តូក្យូ៖សារព័ត៌មាន​ក្នុង​ជប៉ុន​បាន​រាយការណ៍​​​ថា​ ​រដ្ឋ​មន្ត្រី​នៃ​រដ្ឋាភិបាល​ជប៉ុន​ចំនួន​​បី​​នាក់​បាន​លាលែង​ចេញ​ពី​តំណែង​របស់​ខ្លួននៅ​ថ្ងៃ​ព្រហស្បតិ៍​ទី១៤ ខែធ្នូនេះ​ ​​ជុំ​វិញ​រឿង​អាស្រូវ​ពុក​រលួយ​ដ៏​ធំ​​​​​​​ក្នុង​គណបក្ស​កាន់​អំណាច​។

​បើ​តាម​ការ​ផ្សាយ​​បន្ត​របស់​ទីភ្នាក់ងារ​សារព័ត៌មាន​ AFP​  ​រឿង​អាស្រូវ​ដ៏​ធំ​នោះ​ ​ពាក់​ព័ន្ធ​នឹង​ការ​ចោទ​ប្រកាន់​ពី​ការ​ទទួល​បាន​ប្រាក់​​កិប​កេង​​​​ចំនួន​ ៥០០ លាន​យ៉េន​ (៣,៤ លាន​ដុល្លារ​) ​​ក្នុង​គណបក្ស​ប្រជាធិបតេយ្យ​សេរី (LDP)​ ដែល​មាន​លោក​​នាយក​រដ្ឋ​មន្រ្តី​ ហ្វូមីអូ​ គីហ្ស៊ីដា​ ជា​ប្រធាន​។ ​

​រដ្ឋ​មន្រ្តី​​ដែ​ល​​លា​លែង​​ចេញ​ពី​​តំណែង​​រួម​មាន​​ ​រដ្ឋ​មន្ត្រី​​សេដ្ឋកិច្ច​ និង​​ឧស្សាហកម្ម​ លោក​ អ៊ីយ៉ាស៊ូតូស៊ី នីស៊ីមូរ៉ា(Yasutoshi Nishimura) ​រដ្ឋ​មន្ត្រី​​កិច្ចការ​​ផ្ទៃ​ក្នុង​ ,លោក​ ចូនជី ស៊ូហ្សូគី (Junji Suzuki )​និង​​រដ្ឋ​មន្ត្រី​​កសិកម្មលោក​ អ៊ីជីរ៉ូ មីយ៉ាស៊ីតា (Ichiro Miyashita) ​។

លោក​​ Nishimura ​បាន​​ប្រាប់​​អ្នក​​យក​​ព័ត៌មាន​​ថា​៖​ ​«​ការ​​សង្ស័យ​​របស់​​សាធារណជន​​​វិល​វល់​​​ជុំ​វិញ​​ខ្ញុំ​ពាក់​ព័ន្ធ​នឹង​​​មូលនិធិ​​នយោបាយ​ ដែល​​នាំ​​​ឱ្យ​​មាន​​ការ​​មិន​​ទុក​​ចិត្ត​​លើ​​រដ្ឋាភិបាល​។​ ខណៈ​​ដែល​​ការ​​ស៊ើប​អង្កេត​​កំពុង​​បន្ត ​ខ្ញុំ​​ចង់​ធ្វើ​អ្វី​ដែល​ត្រូវ​»។ ​

ការ​លា​លែងដោយ​សារ​តែរឿង​អាស្រូវ​​នេះ​ ហាក់​ធ្វើ​ឱ្យ​ថ្នាក់​ដឹក​នាំ​រដ្ឋាភិបាល​ជប៉ុន​​មាន​ការ​កក្រើ​ក​ខ្លាំង​។ បើ​តាម​សារព័ត៌មាន​ក្នុង​ស្រុក​ជប៉ុន​ ប្រធាន​ខុទ្ទកាល័យ​ និង​​ប្រធាន​អ្នក​នាំ​ពាក្យ​របស់​រដ្ឋាភិបាល​ជប៉ុន​​ ​ លោក​ Hirokazu Matsuno ​បាន​បញ្ជាក់​ថា​ លោក​ក៏​​នឹង​​​លាលែង​​តាម​​ក្រោយ​ជា​មួយ​គ្នា​ដែរ​។ ​​លោក​ Michiko Ueno ​ទីប្រឹក្សា​ពិសេស​របស់​នាយក​រដ្ឋ​មន្ត្រី​ ក៏​នឹង​ធ្វើ​ដូច​គ្នា​ រួម​ជាមួយ​​អនុរដ្ឋ​មន្ត្រី​ចំនួន​​៥​រូប​ ផ្សេង​ទៀត​។ ​

