អារ៉ាប់៖ មេដឹកនាំ​អារ៉ាប់ បានបង្ហាញពីការមិនពេញចិត្តយ៉ាងខ្លាំងឡើងលើសង្គ្រាមដែល​បាន​​​ឆក់យក​ជីវិត​​ជន​​ស៊ីវិល​​ប៉ាឡេស្ទីន​រាប់​ពាន់​នាក់​ក្នុង​សង្រ្គាម​អ៊ីស្រាអែល ​និង​ក្រុម​ហាម៉ាស់ ​ដោយបាន​ជំរុញឱ្យ​មាន​បទ​ឈប់​បា​ញ់​​ភ្លាមៗកាលពី​ថ្ងៃទី​៤ ខែវិច្ឆិកាថ្មីៗនេះ។

ចំណែករដ្ឋមន្ត្រីការបរទេសអាមេរិក លោក អេនតូនី ប្លីនកេន(Antony Blinken) ​បាន​ព្រមានថា​ទង្វើ​​បែប​នេះ​​ ឬបទឈប់បា​ញ់នឹង​បន្ត​ផល​ប៉ះពាល់ ថែមទាំង​អាច​ជំរុញ​ឱ្យកើតមាន​អំពើ​ហិង្សា​កាន់​តែ​ខ្លាំង​ឡើង​ដោយ​ក្រុម​សកម្មប្រ​យុទ្ធ។​

ក្នុងកិច្ចពិភាក្សា​អស់មួយ​រសៀល​ជាមួយ​មន្ត្រី​ការទូត​អេហ្ស៊ីប ហ្សកដានី អារ៉ាប៊ីសាអូឌីត កាតា និង​អេមីរ៉ាទី និង​មន្ត្រី​ជាន់​ខ្ពស់​ប៉ាឡេស្ទីន លោក Blinken បានត្រឹមនិយាយបង្ហាញ​ពីគោល​បំណង​រួមមួយ​ក្នុង​ការ​ការ​ពា​រ​ជនស៊ីវិល​ និងពិចារណាលំហូរ​ជំនួយ​ទៅកាន់ទឹកដីដែល​ត្រូវបានឡោមព័ទ្ធ​ដោយកងទ័ព​អ៊ីស្រាអែល​​គឺតំបន់​ហ្គាហ្សា។​​

​​សន្និសីទ​សារព័ត៌​មានរួមជាមួយមន្ត្រីជាន់ខ្ពស់មកពីពិភពអារ៉ាប់ គេសង្កេតឃើញថា​មានភាពមិន​ស៊ី​សង្វាក់​គ្នាស្តែងឱ្យឃើញច្បាស់ ពោលគឺកិច្ចពិភាក្សានេះពួកគេមានពេលពេលវេលា ឬ​ឱកាសថត​រូបថត​ច្រើនដែ​​ល​ខុសផ្ទុយពី​ពេល​ដែលលោក Blinken ជួបប្រជុំ​ពិភាក្សាបិទទ្វារជាមួយនាយករដ្ឋមន្រ្តី បេនចាមីន ណេតានយ៉ាហ៊ូ( Benjamin Netanyahu) នៅទីក្រុង តែល អាវី(Tel Aviv)។ ​​

​មកទល់ពេលនេះ រដ្ឋមន្ត្រី​អារ៉ាប់​បាន​អំពាវនាវ​ម្តង​ហើយ​ម្តងទៀត​ឱ្យ​បញ្ឈប់​ការ​ប្រយុទ្ធ​នៅ​ពេល​នេះ និង​ថ្កោលទោស​យុទ្ធសាស្ត្រ​សង្គ្រាម​របស់​អ៊ីស្រាអែលផងដែរ។​

ដោយឡែក រដ្ឋមន្ត្រីការបរទេសអាមេរិកលោក Blinken នៅតែប្រកាន់​ជំហរ​របស់សហរដ្ឋអាមេរិកយ៉ាង​ម៉ឺងម៉ាត់ថា បទ​ឈប់​បាញ់​​នឹងធ្វើឱ្យប៉ះពាល់ដល់សិទ្ធិ និងកាតព្វកិច្ចរបស់អ៊ីស្រាអែល ក្នុង​ការ​ការពារ​ពល​រដ្ឋរបស់ខ្លួន បន្ទាប់​​ពីការវាយប្រហារដ៏គួរឱ្យភ្ញាក់ផ្អើលដោយក្រុមហាម៉ាស់កាលពីថ្ងៃទី៧ ខែតុលា នៅទូទាំ​ង​ភាគខាង​ត្បូង​អ៊ីស្រាអែល។ លោកបាននិយាយថា ការប្តេជ្ញាចិត្តរបស់រដ្ឋបាល Biden ចំពោះ​សិទ្ធិការពា​រខ្លួ​នរបស់​អ៊ីស្រាអែល នៅតែមិនផ្លាស់ប្តូរឡើយ។

លោក Blinken បាននិយាយថា ៖ «វាជាទស្សនៈរបស់យើងនៅពេលនេះ។ ​បទឈប់​បាញ់ដែលទុកឱ្យ​ក្រុមហាម៉ាស់​នៅនឹងកន្លែង ធ្វើឱ្យពួកគេអាចប្រមូលផ្តុំឡើងវិញ និងធ្វើរឿងដដែលម្តងទៀត»។​

ផ្ទុយពីសហរដ្ឋអាមេរិក ក្រុមមន្ត្រីជាន់ខ្ពស់ពីប្រទេសអារ៉ាប់ លើកឡើងថាវាលឿនពេក​ក្នុងការគិតគូរ​ដល់​អនាគតតំបន់ហ្គាហ្សាក្រោយចប់សង្គ្រាមរបស់លោក Blinken។ ផ្ទុយទៅវិញ ក្រុមមន្ត្រី​ប្រទេសអារ៉ាប់ថា ការបញ្ឈប់ការសម្លាប់ និងការស្ដារឡើងវិញនូវជំនួយមនុស្សធម៌ដែលមានស្ថិរភាព គឺជារឿង​បន្ទាន់​ដែល​ត្រូ​វ​តែដោះស្រាយជាមុន។​

ស្របពេលជាមួយគ្នានេះដែរ ពីទីក្រុង Beirut មន្ត្រីជាន់ខ្ពស់របស់អង្គការ Hamas លោក Osama Hamdan បានប្រាប់អ្នកយកព័ត៌មានថា Blinken ​គួរតែបញ្ឈប់ការឈ្លានពាន ហើយមិនគួរបង្កើត​គំនិតដែ​ល​មិនអាចអនុវត្តបាន។​ លោក Hamdan បញ្ជាក់ដែរថា អនាគតនៃ​តំបន់ហ្គាហ្សា​នឹង​ត្រូវសម្រេចដោយជនជាតិប៉ាឡេស្ទីន៕​

ប្រែសម្រួល៖ស្រ៊ុន សិរីវឌ្ឍនៈ

ប្រភព៖ Arab leaders push for an Israel-Hamas cease-fire now​ https://apnews.com/article/blinken-mideast-diplomacy-gaza-israel-hamas-war-9d9ada872b84699424f17f13df1c3560