ភ្នំពេញ៖ព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អក អំបុកនឹងប្រព្រឹត្តិទៅរយៈពេល៣ថ្ងៃចាប់ពីថ្ងៃទី ២៦-២៧និង២៨ ខែ វិច្ឆិកា ឆ្នាំ២០២៣ខាងមុខ។ក្នុងព្រឹត្តិការណ៍ដ៏ធំប្រចាំឆ្នាំនេះដែរ ក្រសួង វប្បធម៌ និងវិចិត្រសិល្បៈនឹងមានរៀបចំកម្មវិធី សិល្បៈច្រើនទម្រង់ សម្ដែង ជូនមហាជនទស្សនា ផងដែរ។

ឯកឧត្តម ហ៊ឺ វីរៈ រដ្ឋលេខាធិការ ក្រសួងវប្បធម៌ និងវិចិត្រសិល្បៈបាន បញ្ជាក់ថា រៀងរាល់ឆ្នាំនៃព្រះរាជពិធីបុណ្យអុំទូក បណ្ដែតប្រទីប និង អកអំបុក សំពះព្រះខែ ក្រសួងវប្បធម៌ និងវិចិត្រសិល្បៈ តែងរៀបចំ សម្តែងសិល្បៈជូនដល់មហាជនទស្សនា ។ ដោយឡែកឆ្នាំនេះក្រសួង បានរៀបចំទីតាំងចំនួនបួន។ក្នុងនោះ ទីតាំងទី១ នៅខាងមុខវត្តបទុម ដែលមានការសម្តែងនូវទម្រង់របាំប្រពៃណី។ ទីតាំងទី២ នឹងរៀបចំ ឡើងដោយមន្ទីរវប្បធម៌និងវិចិត្រសិល្បៈរាជធានីភ្នំពេញដោយ មានការ សម្តែងជាទម្រង់ល្ខោនខោល និងរបាំងផ្សេងៗទៀត។ សម្រាប់ទី តាំង ទី៣ រៀបចំសម្តែងជូនកីឡាករអុំទូកទស្សនានៅកន្លែងស្នាក់នៅ និងទី តាំងទី៤ ក្រុមភ្លេងប្រពៃណី នឹងសម្តែងរយៈពេលបី ថ្ងៃជូនមហា ជន ទស្សនា។

ឯកឧត្តមរដ្ឋលេខាធិការបានអធិប្បាយថា សម្រាប់ទម្រង់សម្តែងក្នុង ឆ្នាំនេះមានដូចជា ល្ខោនខោល យីកេ ល្ខោនស្បែកតូច និងល្ខោនស្បែក ធំជាដើម។ការរៀបចំសម្តែងនេះក៏មានកិច្ចសហការរវាងវិស័យឯកជន និងក្រសួង។

ចំណែកអង្គភាពពាក់ព័ន្ធ ក្រសួងមាន នាយកដ្ឋានសិល្បៈ និងទស្សនីយ ភាព សាកលវិទ្យាល័យភូមិន្ទវិចិត្រ សិល្បៈ ,សាលាមធ្យមវិចិត្រ សិល្បៈ និងសិល្បៈមកពីមន្ទីរវប្បធម៌ និងវិចិត្រសិល្បៈរាជធានីភ្នំពេញ។ក្រៅ ពីនេះក៏មានការចូលរួមពីសំណាក់វិស័យឯកជន ចូលរួមដែរ ដូចជា ក្រុមល្ខោនបុរាណមកពីក្រុមល្ខោនបុរាណវត្តកៀនស្វាយក្រៅ ខេត្តកណ្តាល, ក្រុមល្ខោនស្បែកតូច ក្រុមល្ខោន ស្បែកធំ មកពីខេត្ត សៀមរាប, ចំប៉ីដងវែង យីកេ មកពីខេត្តកំពង់ធំ។ ក្រសួងក៏បានអញ្ជើញក្រុមសិល្បៈករទាំងក្នុងប្រព័ន្ធនិងក្រៅ ប្រព័ន្ធ មកចូលរួមដែរ

ឯកឧត្តម រដ្ឋលេខាធិការ ក្រសួងវប្បធម៌ និង វិចិត្រសិល្បៈបានឱ្យ ដឹងបន្ថែមថា ក្រៅពីរៀបចំសម្តែងជាទម្រង់សិល្បៈមន្ទីរវប្បធម៌ និង វិចិត្រសិល្បៈរាជធានីភ្នំពេញក៏បានរៀបចំពិធីសម្តែងបែបបទនៃប្រពៃណីបុណ្យអុំទូកនៅវត្តភ្នំ ។ឆ្នាំនេះជាឆ្នាំទី៣ ក្រសួងក៏បានរៀបចំ ប្រទីប របស់ក្រសួង ចូលរួមបណ្ដែតក្នុងព្រះរាជពិធីបុណ្យអុំទូក ។

ឯកឧត្តម ឈិន កេតនា ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍ និងជាអគ្គលេខាធិការ គណៈកម្មាធិការជាតិរៀបចំបុណ្យជាតិ-អន្តរជាតិនៅថ្ងៃទី ១៣ ខែ វិច្ឆិកា ឆ្នាំ ២០២៣បានឱ្យដឹងថា ព្រះរាជ ពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំនេះ ដែលប្រព្រឹត្តទៅរយៈពេល៣ថ្ងៃ ពោលគឺនៅថ្ងៃទី ២៦-២៧-និង២៨ ខែវិច្ឆិកានៅតាមដងទន្លេសាប មុខព្រះបរមរាជវាំង ។ក្នុងនោះ មានទូក សរុបចំនួន ៣៣៨ នឹងចូលរួមប្រកួត ព្រមទាំងប្រទីបចំនួន៣០ ក៏នឹង បង្ហាញខ្លួនក្នុងព្រះរាជពិធីផងដែរ៕
អត្ថបទ៖ លោក ជិន ម៉ាដេប៉ូ,រូបភាព៖លោក ជីម ភារ៉ា