ស្រ្តីតំណាងជនជាតិដើមភាគតិចម្នាក់ បានចូលរួមថ្លែងក្នុងសន្និសីទកំពូលរបស់អង្គការសហប្រជាជាតិ
ភ្នំពេញ៖អ្នកស្រី គឿង ណាវី ស្រ្តីដឹកនាំសហគមន៍ជនជាតិដើមភាគតិចព្នង និងជាតំណាងសហគមន៍ជនជាតិដើមភាគតិចនៃប្រទេសកម្ពុជា បានចូលរួមក្នុងសន្និសីទកំពូលនៃបណ្ដាភាគីអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុលើកទី២៨ ឆ្នាំ២០២៣ (COP28) ដើម្បីថ្លែងពីសារៈសំខាន់នៃហិរញ្ញប្បទានកាបូនក្នុងការពង្រឹងសិទ្ធិអំណាចសហគមន៍ជនជាតិដើមភាគតិច។
សន្និសីទកំពូលនៃបណ្ដាភាគីអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុលើកទី២៨ ឆ្នាំ២០២៣ (COP28) បានរៀបចំឡើងនៅទីក្រុងឌូបៃ នៃសហភាពអារ៉ាប់អេមីរ៉េត។
សេចក្តីប្រកាសព័ត៌មានរបស់អង្គការសមាគមអភិរក្សសត្វព្រៃ (WCS) នៅថ្ងៃទី៥ ខែធ្នូ បានឱ្យដឹងថា អ្នកស្រី គឿង ណាវី ប្រធានសហគមន៍ស្រ្តីតំណាងឱ្យសហគមន៍ជនជាតិដើមភាគតិចព្នងក្នុងដែនជម្រកសត្វព្រៃកែវសីមា ខេត្តមណ្ឌលគិរី បានចូលរួមក្នុងសន្និសីទកំពូលនៃបណ្ដាភាគីអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុលើកទី២៨ ឆ្នាំ២០២៣ (COP28) ដើម្បីបង្ហាញពីអត្ថប្រយោជន៍ពិតប្រាកដនៃហិរញ្ញប្បទានកាបូនក្នុងការអភិរក្សព្រៃឈើ។
ការចូលរួមរបស់ អ្នកស្រី គឿង ណាវី បានធ្វើឡើងក្រោមការសម្របសម្រួលដោយក្រសួងបរិស្ថាននៃប្រទេសកម្ពុជា និងអង្គការសមាគមអភិរក្សសត្វព្រៃ (WCS) ដោយផ្តោតលើសារសំខាន់នៃការផ្តល់ហិរញ្ញប្បទានកាបូនដោយផ្ទាល់ទៅដល់សហគមន៍ជនជាតិដើមភាគតិចក្នុងកិច្ចការងារអភិរក្សប្រកបដោយប្រសិទ្ធភាព និងនិរន្តរភាព។
អង្គការ WCS បានបញ្ជាក់ថា ៖ «អ្នកស្រី ណាវី បានបង្កើតទំព័រប្រវត្តិសាស្រ្តថ្មីមួយក្នុងនាមជាវាគ្មិនជនជាតិដើមភាគតិចព្នងដំបូងគេបង្អស់ដែលបានចូលរួមថ្លែងនៅក្នុងសន្និសីទកំពូលមួយរបស់អង្គការសហប្រជាជាតិបែបនេះ ដើម្បីពាំនាំសារពីភូមិឋានដែលដាច់ស្រយាលក្នុងព្រៃនៃខេត្តមណ្ឌលគិរីមកកាន់ថ្នាក់ដឹកនាំកំពូលៗនៅលើសកលលោក»។
តាមរយៈសេចក្តីប្រកាសព័ត៌មានដដែលនេះ អ្នកស្រី គឿង ណាវី បានថ្លែងនាឱកាសនោះថា៖ «នាងខ្ញុំពិតជាមានសេចក្តីរំភើបក្នុងចិត្ត ជាមួយនឹងក្តីកត្តញូ។ នាងខ្ញុំពិតជាមានកិត្តិយសណាស់ដែលបានមកដល់ទីនេះ ចេញពីភូមិតូចមួយនៃប្រទេសកម្ពុជា មកនិយាយទៅកាន់ថ្នាក់ដឹកនាំកំពូលៗនៃពិភពលោក»។
អ្នកស្រីបានបន្ថែមទៀតថា៖ «យើងខ្ញុំបានប្រើប្រាស់ហិរញ្ញប្បទានកាបូនដើម្បីកសាងសហគមន៍ និងការពារបរិស្ថាន ដោយរួមបញ្ចូលគ្នានូវរបៀបរស់នៅបែបប្រពៃណីជាមួយនឹងវិធីសាស្ត្រច្នៃប្រឌិតថ្មីៗដើម្បីការពារព្រៃឈើរបស់យើង»។
អ្នកស្រី បញ្ជាក់ទៀតថា ជំនួយផ្នែកហិរញ្ញវត្ថុដែលសហគមន៍ទទួលបាន គឺមានតម្លៃខ្លាំងណាស់ក្នុងការទប់ទល់នឹងកត្តាគំរាមកំហែងដល់ព្រៃឈើក្នុងសហគមន៍ ខណៈអ្នកស្រីថា ព្រៃឈើនៅក្នុងសហគមន៍ស្ថិតក្នុងចំណោមព្រៃក្រាស់បំផុត និងមានសុខភាពល្អបំផុតក្នុងប្រទេសកម្ពុជា ដែលវាជាសក្ខីភាពបញ្ជាក់ពីការប្ដេជ្ញាចិត្ត និងការថែទាំរបស់ជនជាតិដើមភាគតិចព្នងផងដែរ។
