ភ្នំពេញ៖ស្ថាប័នអន្តរជាតិប្រចាំកម្ពុជា រួមមាន ស្ថានទូតអូស្ត្រាលី ធនាគារពិភពលោក គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ(គ.ជ.អ.ប.)និងអង្គការទស្សនៈពិភពលោកអន្តរជាតិនៅកម្ពុជា (WVI-C) បានប្រកាសបន្ថែមថវិកាចំនួន១៥លានដុល្លាអូស្រ្តាលី ដើម្បីបន្តរយៈ​​ពេលនៃការអនុវត្តគម្រោងគណនេយ្យភាពសង្គម (ISAF)។ការប្រកាសនេះ ត្រូវបានធ្វើឡើងតាមរយៈ​​សេចក្តីប្រកាសព័ត៌មានរួម​ដែល​បានចេញផ្សាយ នា​ថ្ងៃទី៥​​ ខែធ្នូ ឆ្នាំ២០២៣។​

សេចក្តីប្រកាសព័ត៌​មាន​រួម​ បានលើកឡើង​ថា គម្រោងអនុវត្តក្របខ័ណ្ឌគណនេយ្យភាពសង្គម ដំណាក់កា​លទី២ (ISAF II)​ នេះគឺ​ចាប់ផ្តើមអនុវត្ត​ពីឆ្នាំ​២០២៣-២០២៥ ដែលមានគោលបំណងជួយប្រជាពលរដ្ឋ ក្នុ​ងការស្វែងយល់អំពីសេវាសាធារណៈ ដែលពួកគេមានសិទ្ធិនឹងទទួលបាន ព្រមទាំងផ្តល់សិទ្ធិអំណាចដល់ពួ​កគេ ក្នុងការផ្តល់មតិកែលម្អជាប្រចាំលើគុណភាពនៃសេវាសាធារណៈ។​

ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ បានបញ្ជា​ក់ក្នុងសេចក្តីប្រកាសព័ត៌មាន​ថា ការងារគ​ណ​នេ​យ្យភាពសង្គម ជាផ្នែកមួយដ៏សំខាន់នៃកិច្ចដំណើរការកំណែទម្រង់វិមជ្ឈការ និងវិសហមជ្ឈការ របស់រាជរដ្ឋាភិបាលកម្ពុជា ដើម្បីធានាដល់ការលើកកម្ពស់ការប្រាស្រ័យទាក់ទងគ្នារវាងអាជ្ញាធរមូលដ្ឋាន និងប្រជាព​លរដ្ឋ ក្នុងកិច្ចដំណើរការអភិបាលកិច្ច និងការអភិវឌ្ឍមូលដ្ឋាន។​

ឯកឧត្តមបានបន្ថែមថា ៖ «ដោយសហការជាមួយនឹងអង្គការជាតិ អង្គការអន្តរជាតិ និងដៃគូអភិវឌ្ឍន៍ យើងប្រា​កដជាអាចធ្វើឱ្យប្រសើរឡើងនូវសេវាសាធារណៈនៅមូលដ្ឋាន សម្រាប់កុមារ និងប្រជាពលរដ្ឋ រាប់លានគ្រួសារនៅទូទាំងប្រទេសកម្ពុជា ដែលស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដំណាក់កាលទី១»។ ​

ជាមួយគ្នានេះឯកឧត្តម ចាស្ទីន​ វ៉ាយអេត ឯកអគ្គរដ្ឋទូតអូស្ត្រាលីប្រចាំនៅកម្ពុជា ក៏​បានលើកឡើងដែរថា គម្រោ​ងអនុវត្តក្របខណ្ឌគណនេយ្យភាពសង្គម ដំណាក់កាលទី២នេះ នឹងបន្តបង្កើនទំនាក់ទំនងរវាងអ្នកផ្តល់​សេវាសាធារណៈ និងអ្នកទទួលសេវាសាធារណៈ ដើម្បីធ្វើឱ្យ​ប្រសើរឡើងនូវការផ្តល់សេវាសាធារណៈ ព្រ​ម​ទាំងជួយ​ប្រជាជនកម្ពុជាទាំងអស់អាចមានលទ្ធភាពទទួលបានសេវាសាធារណៈផងដែរ។

