មន្ត្រីបក្សកុម្មុយនីស្តចិនមកកម្ពុជា ដើម្បីពិភាក្សាពង្រឹងកិច្ចសហប្រតិបត្តិការប្រឆាំងអំពើពុករលួយអន្តរជាតិ
ភ្នំពេញ៖ គណៈប្រតិភូនៃគណៈកម្មការអធិការកិច្ចវិន័យនៃបក្សកុម្មុយនីស្តចិនប្រចាំខេត្តហឺណាន និងគណៈកម្មការត្រួតពិនិត្យកិច្ចការខេត្តហឺណានមកសិក្សាស្វែងយល់ ពិភាក្សា និងផ្លាស់ប្តូរបទពិសោធន៍ ព្រមទាំងពង្រឹងកិច្ចសហប្រតិបត្តិការជាមួយអង្គភាពប្រឆាំងអំពើពុករលួយ(អ.ប.ព.) របស់កម្ពុជា ពាក់ព័ន្ធការប្រយុទ្ធប្រឆាំងអំពើពុករលួយអន្តរជាតិ។
យោងតាមការផ្សព្វផ្សាយរបស់អ.ប.ព. តាមបណ្តាញសង្គមហ្វេសប៊ុកនាយប់ថ្ងៃទី១០ ខែកញ្ញា បានឱ្យដឹងថា ការពិភាក្សា និងពង្រឹងកិច្ចសហប្រតិបត្តិការនេះនៃស្ថាប័នទាំងពីរ ធ្វើឡើងតាមរយៈដំណើរទស្សនកិច្ចផ្លូវការរបស់មន្ត្រីគណបក្សកុម្មុយនីស្តចិន និងគណៈកម្មការត្រួតពិនិត្យកិច្ចការប្រចាំខេត្តហឺណាននៅកម្ពុជារយៈពេល ៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែកញ្ញា ឆ្នាំ២០២៣។
លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានប្រាប់ឱ្យដឹងថា ដំណើរទស្សនកិច្ចពីគណៈប្រតិភូចិនមកកាន់អ.ប.ព. លើកនេះ មានគោលដៅពង្រីកកិច្ចសហប្រតិបត្តិការរវាងប្រទេសទាំង២ និងរវាងខេត្តហឺណាន និងអ.ប.ព.។
លោកបន្តថា ប្រតិភូចិនមកស្វែងយល់ពីចំណុចសំខាន់ៗ ក្នុងនោះមាន ច្បាប់ប្រឆាំងអំពើរលួយរបស់កម្ពុជា និងពិសេសការប្រកាសទ្រព្យសម្បត្តិ និងបំណុល ព្រមទាំងពិភាក្សាលើកិច្ចសហប្រតិបត្តិការលើការប្រមូលត្រឡប់វិញនូវទ្រព្យជាផលនៃបទល្មើស និងការជួយគ្នាទៅវិញទៅមក លើទិដ្ឋភាពច្បាប់។
![](https://asset.ams.com.kh/central/media/2023/09/photo_2023-09-11_16-34-01-1024x639.jpg)
លោក សយ ច័ន្ទវិចិត្រ សង្កត់ធ្ងន់ថា ៖ «ទស្សកិច្ចរបស់គណៈប្រតិភូចិនក្នុងពេលនេះ មានសារៈសំខាន់ក្នុងការពង្រឹង និងពង្រីកបន្ថែមលើការងារប្រឆាំងអំពើពុករលួយ ខណៈកន្លងមកប្រទេសទាំង២ បានសហការគ្នាបានល្អតាមរយៈការជួយគ្នាលើផ្នែកច្បាប់ ការផ្លាស់ប្តូរទស្សនៈតាមអង្គភាពជំនាញ ការចែករំលែកបទពិសោធន៍ ការជួយស៊ើបអង្កេតមុខសញ្ញាជាដើម»។
បើតាមអង្គភាពប្រឆាំងអំពើពុករលួយបានឱ្យដឹងដែរថា នៅថ្ងៃទី១១ ខែកញ្ញា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានដឹកនាំមន្រ្តី ជួបពិភាក្សាទ្វេភាគីជាមួយគណៈប្រតិភូខេត្តហឺណានផងដែរ។
