ឥណ្ឌា៖មនុស្សជាង១០នាក់ស្លាប់និងជាង១០០នាក់បាត់ខ្លួន ដោយសារការបាក់បឹងទឹកកកនៅតំបន់ភ្នំហិមាល័យ
ញូវដែលី៖ មនុស្សយ៉ាងហោចណាស់ ១៤ នាក់បានស្លាប់ និង១០២ នាក់ទៀតបានបន្តបាត់ខ្លួន ដោយសារតែការបាក់ទំបន់បឹងទឹកកកនៅតំបន់ភ្នំហិមាល័យនាភាគឦសាននៃប្រទេសឥណ្ឌា ដែលបណ្ដាលមកពីភ្លៀងធ្លាក់ជោកជាំ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
បឹង Lhonak ក្នុងរដ្ឋ Sikkim បានបាក់ច្រាំងកាលពីថ្ងៃពុធ បណ្តាលឱ្យមានទឹកជំនន់ភ្លាមៗដ៏ធំ ដែលអាជ្ញាធរមូលដ្ឋានឥណ្ឌាបាននិយាយថា បានប៉ះពាល់ដល់អាយុជីវិតមនុស្សជាង ២២ ០០០ នាក់។
គេមើលឃើញថា វាគឺជាព្រឹត្តិការណ៍ធាតុអាកាសដ៏សាហាវចុងក្រោយបង្អស់នៅតំបន់ភ្នំនៃប្រទេសអាស៊ីខាងត្បូងមួយនេះ ដែលគេផ្សារភ្ជាប់ទៅនឹងការប្រែប្រួលអាកាសធាតុ។
អ្នកនាំពាក្យក្រសួងការពារជាតិឥណ្ឌាបាននិយាយថា៖ «ប្រតិបត្តិការស្វែងរកជនរងគ្រោះកំពុងអនុវត្តទៅខណៈភ្លៀងធ្លាក់បន្តធ្លាក់ឥតឈប់ឈរ ហើយទឹកទន្លេ Teesta ហូរចាក់យ៉ាងលឿន ស្របពេលផ្លូវថ្នល់ និងស្ពានជាច្រើនកន្លែងរងការខូចខាតដោយសារទឹកហូរអូស»។
គិតត្រឹមព្រឹកថ្ងៃព្រហស្បតិ៍ ទីភ្នាក់ងារគ្រប់គ្រងគ្រោះមហន្តរាយរបស់រដ្ឋបាននិយាយថា មនុស្ស ២៦ នាក់បានរងរបួស និង ១០២ នាក់កំពុងបាត់ខ្លួន ក្នុងនោះមាន ២២ នាក់ ជាកងកម្លាំងយោធា។ ស្ពានចំនួន១១កន្លែង ត្រូវបានទឹកជន់លិច។
ខ្សែវីដេអូពីទីភ្នាក់ងារព័ត៌មាន ANI បានបង្ហាញពីទឹកជន់លិចចូលទៅក្នុងតំបន់សាងសង់ ដែលផ្ទះជាច្រើនបានដួលរលំ មូលដ្ឋានទ័ព និងកន្លែងផ្សេងទៀតរងការខូចខាត ហើយយានយន្តផ្សេងៗអណ្ដែតទឹក។ បើតាមរូបភាពពីផ្កាយរណប ជិត២/៣នៃផ្ទៃបឹងដែលបាក់ ត្រូវបានរីង។
ចំណែកឯនាយកដ្ឋានឧតុនិយមឥណ្ឌាវិញ បានព្រមានអំពីការរអិលបាក់ដី និងការរំខានដល់ជើងហោះហើរ ខណៈភ្លៀងនឹងបន្តធ្លាក់បន្ថែមទៀត ក្នុងរយៈពេល២ថ្ងៃខាងមុខ នៅក្នុងផ្នែកខ្លះនៃរដ្ឋ Sikkim និងរដ្ឋជិតខាងផ្សេងៗ។
គួររំឭកថា របាយការណ៍ឆ្នាំ ២០២០ របស់ទីភ្នាក់ងារគ្រប់គ្រងគ្រោះមហន្តរាយជាតិរបស់ប្រទេសឥណ្ឌា បាននិយាយថា បឹងទឹកកកជាច្រើនកំពុងរីកផ្ទៃ និងបង្កហានិភ័យដ៏ធំធេងដល់ហេដ្ឋារចនាសម្ព័ន្ធ និងជីវិតនៅខាងក្រោមបឹង ខណៈផ្ទាំងទឹកកកនៅតំបន់ហិមាល័យស្ថិតក្នុងដំណាក់កាលថមថយ ដោយសារការប្រែប្រួលអាកាសធាតុ៕
ប្រែសម្រួលដោយ៖ ហួន ឌីណា
ប្រភព៖ Himalayan glacial lake flooding kills 14, more than 100 missing in India
