លោកជំទាវគាំ  គឹម អាន  អនុរដ្ឋលេខាធិការក្រសួងព្រះបរមរាជរាំង  និងមន្ដ្រីក្រោមឱវាទ នៅព្រឹកថ្ងៃទី១៨ ខែកក្កដា ឆ្នាំ២០១៩ បាននំាយកនូវព្រះរាជអំណោយរបស់សម្ដេច ព្រះមហាក្សត្រី  ព្រះវររាជមាតាជាតិខ្មែរ   ជាទីគោរពសក្ការៈដ៏ខ្ពង់ខ្ពស់   ប្រគេនសម្ដេចព្រះសាក្យមុនី រ័ត្ន  សារឿន  ដែលគង់នៅវត្តសំរោងអណ្ដែត។
លោកជំទាវ  អនុរដ្ឋលេខាធិការក្រសួងព្រះបរមរាជរាំង  មានប្រសាសន៍ថា  សម្ដេចព្រះមហាក្សត្រី  ព្រះវររាជមាតាជាតិខ្មែរ  បានសព្វព្រះរាជហរទ័យ   បានព្រះរាជទាន  ព្រះរាជអំណោយទានចំណាំព្រះវស្សានេះ  ដើម្បី ជួយទំនុកបម្រុងដល់ភិក្ខុសង្ឃ និងសាមណេ  ដែលបានគង់ចាំព្រះវស្សា  សម្រាប់គង់សិក្សារៀនសូត្រព្រះធម៌វិន័យអោយបានខ្ជាប់ខ្ជួនតាមពុទ្ធឱវាទរបស់ព្រះ  ដែលមានរយ:ពេល០៣ខែ ។ លោកជំទាវបន្តថា   ព្រះរាជទាន  ព្រះរាជអំណោយទានចំណាំព្រះវស្សានេះ  គឺមានអង្ករចំនួន៥០ប៉ាវ  ដែលក្នុងមួយប៉ាវទម្ងន់៥០គីឡូក្រាម ។
សម្ដេចព្រះសក្យមុនី កិតិ្ដបណ្ឌិតទស្សនវិជ្ជារ័ត្ន សារឿន សមាជិកថេរៈសភាសង្ឃនៃពុទ្ធសាសនាកម្ពុជា  ព្រះអនុគណខណ្ឌ សែន សុខ និងជាព្រះចៅអធិការវត្ដសំរោងអណ្ដែត  បានថ្លែងព្រះរាជអណរគុណយ៉ាងជ្រាលជ្រៅបំផុតចំពោះ សម្ដេចព្រះមហាក្សត្រី  ព្រះវររាជមាតាជាតិខ្មែរ  ជាទី គោរព សក្ការៈ ដ៏ខ្ពង់ខ្ពស់បំផុត   ដែលបានចាត់ព្រះរាជតំណាង  នាំយកព្រះរាជទាន  ព្រះរាជអំណោយ របស់ព្រះអង្គមកប្រគេនដល់វត្ដសំរោងសណ្ដែតនាពេលនេះ។
សម្ដេចព្រះសក្យមុនី  បានសម្ដែងនូវព្រះទ័យសប្បាយរីកដែលសម្ដេចព្រះមហាក្សត្រី តែងតែ  ព្រះរាជសព្វហរទ័យអោយព្រះរាជតំណាង របស់ព្រះអង្គ នាំយកព្រះរាជទាន ជាញឹកញាប់ដល់សម្ដេច។នេះជាការយកចិត្ដទុកដាក់  និងកាយវិការមួយ  ដើម្បីលើកកម្ពស់លើវិស័យព្រះពុទ្ធសាសនារបស់រដ្ឋ។
សម្ដេចព្រះសក្យមុនី  បានមានសង្ឃដីការថ្វាយព្រះពរសូមសម្ដេចព្រះមហាក្សត្រី  មានព្រះរាជសុខភាពល្អ បរិបូរណ៍  និងមានព្រះជន្មយឺនយូរ  ដើម្បីគង់ជាម្លប់ដ៏ត្រជាក់បំផុតដល់កូនចៅ  និងភាពរីកចម្រើនរុងរឿងទាំងវិស័យពុទ្ធចក្រ   និងអាណាចក្រក្នុងព្រះរាជណាចក្រកម្ពុជាតរៀងទៅ៕
ដោយ៖ លោកសុខ ស៊ីថន