ប្រជាជនថៃ ដាក់ការរំពឹងខ្ពស់ទៅលើគោលនយោបាយដឹកនាំប្រទេសរបស់រដ្ឋាភិបាលថ្មី
ថៃ៖ ក្រោយពីរដ្ឋាភិបាលថ្មីបានបញ្ចេញនូវគោលនយោបាយរបស់ខ្លួនកាលពីថ្ងៃចន្ទទី ១១ ខែកញ្ញា ប្រជាជនថៃបានដាក់ក្ដីរំពឹងយ៉ាងខ្ពស់ទៅលើការដោះស្រាយបញ្ហាប្រចាំថ្ងៃ ដែលប៉ះពាល់ដល់ការរស់នៅរបស់ ប្រជាជន។ ក្នុងនោះ វិស័យឯកជនបានស្នើឱ្យរដ្ឋាភិបាលចម្រុះដែលដឹកនាំដោយគណបក្សភឿថៃ បង្កើតកញ្ចប់ណាមួយ ដើម្បីជំរុញសេដ្ឋកិច្ច ជាពិសេសទាក់ទាញភ្ញៀវទេសចរបរទេសឱ្យកាន់តែខ្លាំងថែមទៀត។
លោកស្រី Thaniwan Koonmongkon ប្រធានសមាគមភោជនីយដ្ឋានថៃបាននិយាយថា លោកស្រីចង់ឱ្យរដ្ឋាភិបាលថ្មីគិតគូទៅលើការកាត់បន្ថយថ្លៃដើមនៃវត្ថុធាតុដើម ព្រមទាំងកាត់បន្ថយថ្លៃថាមពល ព្រោះថា កត្តាសំខាន់ៗទាំងពីរនេះហើយដែលរុញឱ្យផលិតផលសម្រេចឡើងថ្លៃ។
លោកស្រីបានបន្តថា ៖ «ការឡើងថ្លៃនៃសាំងតែមួយមុខ វាបានប៉ះពាល់ដល់ការដឹកជញ្ជូន ដូច្នេះហើយ បានជាភោជនីយដ្ឋានមួយចំនួនតម្លើងថ្លៃមុខម្ហូបរបស់ពួកគេបន្តិចបន្តួច ឬក៏ភោជនីយដ្ឋានខ្លះបានធ្វើយុ ទ្ធនាការបញ្ចុះតម្លៃ ដើម្បីបង្កើនការលក់ជាដើម»។
លោកស្រីក៏បានស្នើសុំឱ្យរដ្ឋាភិបាលគិតគូទៅលើការផ្ដល់សេវាឥណទានដែលមានការប្រាក់ទាប សម្រាប់អ្នកប្រកបអាជីវកម្មក្នុងវិស័យម្ហូបអាហារ ដែលលោកស្រីជឿជាក់ថា វិស័យនេះជាផ្នែកដ៏ធំ មួយក្នុងការទាក់ទាញទេសចរ។
ចំណែកលោក Sanga Ruangwattanakul ប្រធានសមាគមនៃអាជីវកម្មតាមដងផ្លូវ Khao San បានឱ្យដឹងដែរថា ទីភ្នាក់ងារទេសចរណ៍ទាំងអស់គួរតែធ្វើការរួមគ្នាដើម្បីទាក់ទាញអ្នកទេសចរមកបន្ថែម ជាពិសេសគួរតែពិនិត្យឡើងវិញនូវគោលនយោបាយដែលស្នើឡើងដោយរដ្ឋាភិបាលចំពោះការមិនយកថ្លៃទិដ្ឋាការទៅលើភ្ញៀវជនជាតិចិន។លោកបន្តថា ៖ «ភ្ញៀវទេសចរ ចិននៅតែត្រូវការបង់ថ្លៃទិដ្ឋាការ ប៉ុន្តែនៅក្នុងកម្រិតមួយទាប ព្រោះថា១ភាគ៤នៃភ្ញៀវទេសចរដែលចូលទៅទស្សនាប្រទេសថៃ គឺជាទេសចរចិន»។
ប្រធានសមាគមរូបនេះបានគូសបញ្ជាក់ថា ៖ «មុនពេលផ្ទុះជំងឺកូវីដ១៩ ភ្ញៀវទេសចរប្រមាណ ៤០ លាន នាក់បានចូលទៅទស្សនាប្រទេសថៃ ។ក្នុងនោះប្រមាណ ១១ លាននាក់ជាភ្ញៀវជនជាតិចិន។ សម្រាប់ឆ្នាំនេះ យើងរំពឹងថាទទួលភ្ញៀវបាន ២៥ លាននាក់ ដោយមានទេសចរចិនប្រមាណ ៨លាននាក់»។
សម្រាប់វិស័យការងារឯណោះវិញ លោក Sawit Kaeowan ប្រធានគណៈកម្មការការងារថៃ បានឱ្យដឹងថា បច្ចុប្បន្ននៅតែមានការព្រួយបារម្ភជុំវិញបញ្ហាកង្វះការធានាសុវត្ថិភាពនៅកន្លែងការងារ និងកិច្ចសន្យាការងារខ្លីជាដើម ដែលវាប៉ះពាល់ទៅដល់សិទ្ធិរបស់និយោជិតជារួម។
លោកបានសង្កត់ធ្ងន់ថា កម្មករនិយោជិតមិនអាចរៀបចំផែនការសម្រាប់អនាគតបាន ដោយសារតែ ការងារមិនមានស្ថេរភាព ហើយដោយសារតែមូលហេតុទាំងនេះហើយបានជាពួកគេភាគច្រើនមាន ការលំបាកក្នុងការរកប្រាក់ចំណូល។ ត្រង់ចំណុចនេះ លោកបានបញ្ជាក់ថា អ្នកធ្វើការក្នុងទីក្រុងបាងកក និងតំបន់ជុំវិញអាចរកបានជាមធ្យមត្រឹមតែ ៣៥៣បាត (ជិត១០ដុល្លារ) ប៉ុណ្ណោះក្នុងមួយថ្ងៃ។
ក្នុងករណីកន្លងទៅ កម្មករនិយោជិតត្រូវបង្ខំចិត្តធ្វើការថែមម៉ោង ដើម្បីអាចរកចំណូលផ្គត់ផ្គង់គ្រួសារ មួយចំនួនទៀតដែលបានធ្លាក់ក្នុងបំណុលក្រៅផ្លូវការ ដោយមិនមានលទ្ធភាពសងជាដើម។ ដូច្នេះហើយ លោកស្នើដល់រដ្ឋាភិបាលឱ្យរក្សាការសន្យារបស់ខ្លួនក្នុងការលើកកម្ពស់សុខមាលភាពរបស់ប្រជាជន៕
ប្រែសម្រួល៖កែវ បុស្បា
ប្រភព៖ High hopes for policy statement