អ្នកស្រី បានបន្តថា ហិរញ្ញប្បទានកាបូនបានជួយលើកកម្ពស់សហគមន៍របស់អ្នកស្រី និងសហគមន៍ជនជាតិដើមភាគតិចផ្សេងទៀតនៅទូទាំងពិភពលោក ហើយវាក៏បានពង្រីកអត្ថប្រយោជន៍ដល់ពិភពលោកទាំងមូល ខណៈអ្នកស្រី ក៏បានប្តេជ្ញាចិត្តចំពោះដំណោះស្រាយនៃការប្រែប្រួលអាកាសធាតុថែមទៀត។
តាមរយៈការថ្លែងឡើងនេះដែរ អង្គការ WCS ក៏បានបញ្ជាក់ដែរថា មតិរបស់អ្នកស្រី ណាវី ត្រូវបានផ្សាយខ្ទរខ្ទារក្នុងសន្និសីទ COP28 ហើយទាញចំណាប់អារម្មណ៍ឱ្យអ្នករាល់គ្នាដឹងថា វឌ្ឍនភាពនៃហិរញ្ញប្បទានអាកាសធាតុគឺជាគន្លឹះនៃការផ្លាស់ប្ដូរដ៏ត្រឹមត្រូវមួយ និងចូលរួមកាត់បន្ថយការបំភាយឧស្ម័ននៅទូទាំងពិភពលោក។ ជាងនេះទៀត សុន្ទរកថារបស់អ្នកស្រី ដែលបានថ្លែងក្នុងសន្និសីទនេះ ក៏បានទាក់ទាញចំណាប់អារម្មណ៍យ៉ាងខ្លាំងលើតួនាទីដ៏សំខាន់នៃហិរញ្ញប្បទានកាបូនក្នុងការពង្រឹងសិទ្ធិអំណាចសហគមន៍ជនជាតិដើមភាគតិច។
ប្រភពដដែលបានបន្តថា នេះស្របទៅនឹងប្រធានបទដែលសន្និសីទ COP28 បានផ្ដោតការយកចិត្តទុកដាក់ក្នុងការពន្លឿនសកម្មភាពនានាដើម្បីប្រយុទ្ធប្រឆាំងនឹងការប្រែប្រួលអាកាសធាតុ រួមទាំងសារសំខាន់នៃការអនុវត្តយន្តការហិរញ្ញប្បទានដូចជាគម្រោងរេដបូក (REDD+) ក្នុងការគាំទ្រដល់កិច្ចខិតខំប្រឹងប្រែងទាំងនេះ។ លើសពីនេះ ការបង្ហាញបទពិសោធរបស់អ្នកស្រី ណាវី នៅក្នុងសន្និសីទ COP28 នេះផងដែរ ក៏បានផ្តោតសំខាន់លើកិច្ចខិតខំប្រឹងប្រែងរួមក្នុងសកម្មភាពទប់ស្កាត់ការប្រែប្រួលអាកាសធាតុ។
បើតាមអង្គការសមាគមអភិរក្សសត្វព្រៃ (WCS) បានឱ្យដឹងដែរថា អ្នកស្រី ណាវី ក៏នឹងចូលរួមជាវាគ្មិនក្នុងកម្មវិធីមួយផ្សេងទៀតក្រោមប្រធានបទ «តើហិរញ្ញប្បទានកាបូនបង្កើតឱកាសដល់ជនជាតិដើមភាគតិចនិងសហគមន៍មូលដ្ឋានយ៉ាងដូចម្ដេច?» នៅថ្ងៃទី១១ ខែធ្នូខាងមុខនេះ នៅវិមានជនជាតិដើមភាគតិចដែលរៀបចំដោយអង្គការក្រុមប្រឹក្សាសុចរិតភាពសម្រាប់ទីផ្សារកាបូនស្ម័គ្រចិត្ត (Integrity Council for Voluntary Carbon Markets) អង្គការធម្មជាតិដើម្បីអាកាសធាតុ (Nature4Climate) និងមូលនិធិការពារបរិស្ថាន (Environmental Defense Fund)ថែមទៀត។
សូមបញ្ជាក់ថា ក្នុងឱកាសចូលរួមសន្និសីទកំពូលបណ្តាភាគី នៃអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុលើកទី២៨ (COP28) នៅទីក្រុងឌូបៃ ប្រទេសអារ៉ាប់អេមីរ៉ាត់ លោក អ៊ាង សុផល្លែត រដ្ឋមន្រ្តីក្រសួងបរិស្ថាន ក៏បានថ្លែងឡើងដែរថា កម្ពុជាចាត់ទុកឥណទានកាបូនជាប្រភពធនធានហិរញ្ញប្បទាន ប្រកបដោយចីរភាពដ៏សំខាន់មួយ សម្រាប់សកម្មភាពកាត់បន្ថយការបញ្ចេញឧស្ម័នផ្ទះកញ្ចក់។
ជាងនេះទៀតឯកឧត្តមរដ្ឋមន្រ្តី ក៏បានលើកឡើងពីវិស័យអាទិភាព និងការវិនិយោគបៃតងនៅកម្ពុជា ការប ង្កើនគម្របព្រៃឈើឱ្យបាន៦០ភាគរយ ការលើកកម្ពស់ជីវភាពសហគមន៍តាមរយៈការដាំឬស្សី និងការជំរុញកម្ពុជាស្អាតតាមរយៈយុទ្ធនាការមិនប្រើថង់ប្លាស្ទិក ដើម្បីធានាឱ្យប្រជាពលរដ្ឋគ្រប់រូប ទទួលបាននូវថាមពលនិរន្តរភាព ក្នុងតម្លៃសមរម្យ និងមានការបញ្ចេញកាបូនទាប៕
ដោយ៖បូរ ពេជ្រហ្សាលីន
