញ្ចុកោណដំណាក់កាលទី១ ដើម្បីសម្រេចឲ្យបានស្របតាមការវិវត្តរបស់ពិភពលោកបច្ចុប្បន្ន នៃការរីកចម្រើន បច្ចេកវិទ្យាឌីជីថល ដែលជាគោលនយោបាយរបស់គណបក្ស ប្រជាជនកម្ពុជា ក្នុងការកសាងប្រទេសចាប់ពីឆ្នាំ ២០២៣-២០២៨ បានដាក់ចេញក្នុងពេល យុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣កន្លងទៅនេះ ៕
ដោយ ហេង សម្បត្តិ + ថេត វិចិត្រ