រ៉ូម៖ លោក អេឡុន ម៉ាស់(Elon Musk)ស្ថាបនិកក្រុមហ៊ុនផលិតរថយន្តអគ្គិសនី Tesla កាលពីថ្ងៃសៅរ៍ទី១៧ ខែធ្នូ ឆ្នាំ២០២​៣ បាននិយាយថា ប្រេង និងឧស្ម័ន មិនទាន់គួរត្រូវពិចារណា​ឈប់ប្រើប្រាស់ក្នុង​រយៈពេល​មធ្យម​​នោះ​ទេប៉ុ​ន្តែលោកក៏បាននិយាយថា វាមានសារៈសំខាន់ក្នុងការកាត់បន្ថយ​ការបញ្ចេញកាបូនដើម្បី​ការពារ​ភពផែនដី​ដែរ។​

នៅក្នុង​កិច្ច​​ជួបជុំនយោបាយស្តាំនិយមដែលរៀបចំដោយគណបក្ស Brothers of Italy របស់​នាយករដ្ឋមន្រ្តី​អ៊ីតាលី Giorgia Meloni លោក Musk បាននិយាយថា ការព្រមានអំពី​ការប្រែប្រួល​អាកា​សធាតុ​ក្នុងរយៈពេលខ្លី​​​គឺនិយាយបំផ្លើស​ ដោយបន្ថែមថា​ចលនាបរិស្ថានអាចនឹងទៅឆ្ងាយពេក ដែលបណ្តា​លឱ្យមនុស្សបាត់បង់ជំនឿទៅថ្ងៃអនាគត។​

គួរជម្រាបថា នៅក្នុងកិច្ចប្រជុំកំពូលអាកាសធាតុ COP28 ក្នុងខែនេះ អ្នកតំណាងមកពីប្រទេសជិត ២០០ ប្រទេស បាន​ព្រមព្រៀងគ្នាដើម្បីចាប់ផ្តើមកាត់បន្ថយការប្រើប្រាស់ឥន្ធនៈហ្វូស៊ីលជាសាកល ដើម្បី​ទប់ទល់​នឹង​​ការប្រែប្រួល​អាកាសធាតុដ៏អាក្រក់បំផុត ដែលជាសញ្ញាបង្ហាញពីការបញ្ចប់នៃយុគសម័យប្រេង។​

ដោយឡែក លោក Musk បាននិយាយថា លោកចាត់ទុកខ្លួន​ជាអ្នកបរិស្ថាន ហើយបានបន្ថែមថា វាពិតជា សំខាន់បែបនោះមែនបើគិតក្នុងរយៈពេលយូរ ដោយ​ឧស្សាហកម្មកាត់​បន្ថយកាបូនរាប់ពាន់លាន​ដែលពួកគេ​យកពីផែនដី ហើយបញ្ចេញទៅក្នុងបរិយាកាសដោយការដុតឥន្ធនៈហ្វូស៊ីល។​

ក៏ប៉ុន្តែម្តងហើយម្តងទៀតមហាសេដ្ឋីរូបនេះ​បានបញ្ជាក់​ថា ​៖ «​យើង​មិន​គួរបោះបង់​ប្រេង និង​ឧស្ម័ន​ក្នុង​រយៈ​ពេល​មធ្យម​នោះ​ទេ​»​។​

ក្រៅតែពីនិយាយបញ្ហាប្រេង នៅពេលដែលអ្នកសម្របសម្រួល​សួរថា​តើក្រុមហ៊ុនរបស់លោក​នឹងវិនិយោគ​នៅ​ក្នុងប្រទេសអ៊ីតាលីឬទេ លោក Musk បាននិយាយថាលោក​មានការព្រួយបារម្ភអំពី​ការថយ​ចុះអត្រា​បង្កកំណើ​ត​របស់ប្រទេសនេះ។​

លោក Elon Musk បកស្រាយថា ៖ «ខ្ញុំ​គិត​ថា ប្រទេស​អ៊ីតាលី​ជា​កន្លែង​វិនិយោគ​ដ៏​ល្អ ប៉ុន្តែ​ខ្ញុំ​ចង់​បញ្ជាក់​ថា ខ្ញុំ​បារម្ភ​អំពី​អត្រា​កំណើត​ទាប។ ប្រសិនបើ​កម្លាំង​ពលកម្ម​ធ្លាក់​ចុះ​តើ​អ្នក​ណា​នឹង​ធ្វើ​ការ​​»។

ស្របពេលជាមួយគ្នានេះ លោកបានអំពាវនាវឱ្យរដ្ឋាភិបាលអ៊ីតាលីបង្កើនការលើកទឹកចិត្តសម្រាប់គ្រួសារ​ឱ្យ​មាន​កូនកាន់តែច្រើន ដោយបន្ថែមថាប្រទេសមួយមិនអាចពឹងផ្អែកតែ​លើលំហូរជន​អន្តោប្រវេសន៍ដើម្បី​បំ​ពេញចន្លោះនោះទេ។​

គួរឱ្យដឹងដែរថា ប្រទេសអ៊ីតាលីបានកំណត់ថវិកាប្រហែល ១ពាន់លានអឺរ៉ូ ​​នៅក្នុងគម្រោងថវិកាឆ្នាំក្រោយ ដើម្បីដោះស្រាយវិបត្តិប្រជាសាស្រ្តរបស់ប្រទេស។ អត្រាបង្កកំណើតនៅប្រទេសអ៊ីតាលី​បានធ្លាក់ចុះ​ ​១៤ ឆ្នាំ​ជាប់ៗគ្នា ជាចំនួនទាបបំផុតចាប់តាំងពីការបង្រួបបង្រួមប្រទេសក្នុងឆ្នាំ ១៨៦១៕​

ប្រែសម្រួល៖ស្រ៊ុន សិរីវឌ្ឍនៈ

ប្រភព៖ Elon Musk says oil and gas should not be demonized

https://www.reuters.com/business/energy/oil-gas-should-not-be-demonized-elon-musk-says-2023-12-16/