លោកបានថ្លែង​ថា ៖ «​យើងក៏សង្ឃឹមផងដែរ​ថា តាមរយៈការបន្តដំណើរការគម្រោងនេះ នឹងជួយបង្កើនភា​ពជឿជាក់ និងភាពជាដៃគូនៅតាមថ្នាក់មូលដ្ឋាន»។​

ចំណែកនាយកប្រចាំប្រទេសរបស់អង្គការទស្សនៈពិភពលោកអន្តរជាតិ ប្រចាំនៅកម្ពុជា លោក ជេនេស អ៊ីម៉ានូអែល ហ្គីនទីញ ក៏បានសង្កត់ធ្ងន់ដែរថា អង្គការលោក​បានគាំទ្រការអនុវត្តក្របខណ្ឌគណនេយ្យភាពស​ង្គ​មតាំងពីឆ្នាំ២០១៦ មកម្ល៉េះ។ លោកបន្តថា ហេតុនេះ ​គម្រោងនេះពិតបានរួមចំណែកក្នុងការលើកកម្ពស់គុ​ណភាពនៃសេវាសាធារណៈសំខាន់ៗ ដូចជា សេវានៅមណ្ឌលសុខភាព សាលាបឋមសិក្សា និងសេវារដ្ឋបា​លនៅឃុំ/សង្កាត់ជាដើម។​

​លោកបានបញ្ជាក់ថា​ ៖​ «ក្រោមជំនួយថវិកាបន្ថែមពីរដ្ឋាភិបាលអូស្ត្រាលី តាមរយៈធនាគារពិភពលោកនាពេលនេះ យើងនឹងពង្រីកវិសាលភាពតំបន់ការងារគណនេយ្យភាពសង្គមជាមួយអង្គការដៃគូក្នុងស្រុក ដោ​យបន្តលើកកម្ពស់ការផ្តល់សេវាសាធារណៈ ក្នុងឃុំគោលដៅសរុបចំនួន ១ ០៤៣ សាលាបឋមសិក្សាចំនួន ៤ ៦៣៣ និងមណ្ឌលសុខភាពចំនួន ៨២៦ ដែលនឹងផ្តល់អត្ថប្រយោជន៍ដល់ប្រជាជនកម្ពុជាជាង ៥ លាននាក់នៅត្រឹមឆ្នាំ ២០២៥»។​

បើតាមសេចក្តីប្រកាសព័ត៌មានរួមដដែលនេះ​ គម្រោងគណនេយ្យភាពសង្គម​ ដំណាក់កាលទី២នេះ ​ទទួ​ល​បា​នថវិកាហិរញ្ញប្បទានក្រោមគម្រោង «ភាពជាដៃគូរវាងប្រទេសអូស្រ្តាលី និងធនាគារពិភពលោក ដើមី្ប​លើ​​កកម្ពស់បរិយាបន្ន និរន្តរភាព និងសមធម៌នៅកម្ពុជា»​ ដែលបានផ្តល់ហិរញ្ញប្បទានបន្ថែមដល់មូលនិធិបរធនបាលកិច្ចរបស់ធនាគារពិភពលោកចំនួន ១៥លានដុល្លារ​អូស្រ្តាលី។​

គម្រោងនេះ ក៏នឹងមានដំណើរការពង្រឹង និងរៀបចំរចនាសម្ព័ន្ធប្រព័ន្ធ និងដំណើរការ ដែលបង្កើនការចូលរួម​របស់ប្រជាពលរដ្ឋ នឹងពង្រឹងនូវតម្លាភាព និងកែលម្អគុណភាពសេវាសាធារណៈឱ្យកាន់តែប្រសើរឡើង ស្រ​បតាមអាទិភាពរបស់រាជរដ្ឋាភិបាលកម្ពុជា ក្រោមកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យ​នៅ​ថ្នាក់ក្រោមជាតិ ដំណាក់កាលទី២ ឆ្នាំ២០២១-២០៣០ផងដែរ៕

ដោយ៖បូរ ពេជ្រហ្សាលីន