ភ្នំពេញ៖ វេទិកាការងារដែលបានសហការរៀបចំដោយទី ភ្នាក់ងារជាតិ មុខរបរ និងការងារ (NEA) ជាមួយនឹង ស.ស.យ.ក. វិស័យការងារ និងបណ្តុះបណ្តាលវិជ្ជាជីវៈ ពេញមួយថ្ងៃទី ៥ ខែតុលា ឆ្នាំ២០២៣ បានបញ្ចប់ទៅដោយរលូន ដោយមានយុវជន សិស្ស/និស្សិត និង អ្នកស្វែងរកការងារធ្វើចំនួនជាង ២០០ នាក់ បានចូលរួមដាក់ពាក្យ និងសម្ភាសការងារភ្លាមៗ។ ជាលទ្ធផល អ្នកស្វែងរកការងារចំនួន ១៣១ នាក់បានសម្ភាសជាប់ ដោយក្នុងនោះអ្នកសម្ភាសជាប់ជា ស្ថាពរ មានចំនួន ១២ នាក់ និងអ្នកសម្ភាស ជាប់បឋមមានចំនួន ១១៩ នាក់ ហើយនឹងត្រូវសម្ភាសបន្តនៅតាមក្រុមហ៊ុននីមួយៗ នាពេល ឆាប់ៗខាងមុខ។

យុវជន គិត គឹមហេង មកពីសាកលវិទ្យាល័យគ្រប់គ្រង និងសេដ្ឋកិច្ច ដែលបានសម្ភាសការងារជាប់បឋម នៅក្រុមហ៊ុន SUMI (Cambodia ) Wiring System Co., Ltd ផ្នែកគ្រប់គ្រងធនធានមនុស្ស បាន និយាយ ថានេះជាលើកទី១ ដែលលោកបានចូលរួមក្នុងវេទិកាការងារ ហើយអ្វីដែលខ្ញុំនឹកស្មានមិនដល់គឺខ្ញុំជាប់ការងារបឋមនៅក្រុមហ៊ុនដ៏ធំមួយនេះ។ យុវជន គឹម ហេងបន្តថា៖ «ខ្ញុំសូមអរគុណដល់ NEA ក៏ដូច ជា ក្រសួង ការងារដែលបានផ្តល់ឱកាសការងារដល់ខ្ញុំ និងយុវជនដទៃ ទៀត»។ ជាមួយគ្នានេះយុវជនរូបនេះ ក៏បានអំពាវដល់បងប្អូនយុវជន និងអ្នកដែលចង់រកការងារធ្វើផ្សេងទៀត សូមយក ប្រវត្តិរូបសង្ខេប(CV) មកសម្ភាសការងារនៅ NEA បាន ព្រោះ NEA មានឱកាសការងារ យ៉ាងសម្បូរបែបសម្រាប់យើងទាំងអស់គ្នា។

ដូចគ្នានេះដែរ យុវជន វិន ធុន ដែលកំពុងសិក្សានៅវិទ្យាស្ថាន ព្រះកុសុមៈ ជំនាញអេឡិចត្រូនិកឆ្នាំទី១ បានដាក់ពាក្យសម្ភាស ជាប់ជាស្ថាពរនៅផ្សាទំនើបឡាក់គី មុខតំណែង នាំអីវ៉ាន់ចេញ លើកឡើងថា វាពិតជាល្អ និងងាយស្រួលដែល NEA រៀបចំវេទិកា ការងារនេះឡើង ព្រោះបានជួយសម្រួលដល់ អ្នកស្វែងរកការធ្វើឱ្យបាន ជួបជាមួយនឹងតំណាងនិយោជកនៅនឹងកន្លែងតែម្តង។

សម្រាប់យុវជន សិស្ស/និស្សិត ដែលមិនបានចូលរួមក្នុងវេទិកាការងារ សូមមកចុះឈ្មោះ ស្វែងរកការងារជាមួយ NEA ដើម្បីអាចចូលរួម ក្នុងព្រឹត្តិការណ៍ការងារ និងវគ្គបណ្តុះបណ្តាលផ្សេងៗ ជាច្រើនដោយ ឥតគិតកម្រៃ ដែលរៀបចំជាបន្តបន្ទាប់ទៀតដោយ NEA រួមមាន៖ វេទិកាការងារ, កិច្ចសម្ភាសន៍ការងារ, វគ្គបណ្តុះបណ្តាលអំពីការ ត្រៀមលក្ខណៈសម្បត្តិចូលទីផ្សារការងារ និង ជំនាញទន់ ដើម្បីអាច ទទួលបានការងារធ្វើកាន់តែឆាប់រហ័ស។

ដើម្បីទទួលព័ត៌មានបន្ថែមអំពីការចូលរួមក្នុងវេទិកាការងារនាពេលក្រោយទៀត សូមទាក់ទង មជ្ឈមណ្ឌលការងាររាជធានីភ្នំពេញ នៃទីភ្នាក់ ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬគេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