សេអ៊ូល៖ក្រសួងការបរទេសកូរ៉េខាងត្បូងនៅថ្ងៃសុក្រទី២៤ ខែវិច្ឆិកា ឆ្នាំ២០២៣នេះ បានឱ្យដឹងថា រដ្ឋមន្ត្រី​ការ​បរទេស​​​​នៃប្រទេសបី រួមមាន កូរ៉េខាងត្បូង ចិន និងជប៉ុន នឹងរៀបចំកិច្ចប្រជុំកំពូលត្រីភាគីជា​លើកដំបូង​របស់ពួកគេឡើងវិញក្នុ​ង​រយៈពេលបួនឆ្នាំ នាថ្ងៃអាទិត្យខាងមុខនេះនៅក្នុង​ប្រទេស​កូរ៉េខាងត្បូង​។

ប្រទេសជាប់ខាងទាំងបីនេះបានយល់ព្រមរៀបចំកិច្ចប្រជុំកំពូលជារៀងរាល់ឆ្នាំ ដោយមានការ​ចាប់ផ្តើម​តាំង​ពីឆ្នាំ ២០០៨ មកដើម្បីជំរុញកិច្ចសហប្រតិបត្តិការក្នុងតំបន់ ក៏ប៉ុន្តែផែនការនេះត្រូវ​បានបង្អាក់​ដោយ​ជម្លោះទ្វេភាគី​ជានិច្ចជាកាល បូករួមទាំងការរីករាលដាលនៃជំងឺកូវីដ១៩ផង។ កិច្ចប្រជុំកំពូល​ចុងក្រោយ​នៃ​ប្រទេសសេដ្ឋកិច្ចយក្សអាស៊ីទាំង៣ នេះបានធ្វើឡើង​នៅឆ្នាំ ២០១៩។

សម្រាប់ឆ្នាំ២០២៣ កិច្ចប្រជុំរបស់រដ្ឋមន្ត្រីការបរទេស​ដែលជាកិច្ចប្រជុំលើកដំបូងចាប់តាំងពីឆ្នាំ ២០១៩​មក នឹងប្រព្រឹត្តទៅនៅកំពង់ផែមួយនៃទីក្រុងប៊ូសាន( Busan) របស់កូរ៉េខាងត្បូង​។ កិច្ចប្រជុំនេះដែរ គឺ​ត្រូវបាន អ្នកកា​រ​ទូតជាន់ខ្ពស់នៃប្រទេសទាំងបីយល់ព្រមរៀបចំតាំងតែពីខែកញ្ញាមកម្ល៉េះ។

​បើ​តាម​សេចក្តី​ថ្លែងការណ៍​មួយ​របស់ក្រសួង​ការ​បរទេស​កូរ៉េ​ខាង​ត្បូង​បានឱ្យដឹងថា៖«រដ្ឋមន្ត្រីការ បរទេស​គ្រោង​នឹងផ្លាស់ប្តូរទស្សនៈ លើទិសដៅនៃការអភិវឌ្ឍន៍កិច្ចសហប្រតិបត្តិការត្រីភាគី រួម
ទាំងការត្រៀមរៀប​ចំ​សម្រាប់កិច្ចប្រជុំកំពូលត្រីភាគីលើកទី៩ បូករួមទាំងការពិភាក្សាលើបញ្ហាតំបន់ និងពិភពលោក»។

គួរជម្រាបថា កិច្ចពិភាក្សានេះធ្វើឡើងចំពេលដែលកូរ៉េខាងត្បូង និងជប៉ុន មានការកែលម្អទំនាក់ទំនង រវាងគ្នា​ហើយថែម​ទាំងពង្រឹងកិច្ចសហប្រតិបត្តិការសន្តិសុខជាមួយសហរដ្ឋអាមេរិក។ដោយឡែក សម្រាប់ភាគីរដ្ឋាភិបាល​ក្រុងប៉េកាំងធ្លាប់បានព្រមានថា កិច្ចខិតខំប្រឹងប្រែងរបស់​សហរដ្ឋអាមេរិកក្នុង​ការពង្រឹង​ទំនាក់ទំនង​ជាមួយកូរ៉េខាងត្បូង និងជប៉ុនអាចបង្កើនភាពតានតឹង និងការប្រឈមមុខ​គ្នា​នៅ​ក្នុងតំបន់។

បន្ថែមពីលើនេះ កិច្ចប្រជុំនៅទីក្រុងប៊ូសាន ក៏ធ្វើឡើងបន្ទាប់ពីកូរ៉េខាងជើងបាននិយាយ​នៅសប្តាហ៍​នេះថា ខ្លួនបានបាញ់​ផ្កាយរណបចារកម្មដំបូង​របស់ខ្លួនចូល​ទៅក្នុងគន្លង​តារាវិថីដោយជោគជ័យ ដែល​ទាញការ​ថ្កោលទោស​ជាអន្តរជាតិចំពោះការរំលោភលើដំណោះស្រាយរបស់អង្គការសហប្រជាជាតិ៕

ប្រែសម្រួល៖ ស្រ៊ុន សិរីវឌ្ឍនៈ

ប្រភព៖ https://www.reuters.com/world/asia-pacific/foreign-ministers-skorea-china-japan-meet-sunday-seoul-2023-11-24/