សេអ៊ូល៖ក្រោយការដំឡើងសាច់ដុំតាមរយៈមីស៊ីលរបស់កូរ៉េខាងជើងជាញឹកញយ កូរ៉េខាងត្បូងឯណោះ​ក៏កំពុងតែខិតខំរក្សាសម្ព័ន្ធមិត្តសេរីរបស់ខ្លួនគឺ អាមេរិក និងជប៉ុន។ នេះ​ជាលើកទីមួយ ដែលកូរ៉េខាងត្បូង​សម្រេចធ្វើស​មយុទ្ធផ្លូវអាកាសរួមជាមួយសម្ព័ន្ធមិត្តទាំងពីរ ក្រោមហេតុផលពង្រឹងកិច្ច​សហប្រតិ​បត្តិការ​ផ្នែកយោធា។​នេះមិនត្រឹមតែជាសមយុទ្ធប្រឆាំងនឹងកូរ៉េខាងជើងប៉ុណ្ណោះទេ គេក៏មិនគួរភ្លេចទេថា នៅក្បែរឧបទ្វីប​កូរ៉េ ក៏​មានចិនដែលមានឥទ្ធិពលកុម្មុយនីស និងជាសម្ព័ន្ធមិត្តយូរអង្វែងរបស់កូរ៉េខាងជើងផង។​

យ៉ាងណាមិញ សមយុទ្ធផ្លូវអាកាសរវាងប្រទេសទាំងបីនេះ បានធ្វើឡើងកាលពីថ្ងៃអាទិត្យទី២២ ខែ​តុលា ហើយដែល​ប្រព្រឹត្តទៅនៅភាគខាងត្បូងនៃឧបទ្វីបកូរ៉េ។​​

កងទ័ពអាកាសកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា សមយុទ្ធនេះមានគោលបំ​ណ​ង​ពង្រីកសមត្ថភាពឆ្លើយតបរបស់ប្រទេសខ្លួន ប្រឆាំងនឹងការគំរាមកំហែងនុយក្លេអ៊ែរ និងមីស៊ីល របស់កូរ៉េ​ខាងជើង។​

ដោយឡែក សមយុទ្ធនេះបានប្រើប្រាស់យន្តហោះទម្លាក់គ្រាប់បែក B-52  ដែលអាច​ផ្ទុក​អាវុធ​នុយក្លេអ៊ែរ ​​ជាមួយនឹង​សមត្ថភាព​រុករក​ទីតាំងដ៏​ជាក់លាក់​ទូទាំង​ពិភពលោក​។ នៅក្នុងជម្លោះ​ណាមួយ យន្តហោះ B-52 អាចវាយប្រហារជាយុទ្ធសាស្ត្រ អាចផ្ដល់ការគាំទ្រតាមផ្លូវអាកាស​ ព្រមទាំង​ប្រតិបត្តិការដែនសមុទ្រផងដែរ។​

ក្នុងដំណើរការសមយុទ្ធឯណោះវិញ យន្តហោះទម្លាក់គ្រាប់បែករបស់អាមេរិកបានចុះចតនៅមូលដ្ឋាន​ទ័ពអាកាសកូរ៉េ​ខាងត្បូងតាំងតែពីថ្ងៃទី ១៧ ខែតុលា។ យន្ដហោះ B-52 ដែលហោះហើរក្នុងល្បឿន​ដ៏លឿន ដោយអាចធ្វើ​ដំណើរបានជាង ១៤,000 គីឡូម៉ែត្រ (៨.៨00 ម៉ាយ) ដោយមិនចាំបាច់​ចាក់ប្រេង នៅរយៈកំពស់​ដល់ទៅ ៥0 000 ហ្វីត។​

យោងតាមសារព័ត៌មាន The Japan Times តាមរយៈសកម្មភាពសមយុទ្ធនេះ ទីក្រុងព្យូងយ៉ាង បានចាត់ទុកថាជាការហ្វឹកហាត់សម្រាប់ការ ឈ្លានពាន និងបានព្រមានក្នុងការចាត់ វិធានការតបត ផងដែរ។

គួររំលឹកថា កាលពីខែសីហាកន្លងទៅ មេដឹកនាំប្រទេសទាំងបីក៏បានជួបប្រជុំគ្នានៅ Camp David ដោយបានព្រមព្រៀងគ្នាលើផែនការធ្វើសមយុទ្ធជាប្រចាំ និងចែករំលែកទិន្នន័យនានា​ពីកូរ៉េ​ខាងជើង ហើយកាលពីដើមខែតុលានេះផងដែរ ប្រទេសទាំងបីក៏បានធ្វើសមយុទ្ធដែន​សមុទ្រ​រួមគ្នាជាលើកដំបូងក្នុងរយៈពេល៧​ឆ្នាំ៕​

ដោយ៖​កែវ បុស្បា

ប្រភព៖ South Korea says holds first joint air drill with Japan and US