យោធាចិនចោទប្រកាន់អាមេរិកថា បានរំលោភដែនអធិបតេយ្យភាពក្រោយការបើកនាវាចូលដែនទឹកខ្លួនដោយខុសច្បាប់
ប៉េកំាង៖យោធាចិននាថ្ងៃទី៤ ខែធ្នូនេះបានអះអាងថា កប៉ាល់ប្រយុទ្ធរបស់អាមេរិកមួយគ្រឿង បានចូលដែនទឹករបស់ខ្លួន ស្ថិតនៅតំបន់កោះ Thomas Shoal ដែលជាតំបន់ជម្លោះដ៏ក្ដៅនៃសមុទ្រចិនខាងត្បូង។
តាមរយៈការលុកលុយដោយខុសច្បាប់របស់អាមេរិកបែបនេះ អ្នកនាំពាក្យរបស់យោធាចិនបាន និយាយដោយសង្កត់ធ្ងន់ថា ៖ «អាមេរិកបានធ្វើឱ្យខូចខាតយ៉ាងខ្លាំងដល់សន្តិភាព និងស្ថេរភាពក្នុងតំបន់។ សហរដ្ឋអាមេរិកមានចេតនារំខានដល់សមុទ្រចិនខាងត្បូង និងបានរំលោភយ៉ាងធ្ងន់ធ្ងរ លើអធិបតេយ្យភាពរបស់ចិន»។
អ្នកនាំពាក្យយោធាចិនដដែល បាននិយាយទៀតថា កងទ័ពរំដោះប្រជាជនចិនបានរៀបចំកងទ័ពដែនសមុទ្រដើម្បីតាមដាន និងត្រួតពិនិត្យនាវាអាមេរិក ហើយថាកងទ័ពរបស់ខ្លួនដែលកំពុងនៅក្នុងតំបន់នោះស្រាប់ មានការប្រុងប្រយ័ត្នខ្ពស់គ្រប់ពេលវេលាដើម្បីការពារអធិបតេយ្យភាពជាតិយ៉ាងម៉ឺងម៉ាត់។
យ៉ាងណាក៏ដោយ មិនត្រឹមតែអាមេរិកប៉ុណ្ណោះទេ ប្រទេសចិនកំពុងមានជម្លោះជាមួយប្រទេសជិតខាងមួយចំនួនជុំវិញការទាមទារដែនទឹកយ៉ាងទូលំទូលាយនៅក្នុងសមុទ្រចិនខាងត្បូងផងដែរ។
ក្នុងរយៈពេលប៉ុន្មានខែថ្មីៗនេះផងដែរ ចិនក៏មានការប្រឈមមុខដាក់គ្នាជាច្រើនលើក ច្រើនសារជាមួយនាវាហ្វីលីពីន ព្រមទាំងបានតវ៉ាពីវត្តមានកប៉ាល់អាមេរិកដែលកំពុងល្បាតនៅតំបន់ជម្លោះទៀតផង។
លើសពីនេះទៅទៀត កាលពីថ្ងៃទី៣ ខែធ្នូកន្លងមកនេះ ឆ្មាំសមុទ្រហ្វីលីពីនថែមទាំងបានដាក់ពង្រាយនាវារបស់ខ្លួនចំនួនពីរ ដើម្បីតាមដានវត្តមានរបស់កប៉ាល់ចិនខុសច្បាប់នៅលើសមុទ្រចិនខាងត្បូង ដែលត្រូវបានហ្វីលីពីនហៅថា «សមុទ្រហ្វីលីពីនខាងលិច»៕
ប្រែសម្រួល៖កែវ បុស្បា
ប្រភព៖ China’s military says US combat ship illegally entered territorial waters in South China Sea
