មូស្គូ៖កាលពីថ្ងៃព្រហស្បតិ៍ទី១៤ ខែធ្នូ ឆ្នាំ២០២៣ កន្លងទៅនេះ ប្រធានាធិបតីរុស្ស៊ី​លោក វ្ល៉ាឌីមៀ ពូទីន បានបង្ហាញការសុំទោសដ៏កម្រមួយ នៅពេលដែលសោធននិវត្តន៍ម្នាក់​បានត្អូញត្អែរនៅចំ​ពោះ​លោក​អំពីតម្លៃ​ស៊ុត និងសាច់មាន់ឡើងថ្លៃ។

ក្នុងអំឡុងពេលសួរសំណួរ និងចម្លើយ ប្រចាំឆ្នាំរបស់ពូទីនតាមប្រព័ន្ធអនឡាញជាមួយប្រព័ន្ធផ្សព្វផ្សាយ និងជាមួយ​សាធារណជន​​​ដែល​ចូលមកពីទូទាំងប្រទេសរុស្ស៊ី សោធននិវត្តន៍ម្នាក់ឈ្មោះ Irina Akopova ដែលបានចូលរួមក្នុង​កម្មវិធី​បាន​បង្ហាញ​ឱ្យឃើញថា ខ្លួនអង្គុយនៅតុផ្ទះបាយ ហើយនិយាយ​អំពីកង្វល់​របស់ខ្លួន​​ទៅកាន់ប្រធានាធិបតីតាមរយៈតំណភ្ជាប់វីដេអូនោះ។

នៅចំពោះមុខប្រធានាធិបតីរបស់ខ្លួន អ្នកស្រី​ Irina Akopova បាន​ត្អូញត្អែរទៅកាន់ លោក ពូទីន​ ​ថាទាំងតម្លៃ​ស៊ុត ទ្រូង​មាន់ និង​ស្លាប​ក្តីសុទ្ធតែបាន​ឡើង​ថ្លៃ​ទាំងអស់។ អ្នកស្រីបានបន្តនិយាយ​ទៅកាន់លោកពូទីនដូច្នេះថា៖ « Vladimir Vladimirovich សូមអាណិត​ដល់ សោធននិវត្តន៍ផង! យើងមិនមានប្រាក់សោធនរបស់យើងរាប់លានទេ។ ដូច្នេះសូមជួយដោះស្រាយ​ផង​ យើងមិនដឹង​ត្រូវពឹងនរណាទេ ខ្ញុំពិតជាដឹងគុណអ្នកខ្លាំងណាស់ ខ្ញុំពឹងអ្នកឱ្យជួយ»។

សំណួរនេះបានឆ្លុះបញ្ចាំងពីការព្រួយបារម្ភពិតប្រាកដក្នុងចំណោមប្រជាជនរុស្ស៊ីចំពោះការកើនឡើង
តម្លៃក្នុងការរស់នៅ ហើយបន្ទាប់ពីសំណូមពរនេះបានកើតឡើង លោកពូទីនក៏​បានទទួលស្គាល់​ដែរថា​អតិផរណា​​​រុស្សីអាចនឹងឈានដល់ ៨ភាគរយនៅឆ្នាំនេះ។

ឆ្លើយតបទៅនឹងសោធននិវត្តន៍ លោកពូទីនបាននិយាយថា៖ «ខ្ញុំសុំទោសចំពោះរឿងនេះ ។នេះគឺជា​កា​រ​បរាជ័យ​នៃការងាររបស់រដ្ឋាភិបាល ។ខ្ញុំសន្យាថាស្ថានភាព​នឹង​ត្រូវបាន​កែប្រែ​ក្នុងពេលដ៏​ខ្លីខាង​មុខនេះ​»​។

វេទិកាសំនួរ និងចម្លើយ ចុងឆ្នាំនេះបានក្លាយជាទម្រង់មួយដែលផ្តល់ឱកាសឱ្យលោកពូទីន បង្ហាញ​ថាខ្លួន​មាន​ការ​អាណិតអាសូរ ក៏ដូចជា​ការព្រួយបារម្ភទៅកាន់ប្រជាជនសាមញ្ញ ហើយកំពុងបញ្ជា​ឱ្យមន្ត្រី​ពាក់ព័ន្ធ​ដោះស្រាយ​ជូនពួកគេផងដែរ។

បន្ទាប់ពីវេទិកានេះដែរ រដ្ឋាភិបាលរុស្សីបាននិយាយថា ខ្លួននឹងបើកការនាំចូលស៊ុតចំនួន១.២ ពាន់លាន​គ្រាប់ក្នុងឆមាសទីមួយនៃឆ្នាំក្រោយ ដើម្បីព្យាយាមធ្វើយ៉ាងណា រក្សាតម្លៃដែល​បានកើនឡើងច្រើនជាង ៤០ភាគរយនៅឆ្នាំនេះ។

ក្រៅពីដំណោះស្រាយរឿងស៊ុតនេះ សាធារណជនមួយចំនួនដែល​បានលើកឡើងពី​បញ្ហា​របស់​ខ្លួន​ទៅ​កាន់​ប្រធានាធិបតី​ ក៏​ទទួល​ដំណោះស្រាយ​ភ្លាមៗ​ក្នុង​អំឡុង​វេទិកា​កាល​ពី​ថ្ងៃ​ព្រហស្បតិ៍នេះដែរ៕

ដោយៈ ស្រ៊ុន សិរីវឌ្ឍនៈ ប្រភព៖ https://www.reuters.com/world/europe/putin-rare-apology-over-price-eggs-2023-12-14/#:~:text=MOSCOW%2C%20Dec%2014%20(Reuters),about%20the%20price%20of%20eggs.