នាយករដ្ឋមន្ត្រីថៃបដិសេធថា លោកគ្មានបំណងតែងតាំងលោក ថាក់ស៊ីន ជាទីប្រឹក្សានោះទេ
ថៃ៖ នៅព្រឹកថ្ងៃអាទិត្យទី២៤ ខែកញ្ញា ឆ្នាំ២០២៣ នាយករដ្ឋមន្ត្រីថៃ លោក ស្រេតថា ថាវីស៊ីន (Srettha Thavisin) បាននិយាយថា លោកមិនបានប្រាប់ទៅកាន់ប្រព័ន្ធផ្សព្វផ្សាយថា លោកបានតែងតាំងអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា (Thaksin Shinawatra) ជាទីប្រឹក្សារបស់លោកនោះទេ។
ថ្លែងទៅកាន់បណ្ដាអ្នកសារព័ត៌មាននៅអាកាសយានដ្ឋានសុវណ្ណភូមិ អំឡុងពេលដែលលោកត្រឡប់មកពីសហរដ្ឋអាមេរិកដើម្បីចូលរួមមហាសន្និបាតអង្គការសហប្រជាជាតិ លោកនាយករដ្ឋមន្ត្រី ស្រេតថា បានលើកឡើងថា ៖ «ប្រព័ន្ធផ្សព្វផ្សាយថៃបានបកស្រាយខ្លឹមសារខុស ជុំវិញការលើកឡើងរបស់ខ្ញុំ ពាក់ព័ន្ធនឹងលោក ថាក់ស៊ីន អំឡុងពេលដែលខ្ញុំបានផ្ដល់បទសម្ភាសន៍ជាមួយសារព័ត៌មាន Bloomberg នៅទីក្រុងញូវយ៉ក សហរដ្ឋអាមេរិក»។
លោកបានបញ្ជាក់ថា នៅក្នុងបទសម្ភាសន៍នោះ លោកគ្រាន់តែនិយាយថា លោកអាចនឹងធ្វើការពិគ្រោះយោបល់ជាមួយលោក ថាក់ស៊ីន ដូចដែលលោកធ្លាប់បានពិភាក្សាជាមួយនឹងអតីតនាយករដ្ឋមន្ត្រី និងមន្ត្រីជាន់ខ្ពស់ដទៃៗទៀតដូចជា លោក អាណាន់ ប៉ាន់យ៉ារ៉ាឈុន (Anand Panyarachun) និងលោក សុំឆៃ វង្សសាវ៉ាត់ (Somchai Wongsawat) ជាដើម។ លោកក៏បានស្នើឱ្យប្រព័ន្ធផ្សព្វផ្សាយទាំងអស់នោះ ធ្វើការផ្ទៀងផ្ទាត់បទសម្ភាសរបស់លោកម្ដងទៀតផងដែរ។
លោកនាយករដ្ឋមន្ត្រីបានមានប្រសាសន៍ថា ៖ «នេះជាលើកទីមួយហើយដែលខ្ញុំធ្វើជានាយករដ្ឋមន្ត្រី ហើយខ្ញុំមានបទពិសោធនៅថ្មីសន្លាងណាស់ពាក់ព័ន្ធនឹងរឿងនយោបាយ»។ លោកបានបន្ថែមថា លោកត្រៀមខ្លួនជាស្រេចក្នុងការស្វែងរកនូវដំបូន្មានល្អៗពីអ្នកដែលមានចំណេះដឹងជ្រៅជ្រះខាងផ្នែកនយោបាយ។
លោកបានស្នើឱ្យសារព័ត៌មានថៃ កុំបកស្រាយអ្វីដែលលោកនិយាយខុសពីខ្លឹមសារដើម ព្រោះវាអាចបង្កជាបញ្ហា ក៏ដូចជាការយល់ច្រឡំរបស់សាធារណៈជន។ លោកនាយករដ្ឋមន្ត្រីថៃរូបនេះក៏បានសង្កត់ធ្ងន់ថា ៖ «សូមកុំបកស្រាយខុស ហើយសូមព្យាយាមស្តាប់នូវអ្វីដែលខ្ញុំបាននិយាយ»៕
ប្រែសម្រួល៖ធា សុណា
ប្រភពព័ត៌មាន៖ Thai PBS World PM denies appointing Thaksin as advisor
