ធនាគារអភិវឌ្ឍន៍អាស៊ី ប្តេជ្ញាចិត្តរួមចំណែកក្នុងការវិនិយោគគម្រោងពាក់ព័ន្ធនឹងបម្រែបម្រួលអាកាសធាតុ និងបន្តជួយអភិវឌ្ឍន៍វិស័យឯកជន
ភ្នំពេញ៖ ធនាគារអភិវឌ្ឍន៍អាស៊ី (ADB) បានប្តេជ្ញាចិត្តក្នុងការចូលរួមចំណែកវិនិយោគក្នុងគម្រោងពាក់ព័ន្ធនឹងបម្រែបម្រួលអាកាសធាតុ និងការអភិវឌ្ឍវិស័យឯកជនក្នុងរយៈពេលប្រាំឆ្នាំខាងមុខ ។ជាពិសេសការពង្រឹងវិស័យហិរញ្ញវត្ថុសម្រាប់គាំទ្រសហគ្រាសធុនមីក្រូតូច និងមធ្យម សម្រាប់រយៈពេលប្រាំឆ្នាំខាងមុខនេះ។
នេះជាការលើកឡើងរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្តី្រ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តាមរយៈសេចក្តីប្រកាសព័ត៌មានស្តីពីជំនួបពិភាក្សាការងាររវាងឯកឧត្តមជាមួយនឹងលោក វីនហ្វត ទឹកក្លិន (Winfried Wicklein) អគ្គនាយកនៃអគ្គនាយកដា្ឋនអាស៊ីអាគ្នេយ៍ នៃធនាគារអភិវឌ្ឍន៍អាស៊ី (ADB) ក្នុងអំឡុងពេលលោក ទឹកក្លិន បានមកបំពេញទស្សនកិច្ចនៅកម្ពុជា ក្នុងរយៈពេលពីរថ្ងៃ កាលពីថ្ងៃទី៩-១០ ខែតុលាកន្លងទៅនេះ ។
តាមរយៈសេចក្តីប្រកាសព័ត៌មានឯកឧត្តម អូន ព័ន្ធមុនីរ័ត្ន បានស្វាគមន៍យ៉ាងកក់ក្តៅ ចំពោះ លោក Winfried Wicklein និងបានវាយតម្លៃខ្ពស់ចំពោះការចូលរួមចំណែកដ៏សំខាន់របស់ ADB ដែលបានផ្តល់កិច្ចសហប្រតិបត្តិការល្អ ក្នុងការគាំទ្រការអភិវឌ្ឍសង្គម-សេដ្ឋកិច្ចកម្ពុជា ចាប់តាំងពីឆ្នាំ ១៩៩៣ រហូតដល់បច្ចុប្បន្ន ។
ចំណែកលោក Winfried Wicklein ក៏បានថ្លែងអំណរគុណចំពោះរាជរដ្ឋាភិបាលកម្ពុជា ចំពោះកិច្ចសហប្រតិបត្តិការល្អ និងជិតស្និទ្ធជាមួយ ADB ក្នុងរយះពេលជាង ៣០ឆ្នាំកន្លងមក ហើយលោកបានត្រៀមខ្លួនដើម្បីពង្រឹង និងពង្រីកកិច្ចសហប្រតិបត្តិការដ៏ល្អនេះបន្ថែមទៀត សំដៅបន្តរួមចំណែកក្នុងកិច្ចដំណើរការអភិវឌ្ឍរបស់កម្ពុជា។
ឯកឧត្តមឧបនាយករដ្ឋមន្រ្តី បានបន្តថា កម្ពុជាពិតជាអរគុណADB ចំពោះការប្តេជ្ញាចិត្ត ខ្ពស់ក្នុងការចូលរួមជំរុញកំណើនសេដ្ឋកិច្ចកម្ពុជាប្រកបដោយចីរភាព ក៏ដូចជាការលើកកម្ពស់ជីវភាពរស់នៅរបស់ប្រជាជនកម្ពុជាផងដែរ និងបានជូនពរលោក Winfried Wicklein ព្រមទាំងសហការី ទទួលបានជោគជ័យក្នុងដំណើរទស្សនកិច្ចរបស់ខ្លួននៅកម្ពុជា។
