បាងកក៖ នាយករដ្ឋមន្ត្រីថៃ លោក ស្រេថា ថាវីស៊ីន ថ្មីៗនេះ បានច្រានចោលការអះអាងរបស់ប្រព័ន្ធផ្សព្វផ្សាយមួយដែលចោទថា លោកជាអាយ៉ងរបស់យោធាថៃ ក្នុងការដែលរដ្ឋាភិបាល មិនរំលាយបញ្ជាដ្ឋានប្រតិបត្តិការសន្តិសុខផ្ទៃក្នុង ហៅកាត់ថា ISOC ។

តាមរយៈបណ្តាញសង្គម X កាលពីយប់ថ្ងៃព្រហស្បតិ៍ សប្តាហ៍នេះ លោកនាយករដ្ឋមន្ត្រីថៃ បាននិយាយថា ការរិះគន់ដូច្នេះ គឺជាការបំភាន់ ហើយលោកចង់ឲ្យមានការចុះផ្សាយកែតម្រូវជាថ្មី ចំពោះសេចក្តីរាយការណ៍ មិនត្រឹមត្រូវបែបនេះ។

លោកថា «ការរំលាយ ISOC មិនមែនជាផ្នែកមួយនៃគោលនយោបាយរបស់គណបក្សភឿថៃនោះទេ មិនថា ពីមុន អំឡុងពេលនេះ ឬក្រោយការបោះឆ្នោត។ ទោះជាយ៉ាងណាក៏ដោយ រដ្ឋាភិបាលដែលដឹកនាំដោយបក្សភឿថៃ និងសម្ព័ន្ធភាព មានបំណងចង់ធ្វើទំនើបកម្មកងទ័ព និងបញ្ចូល ISOC ទៅក្នុងដំណើរការប្រជាធិបតេយ្យ»។

គួររម្លឹកថា បញ្ជាការដ្ឋានប្រតិបត្តិការសន្តិសុខផ្ទៃក្នុង ឬ ISOC ត្រូវបានគេដឹងថា ជាផ្នែកមួយរបស់យោធាថៃ ទទួលខុសត្រូវចំពោះការបង្ក្រាបក្រុមឆ្វេងនិយម ចាប់ពីទសវត្សរ៍ឆ្នាំ ១៩៦០ ដល់ ១៩៨០។ ក្នុងពេលនោះ ISOC បានជាប់ពាក់ព័ន្ធក្នុងអំពើឃោរឃៅប្រឆាំងនឹងសកម្មជន និងជនស៊ីវិល។

ជុំវិញពាក្យថា «អាយ៉ង» លោក ស្រេថា បានលើកឡើងថា គណបក្សរបស់លោកត្រូវបានប្រជាពលរដ្ឋបោះឆ្នោតគាំទ្រ ហើយលោកបានស្នើដោយទទូចដល់អ្នករិះគន់លោក កុំធ្វើឲ្យខូចសម្លេងគាំទ្ររបស់ប្រជាពលរដ្ឋ។ លោកថា បើលោកជាអាយ៉ង លោកនឹងជ្រើសរើសធ្វើជាអាយ៉ង របស់ប្រជាជន។

ការលើកឡើងរបស់នាយករដ្ឋមន្ត្រីទាំងនេះ បានធ្វើឡើង ដើម្បីឆ្លើយតបទៅនឹងការចុះផ្សាយរបស់ទីភ្នាក់ងារសារព័ត៌មាន Thai Enquirer ដែលដាក់ចំណងជើងថា «លោក ស្រេតថា បង្ហាញពណ៌ពិតប្រាកដដែលថា លោកជាអាយ៉ង ដែលគាំទ្រដោយយោធា»។

ប្រព័ន្ធផ្សព្វផ្សាយនេះបានរិះគន់លោកនាយករដ្ឋមន្ត្រី ចំពោះការមិនគាំទ្រសំណើរបស់គណបក្ស Move Forward ដែលចង់រំលាយ ISOC ដោយកត់សម្គាល់ថា ការសម្រេចចិត្តរបស់លោក គឺលើសពីការឈរលើគោលការណ៍តែមួយ ដោយគេដឹងថា បក្ស Move Forward ក៏ជាសម្ព័ន្ធភាពរបស់រដ្ឋាភិបាលចម្រុះដែរ៕ ប្រភពពី Thai PBS ប្រែសម្រួល៖ សារ៉ាត