ភ្នំពេញ៖ សហព័ន្ធកីឡាប្រដាល់សកលកម្ពុជា បានចាប់ផ្តើមរៀបចំការ ប្រកួតកីឡាប្រដាល់សកល ជ្រើសរើសជើងឯកថ្នាក់ជាតិ ប្រចាំឆ្នាំ២ ០២៣ នៅសាលហ្វឹកហាត់ប្រដាល់សកល នៃពហុកីឡដ្ឋានជាតិ អូឡាំពិក រយៈពេលបួនថ្ងៃ ដើម្បីចម្រាញ់ ជ្រើសរើស កីឡាករ កីឡាការិនី ជាជម្រើសជាតិដើម្បីហ្វឹកហាត់ប៉ប៉នត្រៀមសម្រាប់ចូលរួមក្នុងការប្រកួតកម្រិតអន្តរជាតិ ។ពិសេស គឺព្រឹត្តិការណ៍កីឡាស៊ីហ្គេម លើកទី៣៣ ដែល ប្រទេសថៃទទួលធ្វើជាម្ចាស់ផ្ទះ ឆ្នាំ២០២៥។

ការប្រកួតកីឡាប្រដាល់សកល ជ្រើសរើសជើងឯកថ្នាក់ជាតិ ឆ្នាំ ២០២៣នេះ មានកីឡាករ កីឡាការិនីចូលរួមប្រជែងមេដាយ មានចំនួន សរុប ១០៨ នាក់ ។ក្នុងនោះមានកីឡាការិនី ៦នាក់ មកពី ២១ ក្លឹប-សមាគម និងក្រសួង។ ការប្រកួតនេះមានរយៈពេលបួនថ្ងៃ គឺពីថ្ងៃទី ២៦-២៩ ខែធ្នូ ឆ្នាំពីចាប់ពីម៉ោង១:៣០រសៀល។

ចំពោះការប្រកួតថ្ងៃដំបូង ម្សិលមិញថ្ងៃទី២៧ ខែធ្នូ មន្ត្រីគណៈកម្មការ បច្ចេកទេសបានរៀបចំការប្រកួតសរុបចំនួន៤៦គូ លើប្រភេទទម្ងន់ ៥១គីឡូក្រាមឡើងទៅដល់ទម្ងន់ ៧១គីឡូក្រាម។ សម្រាប់ការប្រកួតថ្ងៃទី២ នៅល្ងាចថ្ងៃទី២៧ ខែធ្នូនេះ គឺមានចំនួន៣០គូ ពីប្រភេទទម្ងន់ចាប់ពី៦០គីឡូក្រាម ដល់៧១គីឡូក្រាម ។ ក្នុងនោះមានការប្រកួតនារី២គូ លើប្រភេទទម្ងន់ ៥២គីឡូក្រាមដូចៗគ្នា ដែលជាជួបគ្នារវាងកីឡាការិនី ហួន សារួន មកពីក្លឹបនាគរាជមានជ័យ និងកីឡាការិនី អុល ស្រីនុច មកពីរាជធានី ភ្នំពេញ ខណៈកីឡាការិនី ចាន់ វិច្ឆិកា មកពីក្លឹបសរសីកីឡាប៉ះ ជាមួយកីឡាការិនី សាក់ រតនា មកពីក្លឹបក្រសួងការពារជាតិ៕
រូបភាព និងអត្ថបទ៖ជាវ ចន្ធូ