ចំនួនអ្នកស្លាប់ ដោយសារគ្រោះរញ្ជួយដីនៅម៉ារ៉ុក បានឡើងដល់ជាង ២ ៨០០ នាក់
ម៉ារ៉ុក៖ ចំនួនអ្នកស្លាប់ដោយសារគ្រោះរញ្ជួយដីនៅប្រទេសម៉ារ៉ុកបានកើនឡើងដល់ជាង ២ ៨០០ នាក់ ខណៈប្រជាជននៅតាមបណ្ដាភូមិរងគ្រោះបន្តអត់ផ្ទះសម្បែកស្នាក់នៅ ហើយត្រូវស្នាក់អាស្រ័យក្នុងតង់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ទូរទស្សន៍រដ្ឋម៉ារ៉ុក បានរាយការណ៍កាលពីល្ងាចថ្ងៃចន្ទថា ចំនួនអ្នកស្លាប់បានកើនឡើងដល់ ២ ៨៦២ នាក់ ហើយមនុស្សចំនួន ២ ៥៦២ នាក់បានរងរបួស។ គេរំពឹងថា ចំនួនអ្នកស្លាប់នឹងបន្តកើនឡើងទៀត ស្របពេលដែលអាជ្ញាធរមិនបានចេញការប៉ាន់ស្មានណាមួយលើចំនួនអ្នកបាត់ខ្លួន ដោយសារតែតំបន់រងគ្រោះដោយការរញ្ជួយដីជាច្រើន ពិបាកធ្វើឱ្យក្រុមអ្នកជួយសង្រ្គោះចុះទៅដល់។
បើតាមរ៉យទ័រ ភូមិរងគ្រោះខ្លះ ការខាតបង់មានលក្ខណៈធ្ងន់ធ្ងរ ដោយសារផ្ទះសម្បែងស្ទើរតែទាំងភូមិ ត្រូវរលំបាក់បែកក្រោមកម្លាំងរញ្ជួយ ដែលធ្វើឱ្យប្រជាជនរួចជីវិតគ្មានផ្ទះស្នាក់នៅ។
គួរបញ្ជាក់ថា រញ្ជួយដីកម្រិត ៦,៨ រ៉ិចទ័របានវាយប្រហារនៅតំបន់ភ្នំ High Atlas ក្នុងតំបន់ Marrakesh-Safi ក្នុងចម្ងាយប្រមាណកាលពីល្ងាចថ្ងៃសុក្រ ដោយបានធ្វើឱ្យផ្ទះឥដ្ឋភក់បែបប្រពៃណីរបស់ប្រជាជន បាក់រលំស្ទើរគ្រប់ទីកន្លែងក្នុងតំបន់រងគ្រោះ។
ផ្ចិតនៃការរញ្ជួយដីនេះ មានចម្ងាយប្រហែល ៧២ គីឡូម៉ែត្រភាគនិរតីនៃទីក្រុង Marrakech ជាកន្លែងដែលសំណង់ប្រវត្តិសាស្ត្រមួយចំនួនក្នុងទីក្រុងបេតិកភណ្ឌពិភពលោករបស់អង្គការយូណេស្កូមួយនេះ រងការខូចខាត។ ការរញ្ជួយដីដដែល ក៏បានធ្វើឱ្យខូចខាតយ៉ាងធ្ងន់ធ្ងរដល់វិហារអ៊ិស្លាម Tinmel ដែលសាងសង់តាំងពីសតវត្សរ៍ទី ១២ ផងដែរ។
នាពេលនេះ ក្រុមអ្នកស្វែងរក និងជួយសង្រ្គោះ មកពីប្រទេសអេស្ប៉ាញ អង់គ្លេស និងកាតា កំពុងចូលរួមកិច្ចខិតខំប្រឹងប្រែងរបស់ម៉ារ៉ុក ដើម្បីស្វែងរកអ្នកនៅរស់រានមានជីវិត។
អ្នកជំនាញនិយាយថា ចំនួនអ្នកស្លាប់ច្រើន គឺដោយសារតែសំណង់ផ្ទះរបស់ប្រជាជនក្នុងតំបន់ មិនត្រូវបានសាងសង់ឡើង ដើម្បីធន់ទៅនឹងគ្រោះរញ្ជួយដី ហើយម្យ៉ាង ការរញ្ជួយកើតឡើងក្នុងតំបន់ដែលមានប្រជាជនរស់នៅច្រើន។ រញ្ជួយដីដ៏សាហាវនៅប្រទេសម៉ារ៉ុកចុងក្រោយបំផុត បានកើតឡើងនៅឆ្នាំ ២០០៤ ក្នុងកម្រិត ៦,៤ រ៉ិចទ័រ ដោយសម្លាប់មនុស្សជាង ៦០០ នាក់៕
ប្រែសម្រួល៖ហួន ឌីណា
ប្រភព៖ Morocco earthquake death toll passes 2,800, survivors camp outdoors https://www.reuters.com/world/africa/morocco-earthquake-death-toll-passes-2800-survivors-camp-outdoors-2023-09-11/
