កម្មវិធី «ជំរំយុវជនជាសាកលលើកទី៩» បង្ហាញពីសច្ចៈធម៌ប្រវត្តិសាស្ត្រ និងតថភាពសង្គមដល់យុវជនកម្ពុជាជំនាន់ក្រោយ
ភ្នំពេញ៖កម្មវិធីជំរំយុវជនជាសាកលលើកទី៩ ឆ្នាំនេះ ធ្វើឡើងក្រោមប្រធានបទ «ការអភិវឌ្ឍយុវជនក្រោមដំបូលសន្តិភាព» ដើម្បីលើកបង្ហាញពីសច្ចៈធម៌ប្រវត្តិសាស្ត្រ និងតថភាពសង្គមដល់យុវជនកម្ពុជាជំនាន់ក្រោយ ។
លោកស្រី ស្រូយ សុជាតិ អគ្គនាយកនៃអគ្គនាយកដ្ឋានយុវជន ក្រសួងអប់រំ យុវជន និងកីឡា បានប្រាប់ឱ្យដឹងនៅថ្ងៃទី៣០ ខែតុលាថា សម្រាប់ឆ្នាំ២០២៣នេះ គឺជាលើកទី៩ហើយ ដែលក្រសួងអប់រំ ក្នុងនាមជាប្រធានគណៈកម្មការអន្តរក្រសួង នឹងរៀបចំកម្មវិធីជំរំយុវជនជាសាកលលើកទី៩ ក្រោមប្រធានបទ «ការអភិវឌ្ឍយុវជនក្រោមដំបូលសន្តិភាព»។
កម្មវិធីនេះ នឹងត្រូវរៀបចំឡើងរយៈពេល ៦ថ្ងៃ ចាប់ពីថ្ងៃទី១១ ដល់ ថ្ងៃទី១៦ ខែធ្នូ ឆ្នាំ២០២៣ នៅលើទឹកដីនៃខេត្តសៀមរាបខាងមុខនេះ។
លោកស្រី បានប្រាប់ថា ៖ «យើងជ្រើសរើសប្រធានបទនេះ សម្រាប់កម្មវិធីជំរំយុវជនជាសាកលលើកទី៩ ដោយសារចង់បង្ហាញឱ្យឃើញនូវសុខសន្តិភាពជាកត្តាឈានមុខ ដោយហេតុថាមានសន្តិភាពទើបជាការបើកឱកាសឱ្យប្រទេសមានលទ្ធភាពគិតគូរដល់ការបណ្តុះបណ្តាលធនធានមនុស្ស»។
លោកស្រី ស្រូយ សុជាតិ បានឱ្យដឹងទៀតថា ក្នុងយុទ្ធសាស្រ្ត នៃគោលនយោបាយជាតិស្តីពីការអភិវឌ្ឍន៍យុវជន ក្រសួងអប់រំ និងក្រុមប្រឹក្សាជាតិកម្ពុជាដើម្បីអភិវឌ្ឍយុវជន ដែលជាសេនាធិការរបស់រាជរដ្ឋាភិបាល មានតួនាទីក្នុងការបណ្តុះបណ្តាលចំណេះដឹង ជំនាញ បំណិន ដល់យុវជនឱ្យក្លាយជាមូលធនមនុស្សរបស់សង្គម និងមានអាជីពសមស្របមួយសម្រាប់ថ្ងៃអនាគត។
បើតាមលោកស្រី ស្រូយ សុជាតិ កម្មវិធីជំរំយុវជនជាសាកលនេះ គឺមានសារៈសំខាន់ណាស់ ដើម្បីរួមចំណែកអភិវឌ្ឍសមត្ថភាព និងបណ្តុះបណ្តាលយុវជនលើជំនាញបច្ចេកវិទ្យាព័ត៌មាន និងឌីជីថល សម្រាប់ឆ្លើយតបទៅនឹងយុទ្ធសាស្ត្រកំណែទម្រង់វិស័យអប់រំបែបឌីជីថល ឆ្លើយតបទៅនឹងគោលនយោបាយរដ្ឋាភិបាលឌីជីថលកម្ពុជា (២០២២-២០៣៥)។
ដោយមើលឃើញពីភាពជោគជ័យ និងផលជះជាវិជ្ជមានមកកាន់សង្គមតាមរយៈការផ្លាស់ប្តូរនូវឥរិយាបទ ការគិតបែបវិជ្ជមាន និងការផ្តល់នូវចំណេះដឹងដល់យុវជន ស្របតាមគោលបំណង និងទស្សនៈវិស័យរបស់កម្មវិធី គណៈកម្មការអន្តរក្រសួង និងអ្នកឧបត្ថម្ភកម្មវិធី បានសម្រេចបង្កើនការជ្រើសរើសចំនួនប្រតិភូជំរំជាអ្នកចូលរួមពីចំនួន ១៤០នាក់ ក្នុងឆ្នាំ២០២២ ឱ្យដល់ចំនួន ២៥០ នាក់សម្រាប់ឆ្នាំ២០២៣ និងយុវជនស្ម័គ្រចិត្តចំនួន ៣៥នាក់។
ឯកឧត្តម សេរី ជំនះ រដ្ឋលេខាធិការក្រសួងអប់រំ និងជាអនុប្រធានគណៈកម្មការអន្តរក្រសួង ធ្លាប់បានថ្លែងកាលពីដើមខែតុលា ក្នុងពិធីបិទវគ្គតម្រង់ទិសយុវជនស្ម័គ្រចិត្ត និងប្រតិភូជំរំយុវជនជាសាកលលើកទី៩ ថា ការបោះជំរំ មិនមែនជាកម្មវិធីបោះតង់ធម្មតានោះទេ តែជាទីកន្លែងដែលអាចរៀនសូត្រ និងបង្កើតទំនាក់ទំនងថ្មីៗ។
សូមបញ្ជាក់ថា ការបោះជំរំយុវជនជាសាកល ជាគំនិតផ្តួចផ្តើមរបស់សម្ដេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ហើយការបោះជំរំយុវជនជាសាកល ត្រូវបានចាប់ផ្តើមឡើងតាំងពីឆ្នាំ២០១០ រហូតមកដល់បច្ចុប្បន្ន៕
ដោយ៖ជា សុខនី
