លោក ដូណាល់ ត្រាំ ៖ អ៊ុយក្រែនអាចជៀសវាងជម្លោះបាន តាំងពីដំបូង
វ៉ាស៊ីងតោន ឌីស៊ី៖ អតីតប្រធានាធិបតីអាមេរិក លោក Donald Trump បានប្រាប់ NBC News ក្នុងបទសម្ភាសន៍មួយដែលបានចាក់ផ្សាយ កាលពីថ្ងៃអាទិត្យថា អ៊ុយក្រែនអាចជៀសផុតពីការស្លាប់មនុស្សរាប់សែននាក់ និងបាត់បង់ទឹកដីតិចជាង ប្រសិនបើខ្លួនបានឈានដល់កិច្ចព្រមព្រៀងសន្តិភាពជាមួយរុស្ស៊ី មុនពេលជម្លោះចាប់ផ្តើម កាលពីខែកុម្ភៈ ឆ្នាំមុន។
«ការបាត់បង់ទឹកដីអ៊ុយក្រែនទៅឱ្យរុស្ស៊ីគឺជា អ្វីមួយដែលអាចចរចាបាន» នេះគឺជាអ្វីដែលលោក Trump បានប្រាប់ NBC ដោយបន្ថែមថា «មនុស្សជាច្រើនរំពឹងថា ក្រុងគៀវនឹងបោះបង់ចោលការទាមទាររបស់ខ្លួនចំពោះ “គ្រីមៀនិងផ្នែកផ្សេងទៀតនៃប្រទេស” ជាថ្នូរនឹងគ្នា ដើម្បីសន្តិភាព»
លោក Trump បានបន្តថា «ពួកគេអាចធ្វើកិច្ចព្រមព្រៀងមួយ ដែលគ្មាននរណាម្នាក់ត្រូវបានសម្លាប់… ពួកគេនឹងមានប្រទេសអ៊ុយក្រែន។ ឥឡូវនេះ គ្មាននរណាដឹងថាតើអ៊ុយក្រែននឹងត្រូវបានកាន់កាប់ទាំងស្រុងទេ»។
បន្ថែមពីនេះ លោក Trump បានអះអាងម្តងទៀតថា ប្រសិនបើជាប់ឆ្នោតនៅឆ្នាំក្រោយ លោកនឹងមានកិច្ចព្រមព្រៀងសន្តិភាព ក្នុងរយៈពេល២៤ ម៉ោង។
លោកបានប្រាប់ថា «ខ្ញុំនឹងនាំ ប្រធានាធិបតីរុស្ស៊ី វ្ល៉ាឌីមៀ ពូទីន ចូលក្នុងបន្ទប់មួយ ខ្ញុំនឹងយក ប្រធានាធិបតីអ៊ុយក្រែន ហ្សេលេនស្គី ចូលក្នុងបន្ទប់មួយ បន្ទាប់មក ខ្ញុំនឹងនាំពួកគេមកជាមួយគ្នា ហើយខ្ញុំនឹងមានកិច្ចព្រមព្រៀងដោះស្រាយ»៕ ប្រភពពី RT ប្រែសម្រួល៖ សារ៉ាត