តេហេរ៉ង់៖រដ្ឋមន្ត្រីក្រសួងរ៉ែ និងថាមពលអ៊ីរ៉ង់កាលពីថ្ងៃទី១៨ ខែ​ធ្នូកន្លងទៅថ្មីៗនេះបានបញ្ជាក់ថា បញ្ហារអាក់​រអួល​​​ចំពោះស្ថានីយប្រេងឥន្ធនៈនៅទូទាំងប្រទេសគឺបណ្ដាលមកពី ការវាយប្រហារតាមប្រព័ន្ធអ៊ីនធឺណិត (Cyber-attack) ។ ​

លោក Javad Owji រដ្ឋមន្ត្រីក្រសួងរ៉ែ និងថាមពលបានប្រាប់ទូរទស្សន៍រដ្ឋអ៊ីរ៉ង់ថា សេវាកម្ម​នៅតាមស្ថានីយ៍ទូទាំងផ្ទៃប្រទេសប្រមាណជា ៧០ភាគរយ បានទទួលការរំខាន ដែលលោកដាក់ការ​សន្និដ្ឋានថាអាចជាការជ្រៀតជ្រែកពីក្រៅប្រទេស។

ប៉ុន្តែយ៉ាងណា រហូតមកដល់ពេលនេះ ស្ថានីយ​ប្រេង​ចំនួន ១ ៦៥០ ត្រូវបាន​ដំណើរការឡើងវិញ។ រីឯក្រសួ ងក៏បាន​គ្រប់គ្រង​ស្ថានីយ​ប្រេង​ចំនួន ៣ ៨០០ កន្លែងរួចរាល់ហើយដែរ។

ទាក់ទិននឹងបញ្ហានេះ ទូរទស្សន៍រដ្ឋអ៊ីរ៉ង់បានរាយ​ការណ៍ដោយចោទ​ប្រកាន់​ថា ក្រុមដែលវាយប្រហារ​ខាងលើ មានជាប់ពាក់ព័ន្ធជាមួយអ៊ីស្រាអែល។

ព័ត៌មានទូរទស្សន៍រដ្ឋរបស់អ៊ីរ៉ង់បាននិយាយទៀតថា ក្រុមដែលមានឈ្មោះថា Gonjeshke Darande ឬ «Predatory Sparrow»​ បានអះអាងថា ខ្លួននៅពីក្រោយការវាយប្រហារនេះ ។រីឯប្រព័ន្ធផ្សព្វផ្សាយ​ក្នុងស្រុ​ករបស់អ៊ីស្រាអែលក៏បានរាយការណ៍ពីការអះអាងនេះផងដែរ។​

ក្រុមខាងលើនេះបាននិយាយនៅក្នុងសេចក្តីថ្លែងការណ៍មួយនៅលើបណ្ដាញសង្គមតេឡេក្រាម( Telegram )ថា ការវាយប្រហារតាមអ៊ីនធឺណិតនេះត្រូវបានអនុវត្តក្នុងគោលបំណងបញ្ចៀសការខូចខាតដែលអាចកើតមានចំពោះសេវាសង្គ្រោះបន្ទាន់ណាមួយនៅក្នុងប្រទេសអ៊ីស្រាអែល។​

ប៉ុន្តែយ៉ាងណា ភាគីអ៊ីរ៉ង់បានសង្កត់ធ្ងន់ថា ក្រុម Hacker ទាំងនោះ ក៏ធ្លាប់បានវាយប្រហារ ប្រឆាំង​នឹងស្ថានីយប្រេងឥន្ធនៈ បណ្តាញផ្លូវដែក និងរោងចក្រដែករបស់អ៊ីរ៉ង់កាលពីពេលកន្លងទៅ​ផងដែរ។​

គួរបញ្ជាក់ថា កាលពីឆ្នាំមុន ក្រុម Predatory Sparrow ក៏ធ្លាប់បានបង្កភាពរអាក់រអួលនៅក្នុងរោងចក្រ ដែកមួយកន្លែងរបស់អ៊ីរ៉ង់ផងដែរ។ មិនត្រឹមតែប៉ុណ្ណោះ នៅក្នុងឆ្នាំ ២០២១ ការវាយប្រហារស្រដៀង​គ្នាទៅលើស្ថានីយ៍ប្រេងឥន្ធនៈ បានរំខានដល់ការលក់ប្រេង និងនាំឱ្យមានការប្រជ្រៀតគ្នាដើម្បីចាក់ ប្រេងសាំ​ងផង។

តាមរយៈការវាយប្រហារម្ដងហើយម្ដងទៀត អ៊ីរ៉ង់​បាន​និយាយ​ថា អ៊ីស្រាអែល និង​អាមេរិក​ជា​ពិរុទ្ធជន​ដែល​នៅ​ពី​ក្រោយ​រឿងទាំងនោះ។​

បើទោះជាយ៉ាងនេះក្ដី ក្រសួងរ៉ែ និងថាមពលនាពេលនេះក៏បានបញ្ជាក់ប្រាប់ទូរទស្សន៍រដ្ឋដែរថា ការរ​អា​ក់រអួល​ខាងលើ មិនទាក់ទងនឹង​ផែនការដំឡើងថ្លៃប្រេងឥន្ធនៈ​ ដែលអាចនឹងបង្កទៅជា​ការតវាហិង្សានោះទេ​៕​

ប្រែសម្រួល៖កែវ បុស្បា

ប្រភព៖ Reuters Iran petrol stations hit by cyberattack, oil minister says