ឯកឧត្តមរដ្ឋមន្ត្រីបានលើកឡើងថា ៖ «យើងសាទរចំពោះការប្តេជ្ញាចិត្ត និងការចូលរួមចំណែករបស់ ADB ជាពិសេសការវិនិយោគគម្រោងពាក់ព័ន្ធនឹងបម្រែបម្រួលអាកាសធាតុ និងការអភិវឌ្ឍវិស័យឯកជន ក្នុងរយៈពេលប្រាំឆ្នាំខាងមុខ ជាពិសេស ការពង្រឹង វិស័យហិរញ្ញវត្ថុសម្រាប់គាំទ្រសហត្រាសធុនមីក្រូ តូចនិងមធ្យម តាមរយៈប្រតិបត្តិការ Non-Sovereign Operations ដូចមានចែងក្នុង យុទ្ធសាស្ត្រភាពជាដៃគូសម្រាប់អភិវឌ្ឍន៍កម្ពុជា ឆ្នាំ ២០២៤-២០២៨ »។
ឯកឧត្តមបានបន្ថែមថា ADB ក៏បានការពង្រីកនូវទំហំឥណទានធំជាងមុនតាមរយៈការកែទម្រង់ការគ្រប់គ្រងមូលធន ដើម្បីបំពេញតម្រូវការអភិវឌ្ឍន៍នានា ដែលក្នុងនោះ កម្ពុជាក៏នឹងត្រូវចាត់ចូលជាប្រទេសដែលទទួលបាននូវប្រភពធនធានទំហំធំ ពិសេស សម្រាប់គម្រោងពង្រឹងការបន្សាំទៅនឹងអាកាសធាតុ។
ជាមួយគ្នានេះដែរ ឯកឧត្តមបានបន្ថែមថា ADB បានរួមចំណែកក្នុងការដាក់ឱ្យអនុវត្តនូវប្រព័ន្ធប្រតិបត្តិការថ្មី របស់ ADB ក្នុងគោលដៅពន្លឿនការងាររបស់ខ្លួនឱ្យកាន់តែមានប្រសិទ្ធភាព តាមរយៈការធ្វើប្រតិភូកម្មសិទ្ធិសម្រេច និងការទទួលខុសត្រូវកាន់តែច្រើនជាងមុនជូនស្ថានតំណាងរបស់ ADB ប្រចាំកម្ពុជាផងដែរ។
ឯកឧត្តមបានបញ្ជាក់ថា ៖ «យុទ្ធសាស្ត្រភាពជាដៃគូសម្រាប់អភិវឌ្ឍន៍កម្ពុជា ឆ្នាំ ២០២៤- ២០២៨ ដែលទើបត្រូវបានអនុម័តនាពេលថ្មីៗនេះ ដើរស្របគ្នានឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី ៧ នៃរដ្ឋសភា ដែលមានគោលបំណងរួមចំណែកគាំទ្រការអភិវឌ្ឍសង្គម-សេដ្ឋកិច្ច កម្ពុជា ដើម្បីប្រែក្លាយជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០»។
លោក ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា យល់ឃើញថា កិច្ចដំណើរការអភិវឌ្ឍន៍ប្រទេសកម្ពុជា មិនអាចខ្វះបានឡើយនូវដៃគូអភិវឌ្ឍនានា ជាពិសេសធនាគារអភិវឌ្ឍន៍អាស៊ី (ADB) ខណៈធនាគារនេះ បានជួយកម្ពុជា ស្ទើរគ្រប់វិស័យ។
លោកបានបញ្ជាក់ថា ៖ «ADB បានផ្តល់ទាំងប្រាក់កម្ចី ទាំងជំនួយ និងបច្ចេកទេសមកកម្ពុជា ក្នុងនោះគម្រោងភាគច្រើនដែលADB ផ្តោតសំខាន់ជាងគេ គឺវិស័យអប់រំ វិស័យសុខាភិបាល ថាមពល ការអភិវឌ្ឍន៍ជនបទ កសិកម្ម ហិរញ្ញវត្ថុ ការដឹកជញ្ចូន និងការធ្វើពាណិជ្ជកម្មជាដើម»។
សូមជម្រាបថា ADB ត្រូវបានបង្កើតឡើងនៅឆ្នាំ ១៩៦៦ និងត្រូវបានគ្រប់គ្រងដោយសមាជិកចំនួន ៦៨ ប្រទេស។ធនាគារនេះ បានប្តេជ្ញាក្នុងបេសកកម្មរបស់ខ្លួនថា នឹងសម្រេចឱ្យបាននូវវិបុលភាព បរិយាបន្ន ភាពធន់ និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង៕
ដោយ៖វណ្ណ សុជាតា