ឯកឧត្តមទេសរដ្ឋមន្ត្រី ឱម យ៉ិនទៀង បានមានប្រសាសន៍នាឱកាសនោះពីព័ត៌មានសង្ខេបអំពីអ.ប.ព., ប្រវត្តិបង្កើតច្បាប់ និងអង្គភាពប្រឆាំងអំពើពុករលួយ, រចនាសម្ព័ន្ធរបស់អង្គភាពប្រឆាំងអំពើពុករលួយរួមនឹងកិច្ចសហប្រតិបត្តិការជាមួយអន្តរជាតិនានាផងដែរ។
![](https://asset.ams.com.kh/central/media/2023/09/photo_2023-09-11_16-34-04-1024x715.jpg)
អ.ប.ព.បានបន្តថា ៖ «ឯកឧត្តមទេសរដ្ឋមន្ត្រី បានគាំទ្រចំពោះការសហប្រតិបត្តិការ និងការផ្លាស់ប្តូរបទពិសោធន៍ពីគ្នាទៅវិញទៅមក ត្រង់ទៅ ត្រង់មក រវាងគណៈកម្មការអធិការកិច្ចវិន័យខេត្តហឺណាន និងអ.ប.ព. ហើយនិងរីករាយឆ្លើយតបរាល់សំណូមពររបស់គណៈប្រតិភូ»។
នាជំនួបនោះដែរ លោកស្រី Qu Xiaoli សមាជិកគណៈកម្មាធិការអចិន្រ្តៃយ៍ នៃគណៈកម្មាធិការបក្សកុម្មុនិស្តចិន ខេត្តហឺណាន ក៏បានលើកឡើងដែរថា លោកស្រី និងគណៈប្រតិភូរីករាយដែលបានជួបជុំជាមួយលោក ឱម យិនទៀង និងសហការីនាពេលនេះ។
តាមរយៈអ.ប.ព. លោកស្រីមានប្រសាសន៍ថា ៖ «ទំនាក់ទំនង ចិន-កម្ពុជា មានចំណងមេត្រីរាប់ពាន់ឆ្នាំមកហើយ ហើយឆ្នាំនេះ ថ្នាក់ដឹកនាំទាំងពីរ គឺលោកប្រធានាធិបតី ហ្ស៊ី ជិនពីង និងសម្តេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ បានរំឭកពីមិត្តភាព ថាជាឆ្នាំមិត្តភាព ហើយការមកទស្សនកិច្ចរបស់គណៈកម្មការខេត្តហឺណាននៅ អ.ប.ព. លើកនេះ ក៏ជាឆ្នាំមិត្តភាពផងដែរ»។
![](https://asset.ams.com.kh/central/media/2023/09/photo_2023-09-11_16-34-03-1024x665.jpg)
ទាក់ទងនឹងការបំពេញទស្សនកិច្ចនេះដែរ លោក ប៉ិច ពីសី នាយកប្រតិបត្តិអង្គការតម្លាភាពកម្ពុជា (TIC) យល់ថា ទំនាក់ទំនង និងកិច្ចសហប្រិបត្តិការរវាងកម្ពុជា និងចិនលើកិច្ចការប្រយុទ្ធប្រឆាំងអំពើរលួយជារឿងល្អ ដោយសារមួយរយៈពេលចុងក្រោយនេះ ចិនកំពុងប្រើប្រយុទ្ធសាស្រ្តប្រឆាំងអំពើពុករលួយដើម្បីកំណែទម្រង់បក្សកុម្មុយនីស្តខ្លួនដែលអាចផ្តល់បទពិសោធន៍ល្អៗដល់កម្ពុជា ជាពិសេសអង្គភាព ACU យកមករៀនសូត្របន្ថែម។
បន្ថែមពីនេះបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ក៏បានលើកឡើងដែរដោយលោកចង់ឱ្យភាគីទាំងពីរ ធ្វើការពិភក្សាគ្នាស៊ីជម្រៅលើការប្រឆាំងអំពើពុករលួយ ជាពិសេសពាក់ព័ន្ធនឹងព័ត៌មានពីការលាងលុយកខ្វក់ ពីសំណាក់ក្រុមឧក្រិដ្ឋជនចិនចូលមកទឹកដីកម្ពុជា នារយៈពេលចុងក្រោយនេះដើ ម្បីលុបរូបភាពនយោបាយមិនល្អដល់ប្រទេសទាំង២ លើឆាកអន្តរជាតិ៕
![](https://asset.ams.com.kh/central/media/2023/09/photo_2023-09-11_16-34-02-1024x660.jpg)
ដោយ៖សំបាន ច័ន្ទដារ៉ា