អណ្ដើកភ្នំ ឬអណ្ដើកព្រិចមួយក្បាលដែលជាសត្វជិតផុតពូជ ត្រូវបានប្រទះឃើញនៅក្នុងដែនជម្រកសត្វព្រៃសៀមប៉ាង
ភ្នំពេញ៖ ក្រុមអ្នកអភិរក្ស អង្គការ USAID មរតកបៃតង បានប្រទះឃើញអណ្ដើកភ្នំ ឬអណ្ដើកព្រិចដែលជាសត្វផុតពូជមួយក្បាលនៅក្នុងដែនជម្រកសត្វព្រៃសៀមប៉ាង ខេត្តស្ទឹងត្រែង កាលពីខែកញ្ញា ឆ្នាំ២០២៣ ខណៈមន្ត្រីជំនាញ និងអង្គការដៃគូកំពុងយកចិត្តទុកដាក់ថែរក្សាការពារ និងអភិរក្ស។
យោងតាមហ្វេសប៊ុកនៃអង្គការ USAID Morodok Baitang-មរតកបៃតងកាលពីថ្ងៃទី១៧ ខែវិច្ឆិកា បានផ្សព្វផ្សាយឱ្យដឹងថា ការប្រទះឃើញអណ្ដើកនេះ គឺជាដំណឹងដ៏ភ្ញាក់ផ្អើល និងរំភើបដោយសារតែសត្វនេះ ជាប្រភេទសត្វជិតផុតពូជបំផុត។ អណ្ដើកភ្នំ ឬអណ្ដើកព្រិច គឺជាប្រភេទសត្វអណ្តើកដែលរស់នៅក្នុងផ្នែកខ្លះនៃអាស៊ីអាគ្នេយ៍។
អង្គការដដែលបានបន្តថា ៖ «សត្វនេះ ត្រូវបានចាត់ថ្នាក់ជាសត្វជិតផុតពូជបំផុត ដោយសារការថយចុះចំនួនរបស់វាជាច្រើនដែលបណ្តាលមកពីការបាត់បង់ទីជម្រក និងការប្រមូលអណ្ដើកនេះ ធ្វើជាឱសថបុរាណ ពាណិជ្ជកម្មសត្វចិញ្ចឹម និងជាអាហារជាដើម»។
បើតាម អង្គការ USAID មរតកបៃតង អណ្ដើកភ្នំ ឬអណ្តើកព្រិច ជាប្រភេទសត្វស៊ីសាច់ និងរុក្ខជាតិ ជាអាហារ។ ដោយឡែក អាហារចម្បងរបស់សត្វអណ្តើកនេះ រួមមានដូចជា ស្លឹកឈើ ផ្លែឈើ ផ្សិត និងសត្វឥតឆ្អឹងខ្នងជាដើម។ អណ្ដើកភ្នំ ឬអណ្តើកព្រិច ភាគច្រើនចំណាយពេលសម្រាកនៅក្នុងគំនរស្លឹកឈើ និងកម្រនឹងចេញត្រូវពន្លឺព្រះអាទិត្យដោយផ្ទាល់។
អណ្តើកប្រភេទនេះភាគច្រើនធ្វើសកម្មភាពនៅពេលព្រឹកព្រលឹមឬពេលព្រលប់ ហើយក្នុងរដូវវស្សា សត្វប្រភេទនេះតែងតែសកម្មជាងធម្មតា។
ប្រភពដដែលបញ្ជាក់ថា ៖ «អណ្ដើកព្រិចត្រូវបានចាត់ថ្នាក់ជាសត្វជិតផុតពូជបំផុតដោយសារតែការថយចុះចំនួនរបស់វាជាច្រើនដែលបណ្តាលមកពីការបាត់បង់ទីជម្រក និងការប្រមូលអណ្ដើកព្រិចធ្វើឱសថបុរាណ ពាណិជ្ជកម្មសត្វចិញ្ចឹម និងជាអាហារ»។
អង្គការ USAID មរតកបៃតង បន្តថា ៖ «ការបង្ហាញខ្លួននៃប្រភេទសត្វជិតផុតពូជបំផុតនេះតែងតែធ្វើឱ្យយើងភ្ញាក់ផ្អើល និងរំភើបណាស់។ ចូលរួម ជាមួយ យើង! ការពារជម្រករបស់ពួកវា និងបញ្ឈប់ការជួញដូរសត្វព្រៃខុសច្បាប់!»។
ទាក់ទិននឹងការប្រទះឃើញអណ្ដើកភ្នំ ឬអណ្ដើកព្រិចមួយក្បាលដែលជាសត្វជិតផុតពូជនេះ លោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង នៅថ្ងៃទី១៩ ខែវិច្ឆិកាបានប្រាប់ឱ្យដឹងថា អណ្តើកមួយក្បាលនេះ ត្រូវបានប្រទះឃើញ កាលពីយូរហើយ។បច្ចុប្បន្នទាំងមន្ត្រី និងអង្គការដៃគូកំពុងយកចិត្តទុកដាក់អភិរក្ស និងការពារជាប្រចាំ ដោយខ្លាចក្រែងមានជនល្មើសទៅបំផ្លិចបំផ្លាញ។
លោក ស្រេង ជាហេង បានប្រាប់ថា មិនមែនតែយកចិត្តទុកដាក់លើការការពារ និងអភិរក្សលើសត្វអណ្តើកប្រភេទនេះ មួយនោះទេ គឺក្រុមមន្ត្រី និអង្គការដៃគូ បានយកចិត្តទុកដាក់ទៅលើការអភិរក្ស និងការពារជីវៈចម្រុះគ្រប់ប្រភេទ ឱ្យតែស្ថិតនៅក្នុងតំបន់ការពាររបស់កម្ពុជា។
យោងតាម អង្គការ Wonders of The Mekong បានពន្យល់ថា អណ្តើកភ្នំ ឬអណ្ដើកព្រិច ឬត្រូវបានគេស្គាល់ម៉្យាងទៀតថាជាអណ្តើកពណ៌លឿង គឺជាសត្វល្មូនដែលងាយនឹងផុតពូជ និងមានដើមកំណើតនៅតំបន់ព្រៃអាស៊ីអាគ្នេយ៍ និងវាលស្មៅ រួមទាំងនៅប្រទេសកម្ពុជាផងដែរ។ សត្វគួរឱ្យស្រឡាញ់ ទាំងនេះត្រូវបានគេស្គាល់តាមរយៈស្នូកដ៏ស្រស់ស្អាត និងពណ៌របស់វា ដែលអាចមានពណ៌ខ្មៅរហូតដល់ត្នោតស្រាល។
សត្វប្រភេទនេះ អាចមានទំងន់ដល់ ៣, ៥ គីឡូក្រាម និងប្រវែង ៣០ សង់ទីម៉ែត្រហើយត្រូវបានគេចាត់ទុកថាជាសត្វអណ្តើក ដែលមានទំហំមធ្យម។ នៅពេលដល់រដូវកាលបន្តពូជ ច្រមុះសត្វអណ្តើកឈ្មោល ចាប់ផ្ដើមប្រែពណ៌ផ្កាឈូក ដើម្បីទាក់ទាញសត្វញី។ សត្វញីអាចទំលាក់ពងរហូតដល់១០ ពងក្នុងមួយលើក៕
ដោយ៖គឹម យុត្ថារ៉ូ
