អាស្តាណា៖ អវកាសយានិករុស្ស៊ីពីរនាក់ និងអវកាសយានិកអាមេរិកម្នាក់នៅថ្ងៃទី១៥ ខែកញ្ញានេះ បានសហការគ្នាបញ្ជាយានចូលចតនៅឯស្ថានីយអវកាសអន្តរជាតិ (ISS) ដោយជោគជ័យ ទោះបីជាមានភាពតានតឹងខ្លាំងរវាងប្រទេសទាំងពីរ ជុំវិញជម្លោះនៅអ៊ុយក្រែនក៏ដោយ។

នៅព្រឹកថ្ងៃសុក្រទី១៥ ខែកញ្ញានេះ អវកាសយានិកពីរនាក់មកពីអង្គការអវកាសរុស្ស៊ី Roscosmos លោក Oleg Kononenko និងលោក Nikolai Chub និងអវកាសយានិកម្នាក់ទៀតមកពីអង្គការ NASA អ្នកនាង Loral O’Hara បានចាកចេញពីទីតាំងបាញ់បង្ហោះផ្កាយរណប Baikonur cosmodrome ក្នុងប្រទេសកាហ្សាក់ស្ថាន តាមរយៈយានអវកាសរុស្ស៊ី Soyuz MS-24 ឆ្ពោះទៅកាន់ស្ថានីយអវកាសអន្តរជាតិ (ISS)។

ស្របពេលជាមួយគ្នានេះដែរ ទីភ្នាក់ងារអវកាសរុស្ស៊ីបាននិយាយថា ក្រុមអវកាសយានិកបានចូលចតនៅស្ថានីយអវកាសអន្តរជាតិ (ISS) ដោយជោគជ័យ ក្នុងពេលបីម៉ោងក្រោយចាកចេញពីផែនដី។ អំឡុងពេលនៅឯស្ថានីយគន្លងតារាវិថី អវកាសយានិកទាំងបីនឹងចូលរួមជាមួយជនជាតិរុស្សីបីនាក់ អាមេរិកពីរនាក់ និងអវកាសយានិកជប៉ុនម្នាក់ រួមទាំងតំណាងទីភ្នាក់ងារអវកាសអឺរ៉ុបម្នាក់ទៀត៕ ប្រភព៖ AFP ប្រែសម្រួលដោយ៖ ឈឹម ទីណា