ភ្នំពេញ៖ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA)និងអ្នកលក់ដូរតាមដងផ្លូវបាន​ស្នើ​ឱ្យរាជរដ្ឋាភិបាលកម្ពុជាពង្រីកវិសាលភាពប្រព័ន្ធគាំពារសង្គមឱ្យដូចអ្នកនៅក្នុងប្រព័ន្ធ ដើម្បីជួយលើកកម្ពស់ជីវភាពរបស់អ្នកលក់ដូរតាមដងផ្លូវឱ្យកាន់តែប្រសើរឡើងថែមទៀត ។នេះបើយោងតាម​សេចក្ដីប្រកាសព័ត៌មាននៅថ្ងៃទី ១៥ ខែវិច្ឆិកា ឆ្នាំ២០២៣ របស់អង្គការអុកស្វាមនិង​សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធដែលបានសហការរៀបចំប្រារព្ធទិវាអន្តរជាតិអ្នកលក់ដូរតាមដងផ្លូវលើកទី១១ក្រោមប្រធានបទ «ប្រព័ន្ធគាំពារសង្គមសម្រាប់អ្នកលក់ដូរតាមផ្លូវនៅកម្ពុជា» ។

សេចក្ដីប្រកាសព័ត៌មានបញ្ជាក់ថា៖ «អ្នកលក់ដូរតាមដងផ្លូវ គឺជាកម្លាំងពលកម្មសេដ្ឋកិច្ចក្រៅប្រព័ន្ធ ឬបុគ្គ​លស្វ័យនិយោជន៍ដែលបានចូលរួមចំណែកក្នុងការបង្កើនសេដ្ឋកិច្ចជាតិដ៏សំខាន់និងបានស្រូបយកកម្លាំងពលកម្មទូទាំងប្រទេស ជាពិសេសបានកាត់បន្ថយការចំណាកស្រុកដោយប្រថុយប្រថាន»។

ប្រភពដដែលថា ៖ «អ្នកលក់ដូរតាមដងផ្លូវក៏ដូចជាកម្មករដទៃដែរ ហេតុដូចនេះពួកគេក៏​អាចមានសិទ្ធិទទួលបានការគាំពារសង្គមដ៏ពេញលេញ»​។

អាជីវករលក់ចំណីអាហារចល័តនៅខណ្ឌដូនពេញ អ្នកស្រី ចាប ចិន្តា បាន​និយាយថា​​ អ្នកស្រី​រីករាយដែលទទួលបានបណ្ណប.ស.ស. ដែលអាចជួយអ្នកស្រី​ទទួលបានសេវាថែទាំសុខភាព តែអីដែលអ្នកស្រី​ចង់បាននោះ បណ្ណនេះអាចគ្របដណ្តប់របបគាំពារសង្គមពេញលេញដូចអ្នកប្រកបមុខរបរក្នុងប្រព័ន្ធដែរ​ ដូចជា គាំពារមាតុភាព គ្រោះថ្នាក់ការងារ និងសោធនកាន់តែប្រសើរ​។

ជាមួយគ្នានេះ លោក វន់ ពៅ ប្រធាន​IDEA  បាន​ថ្លែងឱ្យដឹងនៅថ្ងៃទី​១៥ ខែវិច្ឆិកា​ថា សមាគម បាននិងបន្តធ្វើការចងក្រងផ្តល់ការបណ្តុះបណ្តាល ផ្សព្វផ្សាយ និងធ្វើយុទ្ធនាការគាំពារសង្គមជាមួយអ្នកលក់ដូរតាមដងផ្លូវ ដើម្បីទទួលបានប្រព័ន្ធគាំពារសង្គមសម្រាប់អ្នកលក់ដូរតាមដងផ្លូវឱ្យកាន់តែប្រសើរ។