លោក​នាយក​រដ្ឋ​មន្ត្រី​ គីហ្ស៊ីដា​ ឯណោះ​វិញ​ ​បាន​និយាយ​កាល​ពី​ថ្ងៃ​ពុធ​​ថា​ ​នឹង​មាន​ការ​ផ្លាស់​ប្តូរ​បុគ្គលិក​រដ្ឋាភិបាល​​នៅ​ថ្ងៃ​ព្រហស្បតិ៍​ ខណៈ​​លោក​បាន​សន្យា​ថា​នឹង​ដោះ​ស្រាយ​ជាមួយ​នឹង​ការ​ចោទ​ប្រកាន់នេះ​។​

គេ​មើល​ឃើញ​ថា​ រឿង​អាស្រូវ​ដ៏​ធំដែល​ផ្ទុះ​ឡើង​ថ្មី​ៗ​​នេះ​ កើត​មាន​ឡើង​ខណៈ​ការ​វាយ​តម្លៃ​​នៃ​ការ​​គាំទ្រ​លោក​ គីហ្ស៊ីដា ​មាន​កម្រិត​ទាប​​បំផុត​សម្រាប់​នាយក​រដ្ឋ​មន្ត្រី​ណា​មួយ​ ចាប់​តាំង​ពី​បក្ស​ LDP បាន​វិញ​មក​កាន់​អំណាច​ក្នុង​ឆ្នាំ​ ២០១២​ ដោយ​សារ​តែ​កំហឹង​របស់​អ្នក​បោះ​ឆ្នោត​អំពី​អតិផរណា​ ក៏​ដូច​ជា​ការ​ដោះ​ស្រាយ​រឿង​អាស្រូវ​ជាច្រើន​កន្លង​មក​។​

រដ្ឋ​មន្រ្តី​​ដែល​​លា​លែង​​ពី​​តំណែង​​ទាំង​​អស់​ គឺ​ជា​​អ្នក​នយោបាយ​ធំ​ៗ​របស់​បក្ស​​ LDP ដែល​​​ដឹក​នាំ​​ដោយ​​​ ​អតីត​​នាយក​​រដ្ឋ​មន្ត្រី​ជប៉ុន​ ស៊ីនហ្សូ អាបេ(Shinzo Abe) ​មុន​​​​ពេល​គេ​ធ្វើ​​ឃាត​លោក​កាល​ពី​ឆ្នាំ​មុន​។ ​​

គួរ​​បញ្ជាក់​ថា​ រឿង​អាស្រូវ​កិប​កេង​ប្រាក់​ គឺ​ពាក់​ព័ន្ធ​នឹង​ការ​ចោទ​ប្រកាន់​ដែល​ថា​ សមាជិក​បក្ស​ LDP បាន​យក​ប្រាក់​ដែល​ខ្លួន​បាន​មក​ពី​ការ​​លក់​សំបុត្រ​​លើសកូតា​​ក្នុង​កម្មវិធី​រ៉ៃអង្គាស​ប្រាស់​សម្រាប់​បក្ស​ ដាក់​ចូល​ក្នុង​ហោប៉ៅ​​ផ្ទាល់​ខ្លួន​។

សារព័ត៌មាន​ជប៉ុន​ផ្សាយ​ថា​ ​​ព្រះ​រាជ​អាជ្ញា​ជប៉ុន​កំពុង​ស៊ើប​អង្កេត​​ ​ដោយ​នឹង​ចាប់​ផ្តើម​វាយ​ឆ្មក់​​លើ​ការិយាល័យ​ និង​សម្ភាសន៍​សមាជិក​សភា​រាប់​សិប​នាក់​នៅ​ចុង​សប្តាហ៍​នេះ​៕

ប្រែសម្រួល៖ ហួន ឌីណា ប្រភព​៖ https://www.bangkokpost.com/world/2705318/three-japanese-ministers-resign-over-kickbacks-scandal-reports