លោកបន្តថា ​បច្ចុប្បន្ន សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានចងក្រងអ្នកលក់ដូរតាមដងផ្លូវបានចំនួន ២២​ក្រុម ដែលរួមមានសមាជិកសរុប ២៩៩៤​ នាក់ ហើយអ្នកលក់ដូរជាស្រ្តីមានចំនួន​ ២ ៣៧៨​ នាក់ នៅតាមបណ្តារាជធានីភ្នំពេញ​ និងខេត្តចំនួន៦។

លោក វន់ ពៅ បានថ្លែង​ថា ៖ «អ្នកលក់ដូរតាមដងផ្លូវ គឺជាសរសៃឈាមនៃសេដ្ឋកិច្ចជាតិ ។ដូច្នេះយើងស្នើសុំរាជរដ្ឋាភិបាលបន្ត និងពង្រឹងការគាំពារដល់អ្នកលក់ដូរតាមដងផ្លូវឱ្យបានពេញលេញ ជាពិសេសស្ត្រី មិនត្រូវទុកចោលជាដាច់ខាត»។

ចំណែក លោកស្រី ភាណ សោភ័ណ នាយិការបស់អង្គការអុកស្វាម បានលើកឡើងដោយ​កោតសរសើរចំពោះកិច្ចអន្តរាគមន៍របស់រាជរដ្ឋាភិបាលក្នុងការឆ្លើយតបទៅនឹងតម្រូវការរបស់ស្វ័យនិយោជជន ​និងកម្មករនិយោជិតដែលបម្រើការនៅក្នុងសេដ្ឋកិច្ចក្រៅប្រព័ន្ធ តាមរយៈការអនុវត្តគម្រោងរបបសន្តិសុខសង្គមលើប្រព័ន្ធថែទាំសុខភាពតាមរយៈការរួមចំណែកដោយស្ម័គ្រចិត្ត។

លោកស្រីថ្លែងថា ៖ «ខណៈពេលដែលកម្មវិធីនេះនឹងផ្តល់ការការពារដល់ផ្នែកសុខភាព យើងអំពាវនាវឱ្យរដ្ឋា​ភិបាលពន្លឿនការទទួលស្គាល់ផ្លូវច្បាប់ និងការការពារសុខុមាលភាព និងស្ថានភាពសេដ្ឋកិច្ចរបស់អ្នកលក់ដូរតាមដងផ្លូវ ជាពិសេសស្ត្រី»។

លោកស្រីបន្ថែមថា ហើយអង្គការអុកស្វាម ប្តេជ្ញាបន្តការងាររបស់ខ្លួនជាមួយរាជរដ្ឋាភិបាលកម្ពុជា និងអ្នកពាក់​ព័ន្ធដទៃទៀតក្នុងការលើកកម្ពស់ និងធានាការអនុវត្តប្រកបដោយប្រសិទ្ធភាពនៃកិច្ចគាំពារសង្គមប្រកបដោយបរិយាបន្ន។

យោង​តាម​ការ​សិក្សា​របស់​អង្គការ​អុកស្វាម (Oxfam) នៅ​ក្នុង​ឆ្នាំ ២០១៩ បាន​​ប៉ាន់​ប្រមាណ​ថា អ្នក​លក់​ដូរ​តាម​ដង​ផ្លូវ​ក្នុង​ប្រទេស​កម្ពុជា​មាន​ចំនួន​រហូត​ដល់ ១,៦៧៣,៣៩០នាក់ ឬ​ស្មើ​នឹង ១០​ភាគរយនៃ​ចំនួន​ប្រ​ជាពលរដ្ឋ​សរុប​។ ការ​សិក្សា​ដដែល​បាន​ឱ្យ​ដឹង​ទៀត​ថា ក្នុង​ចំណោម ១០​ភាគរយ​នេះ ក្នុង​នោះ​មាន​អ្នក​លក់​ដូរ​តាម​ដង​ផ្លូវ​ជា​ស្ដ្រី​ប្រមាណ​ ៧៥​ភាគរយ​៕

ដោយ៖ជា សុខនី